காலை வேளையில் தானியங்களில் ஒன்றான கம்புவை உணவில் சேர்த்து வந்தால், ஒரு நாளைக்கு தேவையான ஆற்றல் கிடைப்பதுடன், உடலும் வலிமையாக இருக்கும்.
தேவையான பொருட்கள்:
உடைத்த கம்பு – 1/2 கப்
தண்ணீர் – 4 கப்
தயிர் – 1 கப்
கேரட் – 2 1/2 டேபிள் ஸ்பூன் (துருவியது)
மாங்காய் – 1 டேபிள் ஸ்பூன் (பொடியாக நறுக்கியது)
கொத்தமல்லி – 2 டீஸ்பூன் (நறுக்கியது)
உப்பு – தேவையான அளவு
தாளிப்பதற்கு,
எண்ணெய் – 1 டீஸ்பூன்
கடுகு – 1/2 டீஸ்பூன்
கறிவேப்பிலை – சிறிது
பச்சை மிளகாய் – 1 (பொடியாக நறுக்கியது)
இஞ்சி – 1/4 இன்ச்
குறிப்பு: ஒருவேளை முழு கம்பு இருந்தால், அதனை நீரில் 15 நிமிடம் ஊற வைத்து, பின் மிக்ஸியில் போட்டு கொரகொரவென்று அரைத்து எடுத்துக் கொள்ளலாம்.
செய்முறை:
முதலில் உடைத்த கம்பை நீரில் நன்கு கழுவி, பின் அதனை குக்கரில் போட்டு, தண்ணீர் ஊற்றி, மிதமான தீயில் 4 விசில் விட்டு இறக்கிக் கொள்ள வேண்டும்.
விசிலானது போனதும், அதனை திறந்து, தண்ணீர் அதிகம் இருந்தால், மீண்டும் அடுப்பில் வைத்து, சற்று கெட்டியாகும் வரை கிளறி விட்டு இறக்கி, ஒரு பாத்திரத்தில் போட்டுக் கொள்ள வேண்டும்.
பின்பு அத்துடன் தயிர் சேர்த்து நன்கு கிளறி, பின் கேரட், கொத்தமல்லி, மாங்காய் சேர்த்து தேவையான அளவு உப்பு தூவி நன்கு கிளறி விட வேண்டும்.
பிறகு ஒரு வாணலியை அடுப்பில் வைத்து, அதில் எண்ணெய் ஊற்றி காய்ந்ததும், தாளிப்பதற்கு கொடுத்துள்ள பொருட்களைப் போட்டு தாளித்து, கம்புடன் சேர்த்து கிளறினால், சுவையான கம்பு தயிர் சாதம் ரெடி!!!
