துப்பாக்கிச் சூடு சம்பவம்: மனித உரிமை மீறல் இல்லை என்கிறார் ஆந்திர அமைச்சர்

  ஆந்திராவின் சித்தூர் மாவட்டம் ஸ்ரீவாரிமெட்டு வனப்பகுதியில் உள்ள சீநிவாசமங்காபுரத்தில் இன்று காலை செம்மரக் கடத்தல் தடுப்புப் பிரிவு போலீசார் நடத்திய துப்பாக்கிச் சூட்டில், தமிழக தொழிலாளர்கள் 12 பேர் உட்பட 20 பேர் உயிரிழந்தனர். காயமடைந்த பலர் மருத்துவமனையில் சிகிச்சை பெற்று வருகின்றனர். இந்நிலையில், இந்தச் சம்பவம் குறித்து விசாரணை நடத்த ஆந்திர அரசு உத்தரவிட்டுள்ளது. இது குறித்து கருத்து தெரிவித்த ஆந்திரா அமைச்சர் சின்னராஜப்பா, இச்சம்பவத்தில் மனித உரிமை மீறல் எதுவும் இல்லை. செம்மரக் கடத்தல்காரர்களும் தொழிலாளர்களும் மரங்களை வெட்டி கடத்த முயன்றபோது நடவடிக்கை எடுக்கப்பட்டுள்ளது என்று கூறியுள்ளார்.