புது தில்லி:

பதான்கோட் தாக்குதல் சம்பவம் குறித்த விசாரணைக்கு பாகிஸ்தான் தனது முழு ஒத்துழைப்பையும் இந்தியாவுக்கு அளிக்கும் என்று பாகிஸ்தான் பிரதமர் நவாஸ் ஷெரிப், இந்தியப் பிரதமர் நரேந்திர மோடியை தொலைபேசியில் தொடர்பு கொண்டு பேசியபோது கூறியுள்ளார்.

இலங்கைக்கு அரசு முறைப் பயணமாக சென்றுள்ள பாகிஸ்தான் பிரதமர் நவாஸ் ஷெரிப், இலங்கையில் இருந்து பிரதமர் மோடியை தொலைபேசியில் தொடர்பு கொண்டு பேசினார். அப்போது, பதான்கோட் தாக்குதல் சம்பவத்துக்கு கண்டனம் தெரிவித்துள்ள நவாஸ் ஷெரிப், பயங்கரவாதத்துக்கு எதிரான போரில், இந்தியாவுடன் பாகிஸ்தான் துணை நிற்கும் என்று கூறியுள்ளார். பதான்கோட் தாக்குதல் குறித்து மோடியும், நவாஸ் ஷெரிப்பிடம் தனது கவலையைப் பகிர்ந்து கொண்டார்.

புது தில்லி:

தில்லி கிரிக்கெட் சங்கத்தின் தலைவர் பதவி வகித்தபோது, மத்திய அமைச்சர் அருண் ஜெட்லி ஊழல் செய்ததாக மாநில முதல்வர் அரவிந்த் கேஜ்ரிவால் குற்றம்சாட்டினார். இது ஆதாரமற்ற குற்றச்சாட்டு என கூறி, கேஜ்ரிவால் மீது அருண் ஜெட்லி அவதூறு வழக்கு தொடர்ந்துள்ளார்.

இந்த வழக்கு விசாரணையின்போது, நேற்று தில்லி மெட்ரோபாலிட்டன் மாஜிஸ்திரேட்டு நீதிமன்றத்தில், மாஜிஸ்திரேட்டு சஞ்சய் கனக்வால் முன்னிலையில் அருண் ஜேட்லி ஆஜராகி சுமார் 70 நிமிடங்களுக்கு தனது வாக்குமூலத்தைப் பதிவு செய்தார். அப்போது அவர், ‘‘தில்லி கிரிக்கெட் சங்கத்தின் தலைவர் பதவி வகித்தபோது நான் யாரிடம் இருந்தும் பணம் பெற்றதில்லை. தன்னுடன் பணியாற்றும் குறிப்பிட்ட ஓர் அதிகாரி மீதான சி.பி.ஐ. விசாரணையில் இருந்து மக்களின் கவனத்தை திசை திருப்பவே கேஜ்ரிவால் மற்றும் அவரது ஆதரவாளர்கள் என் மீது தவறான ஊழல் குற்றச்சாட்டு சுமத்தியுள்ளனர். எனது பதவிக் காலத்தில் பெரோஸ்ஷா கோட்லா கிரிக்கெட் மைதானம் கட்டப்பட்டபோது நான் பணம் பெற்றதாக கேஜ்ரிவால் கூறியது தவறானது. அந்தப் பணியை மேற்பார்வையிட ஒரு குழு அமைக்கப்பட்டிருந்தது. நான் அதில் உறுப்பினர் இல்லை’’ என்று அருண் ஜேட்லி கூறினார்.

சென்னை:
இன்று சர்வதேச வேட்டி தினம் என்று கொண்டாடப் படுவதை முன்னிட்டு, தமிழர் பாரம்பரிய உடையான வேட்டியை அனைவரும் அணிந்து வரவேண்டும் என்று பல தரப்பிலும் வேண்டுகோள்கள் வந்திருக்கின்றன.

