ஈரோடு மாவட்டம் நம்பியூரில் தமிழக பள்ளிக்கல்வித்துறை அமைச்சர் கே.ஏ.செங்கோட்டையன் செய்தியாளர்களைச் சந்தித்தார்.
அப்போது அவர், ”தமிழகத்தில் 10- ஆம் வகுப்பு பொதுத்தேர்வு நடத்துவதற்கான பணிகள் முழு வீச்சில் நடந்து வருகிறது. பொதுத்தேர்வு எழுத உள்ள மாணவ-மாணவிகளுக்கு 18- ஆம் தேதிக்குப் பிறகு ‘ஹால் டிக்கெட்’ வழங்கப்படும்.
10- ஆம் வகுப்பு பொதுத்தேர்வில் மாணவர்களை ஒருங்கிணைக்கும் பணியில் அந்தந்த மாவட்ட முதன்மைக் கல்வி அதிகாரிகள், மாவட்ட கலெக்டருடன் இணைந்து பணிகளை மேற்கொள்வார்கள்.
தேர்வை எழுத வரும் மாணவ-மாணவிகளுக்குத் தேவையான பஸ் வசதிகள் செய்து கொடுக்கப்படும். தேர்வு எழுதும் மாணவர்களுக்கு முகக்கவசங்கள் வழங்கப்படும்.மேலும், தனிமைப்படுத்தப்பட்ட பகுதியில் இருந்து வரும் மாணவர்களுக்கு தனி வகுப்பறைகள் ஒதுக்கப்பட்டு தேர்வு எழுத அனுமதிக்கப்படுவார்கள்.
ஜாக்டோ-ஜியோ அமைப்பின் சார்பில் பிளஸ்-2 விடைத்தாள்களைத் திருத்தும் பணியைப் புறக்கணிப்பதாகக் கூறி இருப்பது, அது அவர்களது விருப்பம். அதற்கேற்ப அரசு எடுக்கும் நடவடிக்கைகளைப் பொறுத்திருந்து பார்க்கவும்” என்றார்.
