இலங்கை வருவதற்கு தலாய் லாமாவுக்கு விசா மறுப்பு?

திபெத்தின் ஆன்மீகத் தலைவர் தலாய் லாமாவுக்கு இலங்கைக்கான விசா மறுக்கப்பட்டுள்ளது. தலாய் லாமா இலங்கைக்கு பயணம் செய்ய விசா பெற திட்டமிட்ட நிலையில் அவருக்கு இலங்கை வர விசா வழங்கப்பட மாட்டாது என இலங்கை வெளி விவகார அமைச்சக செய்தித் தொடர்பாளர் ஒருவர் கொழும்பு ஊடகத்துக்கு அளித்த செய்தியில் தெரிவித்துள்ளார். இலங்கைக்கு விஜயம் செய்யுமாறு மஹாபோதி அமைப்பின் இலங்கை கிளைத் தலைவர் பானகல உபதிஸ்ஸ தேரர் தலாய் லாமாவுக்கு அழைப்பு விடுத்திருந்தார். இருப்பினும், தலாய் லாமாவுக்கு விசா வழங்குவது சீனாவுடனான நட்புறவில் விரிசலை ஏற்படுத்தலாம் என இலங்கை கருதுவதால், இலங்கை அரசு தலாய் லாமாவுக்கு விசா வழங்காது என வெளி விவகார அமைச்சக செய்தித் தொடர்பாளர் தெரிவித்துள்ளார். ஆயினும், மியன்மரில் பெரும் போராட்டங்களில் ஈடுபட்ட புத்த மத துறவியான விராது என்ற பிக்குவுக்கு இலங்கை வர ராஜபட்ச அரசு அனுமதி வழங்கியிருந்தது. தலாய் லாமா தரப்பு இதனைசுட்டிக் காட்டி விசா பெற முயற்சிக்கலாம் எனத் தெரிகிறது.