இதுகுறித்து, சென்னை தலைமைச் செயலக சங்க தலைவர் கணேசன் கூறும்போது, தலைமைச் செயலகத்தில் சுமார் 2,500 ஆண்கள் பணியாற்றுகிறார்கள். வேட்டி தினத்தை யொட்டி இன்று ஒருநாள் மட்டும் அனைத்து ஆண்களும் வேட்டி அணிந்து வர வேண்டும் என்று வேண்டுகோள் விடுக்கப்பட்டுள்ளது என்றார்

புதிய நீதிக்கட்சித் தலைவர் ஏ.சி.சண்முகம் வெளியிட்டுள்ள அறிக்கையில், தமிழர்களின் பாரம்பரியம் மிக்க உடையான வேட்டி அணிவதை, ஜனவரி 6-ந் தேதி சர்வதேச வேட்டி தினமாக யுனஸ்கோ அமைப்பு அறிவித்து, உலக அளவில் கொண்டாடப்பட்டு வருகிறது. தமிழர்களின் உடையான வேட்டியை கட்ட வேண்டும் என்பதற்காக ஒரு விழா நடத்துவது என்பது மிகவும் பெருமைக்குரிய விஷயம் ஆகும். அந்நிய நாட்டவர்கள், நம் தேசத்தின் தொன்மையை கேள்வியுற்று, அவற்றை காண பல ஆயிரக்கணக்கான மைல் தொலைவில் உள்ள நாடுகளில் இருந்து சுற்றுலா பயணிகளாக தினமும் ஏராளமானோர் வந்த வண்ணம் உள்ளனர். அவர்கள் நம் கலாசார பழக்க வழக்கங்களால் கவர்ந்து இழுக்கப்பட்டு நம்மை போல் வேட்டி, சேலை ஆகியவற்றை அணிந்து மகிழ்கிறார்கள். ஆனால், நம்முடைய பாரம்பரியத்தை நாம் முற்றிலும் மறந்து கொண்டு இருக்கிறோம்.

எனவே, நாம் நம்முடைய அடையாளங்களை தொலைத்துவிட வில்லை என்பதை உணர்த்தும் விதமாக சர்வதேச வேட்டி தினத்தன்று, முதியோர், இளைஞர் என்று வேறுபாடு இல்லாமல் அனைவரும் நமது பாரம்பரிய உடையான வேட்டியை உடுத்த வேண்டும் என்று அனைவரையும் கேட்டுக் கொள்கிறேன்.. என்று கூறியுள்ளார்.

சென்னை, ஜன.6-

சென்னை அரசு பொது மருத்துவமனையில் தீ விபத்து குறித்து தே.மு.தி.க. தலைவர் விஜயகாந்த் வெளியிட்டுள்ள அறிக்கை:

சென்னை ராஜூவ்காந்தி அரசு பொது மருத்துவமனையின் தீவிர சிகிச்சை பிரிவில் ஏற்பட்ட தீவிபத்தால் யாரும் இறக்கவில்லை என்றும், எந்தவித பாதிப்பும் யாருக்கும் ஏற்படவில்லை என்றும் கூறியிருப்பது பலத்த சந்தேகத்தை ஏற்படுத்தி உள்ளது.

மருத்துவமனையில் சிகிச்சைக்காக அனுமதிக்கப்பட்டிருந்த திண்டிவனத்தை சேர்ந்த பாண்டுரங்கன், குன்றத்தூரை சேர்ந்த மண்ணம்மாள், ஜோலார்பேட்டையை சேர்ந்த ராஜா ஆகிய மூவரும் தீவிபத்தினால்தான் மூச்சுத்திணறல் ஏற்பட்டு இறந்துள்ளதாக அவர்களது குடும்பத்தினரும், உறவினர்களும் குற்றம் சாட்டி, இறந்தவர்களின் உடலை வாங்க மறுத்துள்ளனர். ஆனால் அரசு அதை மூடிமறைக்க முயற்சி செய்கிறது.

கடந்த ஆறு மாதத்திற்கு முன்புகூட இதே பிரிவில் தீவிபத்து ஏற்பட்டது குறிப்பிடத்தக்கது. முதலமைச்சரும், சுகாதாரத்துறை அமைச்சரும், அரசு மருத்துவமனை நிர்வாகமும்தான் இந்த தீவிபத்திற்கும், உயிரிழப்பிற்கும் முழுப்பொறுப்பையும் ஏற்கவேண்டும்.

