மனிதனின் சம்ஸ்காரங்கள் (பதிவுகள் மற்றும் உள்ளார்ந்த போக்குகள்) அவன் பிறப்பிலிருந்தே அவனது மனதில் வேரூன்றி எப்போதும் ஒரு நுட்பமான வடிவத்தில் உள்ளன.
அவை சரியான நேரத்தில் மட்டுமே வெளிப்படும். குறிப்பிட்ட சிலருக்கு, இறைவன் மீது பக்தி, ஒருவருக்கு விதிக்கப்பட்ட கர்மாக்கள் (செயல்கள்) செய்வதில் நம்பிக்கை மற்றும் முதியோர்களுக்கு மரியாதை போன்ற சாத்வீக (உன்னத) பண்புகள் குழந்தை பருவத்திலிருந்தே வெளிப்படும்.
அப்படிப்பட்டவர்கள் தினமும் கோவிலுக்குச் செல்வதுடன், வயது ஏற ஏற, பகவத் கீதை போன்ற புனித நூல்களைப் படிப்பதில் நாட்டத்தை வளர்த்துக் கொள்கிறார்கள்.
இதனுடன், அவர்களின் நல்ல அதிர்ஷ்டத்தால், அவர்கள் உன்னதமானவர்களின் (சத்சங்க) சங்கத்தையும் பெறுவார்கள். சத்சங்கம் மேலும் வளர, இறைவன் தகுந்த நேரத்தில் அத்தகையோருக்கு குருவை அருளுவார்.
ஒரு நபர் இந்த ஞான-குருவுக்கு (உயர்ந்த அறிவை வழங்கும் ஆசிரியர்) சேவை செய்வதும், குருவை உண்மையாகவே இறைவனாகக் கருதுவதும் அவசியம்.
த்ரிமூர்த்திகளான பிரம்மா, விஷ்ணு மற்றும் மகேஸ்வரர் – தனது குருவின் வடிவத்தில் வெளிப்பட்டவர்கள் என்பதை அவர் புரிந்து கொள்ள வேண்டும். குரு ஒரு சாதாரண மனிதர் என்ற எண்ணம் ஒருவருக்கும் இருக்கக் கூடாது.
ஸ்ரீமத் பாகவதத்தில் பகவான் கூறியது இதுதான்:
ஆசார்ய மா விஜாநியாந்நவமந்யேத் கர்ஹிச்சித்.
ந மர்த்யபுத்தாயாஸுயேத் ஸர்வதேவமயோ குரு: ।।
குருவை இறைவனாகக் கருத வேண்டும் என்று அர்த்தம். குருவை ஒருபோதும் அவமதிக்கக்கூடாது. குருவை ஒரு சாதாரண மனிதனாகக் கருதி, அவர் மீது பொறாமை உணர்வுகளை வளர்த்துக் கொள்ளக் கூடாது (குருவின் மீது தவறுகளை சுமத்தக் கூடாது). ஏனென்றால், குரு அனைத்து தெய்வீகத்தின் உருவமாக இருக்கிறார்.
இதை அனைவரும் நன்கு புரிந்துகொண்டு, குருவின் உபதேசம் (அறிவுரை) பெற்று வாழ்வில் முன்னேற எங்கள் ஆசிகள்.