சிகிச்சை முடிந்து தில்லி புறப்பட்டார் கேஜ்ரிவால்

பெங்களூரு: உடல் நலக் குறைவு காரணமாக சிகிச்சை எடுத்துக்கொள்ள பெங்களூரு வந்திருந்த தில்லி முதல்வர் அரவிந்த் கேஜ்ரிவால், சிகிச்சை நிறைவடைந்ததைத் தொடர்ந்து தில்லி புறப்பட்டுச் சென்றார். அவருக்கு சர்க்கரை அளவு கட்டுக்குள் உள்ளது. தொடர் இருமலும் குணமானதாக மருத்துவர்கள் தெரிவித்தனர். சர்க்கரை நோய் மற்றும் தொடர் இருமல் காரணமாக தில்லி முதல்வர் அரவிந்த் கேஜ்ரிவால் சிரமப்பட்டு வந்தார். பின்னர், மருத்துவ சிகிச்சை பெறுவதற்காக அவர் கடந்த 5-ந்தேதி தில்லியில் இருந்து பெங்களூரு வந்தார். அங்கே ஜிண்டால் இயற்கை மருத்துவமனையில் சிகிச்சை பெற்று வந்தார். அவருக்கு இயற்கை மருத்துவ சிகிச்சைகள் அளிக்கப்பட்டன. யோகா, சுவாச பயிற்சி, கட்டுப்பாடான உணவு வகைகள், மூலிகை சாறு என இயற்கை முறையில் 12 நாட்கள் தங்கி சிகிச்சை பெற்றார். அவருடைய உடல்நலம் சீரானதை அடுத்து நேற்று பிற்பகல் 3 மணியளவில் கார் மூலம் கெம்பேகவுடா சர்வதேச விமான நிலையத்துக்குச் சென்று அங்கிருந்து விமானம் மூலம் தில்லி புறப்பட்டு சென்றார்.