மழை வெள்ள பாதிப்பின்போது சென்னை தனியார் மருத்துவமனையில் மின்தடையால் சுமார் 20-க்கும் மேற்பட்டோர் உயிரிழந்ததை இந்த அரசு மூடிமறைத்தது. அதுபோன்று இதையும் மறைக்காமல், அரசு மருத்துவமனையில் தீவிபத்தால் உயிரிழந்தவர்கள் ஏழை, எளிய மக்கள். எனவே உயிரிழந்தவர்களின் குடும்பங்களுக்கு உரிய இழப்பீடு வழங்கியும், அதில் கவனக்குறைவாக செயல்பட்டவர்களின் மீது உரிய நடவடிக்கையும் எடுக்கவேண்டுமென கேட்டுக்கொள்கிறேன்.

புது தில்லி:

பருப்பு வகைகளின் விலை தொடர்ந்து அதிகரிக்காமல் இருக்கும் வகையில் அடுத்த மாதம் வெளிச்சந்தையில் விநியோகம் செய்யும் திட்டத்துடன் 5,000 டன் துவரம் பருப்பை இறக்குமதி செய்ய மத்திய அரசு முடிவு செய்துள்ளது. இதற்கானஒப்பந்தப்புள்ளியை மத்திய அரசு நிறுவனமான எம்எம்டிசி வெளியிட்டுள்ளது. எம்எம்டிசி நிறுவனம் கடந்த ஆண்டில் 5,000 டன் துவரம் பருப்பை இறக்குமதி செய்தது. ஆனால், உளுந்தம் பருப்பு தொடர்பாக அந்நிறுவனம் விடுத்த ஒப்பந்தப் புள்ளிக்கு போதிய வரவேற்பில்லை.

இந்நிலையில், விலை உயர்வைக் கட்டுப்படுத்தும் வகையில் துவரம் பருப்பை இறக்கு மதி செய்வது குறித்து மத்திய அரசு வட்டாரத் தகவல்கள் கூறியபோது…

2015ஆம் ஆண்டில் பருப்பு வகைகளின் உற்பத்தி குறைவாக இருந்ததால், பருப்பு வகைகளின் விலை பலமடங்கு அதிகரித்தது. இதை குறைப்பதற்கு, பருப்பு பதுக்கல்காரர்களின் கிடங்குகளில் சோதனையும், வெளிநாடுகளில் இருந்து பருப்பு வகைகள் இறக்குமதியும் செய்யப்பட்டன. இருப்பினும், துவரம் பருப்பு விலை கிலோவுக்கு தற்போது ரூ.180ஆக உள்ளது.

இந்நிலையில், பருப்பு உற்பத்தி எதிர்பார்த்த அளவுக்கு இல்லாததால், 2016ஆம் ஆண்டிலும் பருப்பு வகைகளின் விலை அதிகரிக்கக்கூடும் என்று மத்திய அரசு கருதுகிறது. இதையடுத்து, அடுத்த மாதம் உள்நாட்டு சந்தையில் துவரம் பருப்பை விநியோகத்தில் விடும் திட்டத்துடன் 5,000 டன் துவரம் பருப்பை இறக்குமதி செய்ய மத்திய அரசு முடிவு செய்துள்ளது. இதற்கான ஒப்பந்தப்புள்ளியை மத்திய அரசு நிறுவனமான எம்எம்டிசி வெளியிட்டுள்ளது.

இதன்படி, மியான்மர், மலாவி, மொசாம்பிக் உள்ளிட்ட நாடுகளிடம் இருந்து ஒப்பந்தப்புள்ளி கோரப்பட்டுள்ளது என்று மத்திய அரசு வட்டாரங்கள் தெரிவித்தன. எம்எம்டிசி நிறுவன அதிகாரிகள் தரப்பு கூறுகையில், “குறைந்தப்பட்சம் 2,000 டன் துவரம் பருப்பு என்ற அடிப்படையில் ஒப்பந்தப்புள்ளி விடப்பட்டுள்ளது. அதையடுத்து இறக்குமதி செய்யப்படும் பருப்பு வகைகள், மும்பையில் உள்ள ஜவாஹர்லால் நேரு துறைமுகத்துக்கு பிப்ரவரி மாதம் 7ஆம் தேதியும், சென்னை துறைமுகத்துக்கு மார்ச் மாதம் 15ஆம் தேதியும் வந்தடையும்’ என்றனர்.