தில்லி, புதுவை போலீஸில் பெண்களுக்கு 33% இட ஒதுக்கீடு

புதுதில்லி: தில்லி, புதுச்சேரி உள்ளிட்ட யூனியன் பிரதேசங்களில், காவல் துறையில் பெண்களுக்கு 33 சதவிகித இட ஒதுக்கீடு அளிக்கப்படும் என மத்திய அரசு அறிவித்துள்ளது. காவலர் முதல் உதவி ஆய்வாளர் வரை உள்ள பணியிடங்களில் 33 சதவிகிதம் பெண்களுக்கு இட ஒதுக்கீடு அளிக்க, பிரதமர் நரேந்திர மோடி தலைமையிலான மத்திய அமைச்சரவை ஒப்புதல் அளித்துள்ளது எனத் தகவல்கள் தெரிவிக்கின்றன. பாலியல் துன்புறுத்தல் தொடர்பான புகார்களை ஆண் காவலர்களிடம் கூற பெரும்பாலான பெண்கள் தயங்குகின்றனர். இதைக் கருத்தில் கொண்டு, பெண்களுக்கு காவல் துறையினரிடமுள்ள தயக்கத்தைப் போக்கி, அவர்களுக்குத் தன்னம்பிக்கையை ஏற்படுத்தும் வகையில், காவல்துறையில் அதிக அளவில் பெண்களை சேர்க்க அரசு திட்டமிட்டுள்ளது.