மதுரையில் பிரபல சினிமா நடிகர் சூரியின் அண்ணன் மகள் திருமண நிகழ்ச்சியில் 10 பவுன் தங்க நகைகள் திருட்டு – சிசிடிவி காட்சி கொண்டு போலீசார் விசாரணை.
மதுரை சிந்தாமணி பைபாஸ் ரோட்டில் வேலம்மாள் மருத்துவமனைக்கு சொந்தமான திருமண மண்டபம் உள்ளது. இங்கு கடந்த 9-ம் தேதி நகைச்சுவை நடிகர் சூரியின் உறவினர் இல்ல திருமணம் நடந்தது.
இதற்காக நடிகர் சூரி உள்பட திரையுலக பிரபலங்கள் பலர் வந்திருந்தனர். இவ்விழாவில் நடிகர் சிவகார்த்திகேயனும் கலந்து கொண்டார். அப்போது யாரோ மர்ம நபர்கள் மணமகள் அறைக்குள் புகுந்து அங்கிருந்த 5 பவுன் கவர்னர் மாலை, 3 பவுன் தங்க நெக்லஸ், 2 பவுன் பிரேஸ்லெட் ஆகியவற்றை திருடி சென்றுவிட்டனர்.
இது தொடர்பாக திருமண மண்டப மேலாளர் சூரியபிரகாஷ் (வயது 47) என்பவர் கீரைத்துறை குற்றப்புலனாய்வு பிரிவு போலீசில் புகார் செய்தார். இதனடிப்படையில் போலீஸ் இன்ஸ்பெக்டர் கணேசன் வழக்கு பதிவு செய்து, திருமண மண்டபத்தில் பொருத்தப்பட்டுள்ள சிசிடிவி கேமரா காட்சிகள் கொண்டு விசாரணை நடத்தி வருகிறார்.