தென் மண்டலம் அளவிலான காவல்துறையால் கைப்பற்றப்பட்ட 10 கோடி மதிப்பிலான கஞ்சா பொருட்கள் எதிர்த்து அழிக்கப்பட்டது
விருதுநகர் மாவட்டம், காரியாபட்டி அருகே அ.முக்குளம் உண்டுறுமி கிடாக்குளம் பகுதியில் அமைந்துள்ள மருத்துவ கழிவுகளை எரியூட்டும் ஆலையில் தென் மண்டல பகுதிகளான மதுரை, தேனி, திண்டுக்கல், விருதுநகர் ஆகிய மாவட்டங்களில் தமிழக போலீசாரால் ஆப்ரேஷன் 2.0 கஞ்சா வேட்டையில் கைப்பற்றப்பட்ட சுமார் 10 கோடி மதிப்பிலான போதைப் பொருட்கள் எரித்து அழிக்கப்பட்டது.
தமிழக காவல்துறை கூடுதல் டிஜிபி மகேஸ்குமார் அகர்வால் தலைமையிலும், மதுரை சரக டிஜஜி பொன்னி, திண்டுக்கல் சரக டிஐஜி ரூபேஷ்குமார் மீனா, விருதுநகர் மாவட்ட எஸ்.பி மனோகர், மதுரை மாவட்ட எஸ்.பி சிவபிரசாத், திருநெல்வேலி மாநகர துணை ஆணையாளர் ஸ்ரீனிவாசன், திருச்சுழி டி.எஸ்.பி ஜெகநாதன், நரிக்குடி காவல் ஆய்வாளர் ராமநாராயணன் ஆகியோர் முன்னிலையில் சுமார் 980 கிலோ எடை கொண்ட சுமார் 10 கோடி மதிப்புள்ள கஞ்சாவை எரித்து அழிக்கப்பட்டது.
இதுகுறித்து தமிழக காவல்துறை கூடுதல் டிஜிபி மகேஸ்குமார் அகர்வால் கூறியதாவது,
கடந்த ஆகஸ்ட் மாதம் தமிழக முதலமைச்சர் நடத்திய ஆலோசனை கூட்டத்தில் போதையில்லாத தமிகத்தை உருவாக்க வேண்டும் என தெரிவித்தார். அதன் அடிப்படையில் தமிழக முழுவதும் போலீசாரால் போதை ஒழிப்பு சம்மந்தமாக தீவிர நடவடிக்கை எடுக்கபட்டது. இதில் குறிப்பாக ஆப்ரேஷன் 2.0 கஞ்சா ஒழிப்பு நடவடிக்கைகளில் தமிழக முழுவதும் 21 ஆயிரம் கிலோ கஞ்சா பிடிக்கப்பட்டது. இது கடந்த ஆண்டை விட அதிகமாக உள்ளது என்றார். கஞ்சா விற்றவர்களை பிடித்து முறையாக தண்டனை வழங்க நடவடிக்கை எடுக்கப்பட்டு வருகிறது. மேலும் 16 கோடி சொத்துகள் முடக்கப்பட்டுள்ளது.
பறிமுதல் செய்யப்பட்ட கஞ்சாவை பாதுகாக்கவும், அதை முழுமையாக அழிப்பதற்கும் நடவடிக்கை எடுக்கப்பட்டு வருகிறது. தற்போது தென் மண்டல பகுதிகளான மதுரை திண்டுகல், தேனி, விருதுநகர் ஆகிய மாவட்டங்களில் பிடிக்கப்பட்ட சுமார் 1000 கிலோ கஞ்சாவை விருதுநகர் மாவட்டம் நரிக்குடி அருகே உள்ள மருத்துவ கழிவு எரிக்கும் ஆலையில் வைத்து அளிக்கப்பட்டது என தெரிவித்தார்.
