ரஷ்யாவில் அதிகம் பயன்படுத்தப்படும் மெசேஜ் ஆப்களில், வாட்ஸ் ஆப்பை பின்னுக்கு தள்ளி டெலிகிராம் முதலிடத்தை பிடித்துள்ளது.
மெசேஜ் ஆப்களில் வாட்ஸ்ஆப் மற்றும் டெலிகிராம் ஆகியவை உலகம் முழுவதும் அதிகம் பயன்படுத்தப்படுகின்றன.
இந்தியாவில் வாட்ஸ்ஆப் பயன்பாடு அதிகம் உள்ளது. அரசு அலுவலகங்கள், கார்ப்பரேட் நிறுவனங்கள் முதல், அடிமட்ட தொழிலாளர்கள் வரையில் வாட்ஸ்ஆப்பை, தகவலுக்காகவும், தொழில் ரீதியிலும் பயன்படுத்துகின்றனர்.
ஃபேஸ்புக் மற்றும் இன்ஸ்டாகிராமை வைத்திருக்கும் மெட்டா நிறுவனம்தான் வாட்ஸ்ஆப்பையும் இயக்கி வருகிறது. துபாயை மையமாக கொண்டு செயல்படும் டெலிகிராம் நிறுவனத்தின் தலைமை அலுவலகம் பிரிட்டிஷ் விர்ஜின் தீவில் உள்ளது.
உக்ரைன் மீது ரஷ்யா தாக்குதல் நடத்தி வருவதால், ரஷ்யாவுக்கு எதிர்ப்பு தெரிவித்துள்ள மெட்டா, ஃபேஸ்புக்கில் ரஷ்ய ஆதரவு செய்திகளுக்கு தடை விதித்தது. இதற்கு போட்டியாக ரஷ்யாவில் இன்ஸ்டாகிராமுக்கு தடை விதிக்கப்பட்டது.
இதன் தொடர்ச்சியாக, மெட்டாவின் நிறுவனமான வாட்ஸ்ஆப்பின் பயன்பாடு ரஷ்யாவில் குறையத் தொடங்கியுள்ளது. அங்குள்ள தகவல் தொடர்பு நிறுவனங்கள் டெலிகிராம் ஆப்பை அதிகம் விளம்பரப்படுத்தி வருகின்றன.
ரஷ்யாவில் பிப்ரவரி முதல் 2 வாரங்களில் டெலிகிராம் ஆப் பயன்பாடு 48 சதவீதமாக இருந்த நிலையில், தற்போது 63 சதவீதமாக உயர்ந்துள்ளது.
இதேபோன்று 48 சதவீத பயன்பாடாக இருந்த வாட்ஸ்ஆப் தற்போது 32 சதவீதமாக குறைந்துள்ளது.
நாள் ஒன்றுக்கு டெலிகிராம் ஆப்பில் 101 எம்பி டேட்டாவை ரஷ்யர்கள் பயன்படுத்துகின்றனர். வாட்ஸ்ஆப்பை பொருத்தளவில் இந்த டேட்டா 26 எம்.பி.யாக உள்ளது.
