டோக்கியோ: ஜப்பானில் தனது 100 ஆவது வயதில் பின் புறமாக நீச்சல் அடித்து, போட்டியில் மிய்க்கோ நகோக்கா என்ற மூதாட்டி உலக சாதனை படைத்துள்ளார். ஜப்பானின் மட்சுயாமா என்ற நகரில் மாஸ்டர்ஸ் நீச்சல் போட்டி நடைபெற்றது. இந்தப் போட்டியின் பெண்கள் பிரிவுக்கான பின்புறமாக நீச்சல் அடிக்கும் போட்டியில் 100 வயது மூதாட்டி மிய்க்கோ நகோக்கா கலந்து கொண்டார். அவர், 1500 மீட்டர் தொலைவை 1 மணி நேரம் 15 நிமிடம் 54 விநாடிகளில் பின்புறமாகவே நீச்சலடித்து உலக சாதனை படைத்தார்.. 1914ஆம் ஆண்டு பிறந்த இவருக்கு துவக்கத்தில் நீச்சல் தெரியாதாம். ஒருநாள், அவரது முழங்காலில் ஏற்பட்ட பிரச்னை காரணமாக 82-வது வயதில் நீச்சல் அடிக்க கற்றுக் கொண்டார். ஜப்பான் நாட்டின் பாரம்பரிய நடனக் கலையான ‘நோ’-வை நாடக மேடைகளில் காட்சிப் படுத்துவது அவரது வேலையாக இருந்துள்ளது. இந்நிலையில், நாடகங்களில் தனது உடலை மெலிவானதாக வைத்துக் கொள்ளவும் நீச்சல் பயன்பட்டுள்ளது. ஆனால், அதுவே பழக்கமாகி, பிடித்துப் போய், தொடர்ந்து நீச்சலில் ஈடுபட்டுள்ளார். கடந்த 2002 ஆம் ஆண்டு நியூசிலாந்தின் கிரைஸ்ட்சர்ச் நகரில் நடைபெற்ற நீச்சல் போட்டியில் முதல் முறையாகக் கலந்துகொண்டு 50 மீட்டர் பின்புற நீச்சல் போட்டியில் வெண்கலப் பதக்கம் வென்று சாதனை படைத்தாராம். தற்போது, 24 உலக சாதனைகளை நிகழ்த்தியுள்ளார் இந்த மூதாட்டி.
