திமுக.,வில் ஆன்லைன் வழியாக உறுப்பினர் சேர்க்கை நடந்து வருகின்றது. இந்த நிலையில் அமெரிக்க அதிபர் டிரம்ப், விவரமறியா வாரிசு ஆகிய பெயர்களில் உறுப்பினர் அட்டை வழங்கப்பட்டுள்ளது. இதை விட ஒரு படி மேலாகச் சென்று, சுடலை, தந்தை பெயர் கட்டுமரம் கொளத்தூர் தொகுதி என்று வழங்கப் பட்டிருக்கும் உறுப்பினர் அட்டைதான் படு பயங்கர கிண்டல்களுடன் இணையத்தில் உலா வருகிறது. திமுக.வின் இந்த கூத்துக்களை நெட்டிசன்கள் கிண்டலடித்து வருகின்றனர்.
வரும் 2021ல் தமிழகத்தில் சட்டசபைத் தேர்தல் நடைபெறவுள்ளது. இதற்காக திமுக., எந்த ஒரு அரசியல் துருப்புச் சீட்டையும் பயன்படுத்த மும்முரமாக வேலை செய்து வருகிறது. தேர்தலை முன்னிட்டு உறுப்பினர்களைச் சேர்க்க திமுக தீவிரம் காட்டி வருகிறது. இதற்காக ஆன்லைன் மூலம் உறுப்பினர் சேர்க்கை நடத்துவதாக அறிவித்தது.
அதன்படி திமுக., ஆன்லைன் மூலம் உறுப்பினர் சேர்க்கையை தீவிரமாக நடத்தி வருகிறது. இதற்காக கூகுள் ஆட்ஸ் மூலம் பல்வேறு இணையதளங்கள் வாயிலாகவும், இன்னும் அச்சு ஊடகங்கள் மூலமும் விளம்பரங்களை செய்து வருகிறது.
இதன் ஒரு பகுதியாக, திமுக., வழங்கியுள்ள அடையாள அட்டைகள் இணையத்தில் உலா வருகின்றன. திமுகவில் சேர்ந்துள்ளதாக அமெரிக்க அதிபர் டொனால்ட் டிரம்ப் பெயரில் அடையாள அட்டை வழங்கப்பட்டுள்ளது. அதில், அவர் சென்னை எழும்பூர் தொகுதியைச் சேர்ந்தவர் எனவும் சென்னை மாவட்டத்தைச் சேர்ந்தவர் எனவும் தெரிவிக்கப்பட்டுள்ளது.
மற்றொரு அடையாள அட்டையில் ‘விவரமறியா வாரிசு’ தந்தை பெயர் மலிவு அரசியல் மன்னர் என்று குறிப்பிட்டு, உறுப்பினர் அடையாள அட்டை வழங்கப்பட்டுள்ளது. மேலும், தமிழக முதல்வரும் அதிமுக., துணை ஒருங்கிணைப்பாளருமான எடப்பாடி பழனிசாமி பெயருக்கும் கார்டு வழங்கப் பட்டுள்ளது.
பொய்களால் நிரம்பியதே திமுக., என்றும் 420ஐ வாழவைக்க ரூ.370 கோடி வாரி இறைத்திருக்கிறது எனவும் குற்றச்சாட்டுகளை முன்வைத்து வரும் சமூக ஊடக கருத்தாளர்கள், இப்போது விதவிதமாக உறுப்பினர் அட்டைகளை தயாரித்து இணையத்தில் உலவ விடுகின்றனர்.
பெயர் சுடலை என்றும், தந்தை பெயர் கட்டுமரம் என்றும், கொளத்தூர் தொகுதி என்றும் குறிப்பிட்டு வலம் வரும் உறுப்பினர் அட்டை அதில் சற்று தூக்கல் ரகம். இந்த அடையாள அட்டைகள் சமூக வலைதளங்களில் பரவி வருகிறது. இதனை பார்த்த நெட்டிசன்கள், எந்த பெயரிலும், முகவரியிலும் விண்ணப்பித்தாலும் திமுகவில் உறுப்பினராகிவிடலாம் என கேலி செய்து வருகின்றனர்.
முன்னர் பாஜக., இது போல் இணையவழி உறுப்பினர் சேர்க்கையை நடத்தியது. ஒரு குறிப்பிட்ட மொபைல் எண்ணுக்கு அழைத்தால் பெயர், முகவரி, தொலைபேசி எண்ணுடன், தொகுதியைக் குறிப்பிட்டு மெசேஜ் வரும். அதை அந்த அந்தப் பகுதி பொறுப்பாளர்கள் சரி பார்த்து, தகவலை அனுப்பி வைப்பர். அதன் பின்னரே உறுப்பினர் அட்டை தயாராகி வரும். இந்த நடைமுறையிலேயே, சமூக விரோதிகள், ரவுடிகள் கட்சியில் சேர்ந்துவிட்டிருக்கிறார்களே என்று கேள்வி கேட்ட போது, தமிழக மாநில தலைவர் முருகன், ஆன்லைனில் சேர்க்கை அதிகம் நடைபெற்றது…. என்று சொல்லி ஒதுங்கிக் கொண்டார்.
திமுக.,வில் ஏற்கெனவே அதன் உறுப்பினர்கள் சிலர் அடிதடி, ரகளை, ரவுடியிசம், கட்டப்பஞ்சாயத்து என அவ்வப்போது மாட்டிக்கொண்டு, சமூகத் தளங்களில் அவதிப் படுவார்கள். இப்போது எந்த வித விசாரணையும் இன்றி இப்படி உறுப்பினர் கார்டுகள் கொடுப்பது அக்கட்சியை எங்கு கொண்டு போய் விடுமோ என்று பதைபதைக்கிறார்கள் பழைய திமுக.,வினர்.