அணி மாறும் யோசனையில் 12 அமைச்சர்கள்…

அணி மாறும் யோசனையில் 12 அமைச்சர்கள்… பெரும்பான்மையை இழக்கிறதா சசிகலா முகாம்?!*
யார் முதல்வர் என்பதில் சசிகலாவுக்கும், ஓ.பன்னீர்செல்வத்துக்குமிடையே ஏற்பட்ட அதிகார மோதல் உச்சத்தை எட்டியுள்ளது. சசிகலாவை முன்னின்று ஆதரித்த அ.தி.மு.க. அமைப்புச் செயலாளர் பொன்னையன், அமைச்சர் மாஃபா பாண்டியராஜன் என அடுத்தடுத்து பன்னீர்செல்வம் முகாமுக்கு தாவி வருகிறார்கள். இதுவரை 6 எம்.எல்.ஏ.க்களும், சில எம்.பி.க்களும் ஓ.பன்னீர்செல்வத்துக்கு ஆதரவு தெரிவித்துள்ள நிலையில், இந்த பட்டியல் விரைவில் அதிகரிக்கும் என சொல்லப்படுகிறது.
அமைச்சர்கள் ராஜேந்திர பாலாஜி, ஜெயக்குமார், கே.சி.வீரமணி, நிலோபர் கபில் என 12 அமைச்சர்கள் ஓ.பன்னீர்செல்வத்தை ஆதரிக்கக் கூடும் என தகவல் வெளியாக அதிர்ந்து போயுள்ளது சசிகலா தரப்பு.இதையடுத்தே கூவத்தூர் சென்று எம்.எல்.ஏ.க்களுடன் ஆலோசனை நடத்தினார் சசிகலா. இந்த கூட்டத்தில் சசிகலாவுக்கு நேரடியாக ஆதரவு தெரிவிப்பவர்களின் பட்டியல் தயாரிக்கப்பட்டது. இந்த பட்டியலில் இடம்பெற்றிருப்பவர்கள் 111 பேர் தான்.
மொத்தமுள்ள 135 பேரில் 117 பேர் ஆதரவு இருந்தால் தான் ஆட்சியமைக்க முடியும். ஆரம்பத்தில் 135 பேரின் ஆதரவையும் பெற்றிருந்த சசிகலாவின் முகாமில் இருந்து இதுவரை 7 பேர் அணி மாறியுள்ளனர். எம்.எல்.ஏ.க்களில் 17 பேர் யாருக்கு ஆதரவு என்பதை முடிவு செய்யாமல் உள்ளதாக சொல்லப்படுகிறது. தற்போது இருக்கும் 111 பேரில் அமைச்சர்கள் சிலர் அணி மாறும் யோசனையில் இருப்பதால் நெருக்கடியான நிலைக்கு தள்ளப்பட்டுள்ளது சசிகலா தரப்பு.
தற்போதைய நிலையில் யாருக்கு ஆதரவு என முடிவெடுக்காமல் உள்ள எம்.எல்.ஏ.க்களும், அணி மாறும் முடிவில் உள்ள அமைச்சர்கள், எம்.எல்.ஏ.க்களும் பன்னீர்செல்வத்தை ஆதரித்தால் சசிகலா தரப்புக்கான ஆதரவு என்பது 100க்கும் குறையும் என சொல்லப்படுகிறது.
தமிழக சட்டமன்றத்தில் மொத்தமுள்ள 234 தொகுதிகளில் முன்னாள் முதல்வர் ஜெயலலிதா மரணமடைந்ததையடுத்து ஆர்.கே.நகர் தொகுதி காலியாக உள்ளது. 233 சட்டமன்ற உறுப்பினர்கள் உள்ளனர். இவர்களில் சபாநாயகர் தவிர 232 பேர் வாக்களிக்க தகுதியுள்ளவர்கள். பெரும்பான்மை பெற்று ஆட்சியமைக்க 117 பேர் தேவை. அ.தி.மு.க.வில் மொத்தம் 135 சட்டமன்ற உறுப்பினர்களும், தி.மு.க.வில் 89, காங்கிரஸில் 8, முஸ்லீம் லீகில் ஒரு சட்டமன்ற உறுப்பினர் என மொத்தம் 233 பேர் உள்ளனர்.
135 எம்.எல்.ஏ.க்களின் ஆதரவும் தனக்கு உள்ளதாக கூறி முதலில் ஆட்சியமைக்க கோரினார் சசிகலா. இது பின்னர் 131, 129 ஆக குறைந்து, இப்போது 111 ஆக மாறி இருக்கிறது. இதனால் சசிகலா தரப்புக்கு மிகுந்த நெருக்கடி ஏற்பட்டுள்ளது. அதே சூழலில் பன்னீர்செல்வம் பெரும்பான்மையை நிரூபிக்க வேண்டுமானால் 117 உறுப்பினர்களின் ஆதரவு அவசியம். அ.தி.மு.க.வில் இருந்து 117 பேரின் ஆதரவை பெற முடியாத பட்சத்தில், பன்னீர்செல்வம் தி.மு.க., காங்கிரஸ் உதவியை நாட வேண்டும். இல்லாவிட்டால் ஆட்சி கலைக்கப்பட்டு குடியரசுத்தலைவர் ஆட்சி அமலாகும்.
இருக்கும் 111 பேரை தக்க வைக்கவும், யாருக்கு ஆதரவு எனமுடிவு செய்யாத 17 பேரை தங்கள் பக்கம் இழுக்கவும் முயன்று வருகிறது சசிகலா தரப்பு. அதேபோன்று தங்கள் பக்கம் இழுக்க ஓ.பன்னீர்செல்வம் தரப்பும் முயற்சித்து வருகிறது.
குதிரை பேரம் துவங்கி விட்டது. தாமதம் ஊழலுக்கு வழி வகுக்கும் என்பார்கள். இங்கே ஆளுநர் முடிவெடுப்பதில் செய்யும் தாமதம் குதிரை பேரத்தை ஊக்குவிக்கிறது.