வரும் 2026 தமிழக சட்டமன்றத் தேர்தலில், திமுக., கூட்டணியில் இந்திய கம்யூனிஸ்ட் கட்சிக்கு 5 தொகுதிகள் ஒதுக்கீடு செய்யப்பட்டுள்ளது.
இதை அடுத்து, அரசு ஊழியர்கள், தொழிலாளர் உரிமை என எதையும் பேசவிடாமல், கடந்த 5 வருடமாக கம்யூனிஸ்ட்களை அடக்கி வைத்ததுடன், தற்போது 5 சீட்டுக்குள் அடிமைப்படுத்திய திமுக.,வின் திறமைக்கு வாழ்த்துகள் தெரிவிப்பதாக சமூகத் தளங்களில் கருத்துகள் ட்ரெண்ட் ஆனது.
திமுக., கூட்டணியில் தொகுதிப் பங்கீடு குறித்து தொடர்ந்து பேச்சுவார்த்தை நடைபெறுகிறது. வார்த்தைப் போர், கூட்டணியில் இருக்குமா இருக்காதா, உன்னால் தான் நான் கெட்டேன், என்னால் தான் நீ வெற்றி பெற்றாய் என்றெல்லாம் சகட்டுமேனிக்கு சண்டை சச்சரவுகள் வெளியில் இருந்த போதும், அனைவரும் எதிர்பார்த்தபடி, கடைசியில் சுமுகமாக காங்கிரஸ் கட்சிக்கு, 28 தொகுதிகள், ஒரு மாநிலங்களவை சீட் என காங்கிரஸுக்கு ஒதுக்கப்பட்டது.
அடுத்து, இந்திய யூனியன் முஸ்லிம் லீக்குக்கு 2, மனிதநேய மக்கள் கட்சிக்கு 2, மதிமுக.,வுக்கு 4, கொமதேக.,வுக்கு 2 என தொகுதிகள் ஒதுக்கப்பட்டன. இன்னும் கம்யூனிஸ்ட்கள், விடுதலை சிறுத்தைகள் ஆகிய கட்சிகளுடன் தொகுதிப்பங்கீடு அறிவிக்க வேண்டிய நிலையில் இருந்தது.
கூட்டணிக்குள் தேமுதிக., வந்ததால், அவர்களுக்கு கொடுக்கப்பட்ட அளவிலேயே விசிக., கம்யூனிஸ்ட்கள் எதிர்பார்த்தார்கள். தொடர் பேச்சுவார்த்தைக்கு பிறகு இன்று இந்திய கம்யூனிஸ்ட்- திமுக இடையே தொகுதி பங்கீடு ஒப்பந்தம் கையெழுத்தானது.
அதன்படி, திமுக., கூட்டணியில் இந்திய கம்யூனிஸ்ட்டுக்கு 5 தொகுதிகள் ஒதுக்கப்பட்டுள்ளது.
கடந்த 2021 தேர்தலில் 6 தொகுதிகளில் போட்டியிட்டது இந்திய கம்யூனிஸ்ட் கட்சி. தற்போது ஒன்று குறைத்துக் கொண்டு, 5 தொகுதிகளுக்கு சுருங்கி விட்டது.
தமிழக தேர்தல்களில் இந்திய கம்யூனிஸ்ட் போட்டியிட்ட இடங்கள் எண்ணிக்கை
1989 – 13 – அதிமுக கூட்டணி
1991 – 10 – திமுக கூட்டணி
1996 – 13 – திமுக கூட்டணி
2001 – 8 – அதிமுக கூட்டணி
2006 – 10 – திமுக கூட்டணி
2011 – 10 – அதிமுக கூட்டணி
2016 – 25 – மக்கள் நலக்கூட்டணி
2021 – 6 – திமுக கூட்டணி
2026 – 5 – திமுக கூட்டணி
தற்போது திமுக., கூட்டணியில் இடம் பெற்றுள்ள கட்சிகளுக்கு திமுக ஒதுக்கியுள்ள தொகுதிகள் மற்றும் 2021 தேர்தலுடன் ஒப்பீடு:
காங்கிரஸ் -28 தொகுதி (3 அதிகம்)|
முஸ்லிம் லீக் -2 தொகுதி (1 குறைப்பு)
ம.ம.க., -2 தொகுதி (அதே நிலை)
ம.தி.மு.க., -4 தொகுதி (2 குறைப்பு)
கொமதேக – 2 தொகுதி (1 குறைப்பு)
இந்திய கம்யூனிஸ்ட்- 5 தொகுதிகள் (1 குறைப்பு)
இந்நிலையில், தொகுதிப்பங்கீடு குறித்து செய்தியாளர்களிடம் பேசிய இந்திய கம்யூனிஸ்ட் மாநில செயலாளர் வீரபாண்டியன், “பாஜக.,வை வீழ்த்துவதே முதன்மை நோக்கம். கூட்டணியில் புதிய கட்சிகள் இணைந்துள்ளதால் தொகுதிகளை குறைத்துக் கொள்ள முதல்வர் கேட்டார். இதனால் தான் நாங்களும் 5 தொகுதிகளாக குறைத்துக் கொண்டோம். நாங்களும் இடங்களை குறைத்துதான் போட்டியிடப் போகிறோம் என முதல்வர் ஸ்டாலினும் கூறினார்” என்றார்.
