ரமணா , கஜினி , துப்பாக்கி என மாஸ் ஹிட்ஸ் கொடுத்த ஏ.ஆர்.முருகதாஸ் அதற்கு மேல் மாஸ் ஹிட்ஸை கையில் வைத்திருக்கும் சூப்பர் ஸ்டாருடன் முதன்முதலாக இணைந்திருக்கும் படம் தர்பார் .
இரண்டு கமர்ஸியல் ஜாம்பவான்கள் இணைந்ததால் எதிர்பார்ப்புக்கு பஞ்சமில்லை . அதை நிறைவேற்றினார்களா ? அலசலாம் …
மும்பையில் கேங்க்ஸ்டகளை தொடர்ந்து என்கவுன்டர் செய்கிறார் கமிஷனர் ஆதித்யா அருணாச்சலம் ( ரஜினி ) . அவர் ஏன் டில்லியிலிருந்து மும்பைக்கு வந்தார் ? அவரின் வெறித்தனத்துக்கு என்ன காரணம் ?
அவரின் ஒரே மகள் வள்ளிக்கு ( நிவேதா தாமஸ் ) நடந்தது என்ன ? வேர்ல்ட் கேங்க் லீடர் ஹரி சோப்ராவை ( சுனில் ஷெட்டி ) அவர் அழித்தாரா ? என எல்லா கேள்விகளுக்கும் விடையை முதல்பாதியில் எக்ஸ்பிரஸ் வேகத்திலும் , இரண்டாம் பாதியில் பேசஞ்சர் வேகத்திலும் சொல்லியிருப்பதே தர்பார் …
70 வயதிலும் அதே வேகம் , அதே ஸ்டைல் , அதே குறும்பு என படம் முழுவதும் ரஜினி சும்மா கிழித்திருக்கிறார் . நான் தான் அடுத்த சூப்பர் ஸ்டார் என்று வருபவர்களுக்கு ” கண்ணா இங்கே பார் ” என்று தனக்கு ரிட்டையர்மெண்ட் இல்லையென நிரூபித்திருக்கிறார் .
யோகி பாபுவின் நக்கல்களுக்கு ” இரு உன்னை வச்சுக்கிறேன் ” என வித்தியாசமான மாடுலேஷன்களில் சொல்வதெல்லாம் சூப்பருக்கு மட்டுமே கை வந்த கலை.ஆக்சன் அதிரடிகளை தாண்டி மகளுக்காக அவர் உருகும் காட்சிகள் படத்தின் ஹைலைட் .
இப்படியே போச்சுன்னா மனுஷன் 2026 க்கு கூட அரசியலுக்கு வருவது அதிசியம் தான் போல ?! …
நயன்தாராவுக்கு கஜினி யிலாவது தனியாக ஒரு அயிட்டம் சாங்க் இருந்தது . ஆனால் இதில் யோகி பாபு அளவுக்கு கூட அவருக்கு சீன்கள் இல்லாதது நயன் பேரவை ரசிகர்களுக்கு பெரிய ஏமாற்றமே !
இமாலய சூப்பர் ஸ்டாருக்கு முன்னாலும் தன் உருக்கமான நடிப்பால் கவர வைக்கிறார் நிவேதா தாமஸ் . ஐ.சி.யு வில் படுத்திருக்கும் அப்பாவுக்கு அருகில் கட்டிக்கொண்டு படுக்கும் காட்சி கல் மனதையும் கரைய வைத்துவிடும் …
முதல் பாதியில் சீரியசான என்கவுன்டர்களுக்கு மத்தியில் தன் கவுண்டர்களால் நன்றாகவே கிச்சு கிச்சு மூட்டுகிறார் யோகி பாபு . இடைவேளைக்கு பின்னரும் இவரை யூஸ் செய்திருக்கலாமோ என்று தோன்றுகிறது .
மெய்ன் வில்லன் சுனில் ஷெட்டி ஆரம்பத்தில் கவனிக்க வைத்து பின் வழக்கம் போல ஹீரோ கையால் அடி வாங்கி சாகிறார் .
அனிருத் அருணாச்சலம் பட பிஜிஎம் மை புது பாணியில் போட்டு மிரட்டுகிறார் . மற்றபடி ” சும்மா கிழி ” பாடல் தவிர அவர் பெரிதாக ஒன்றும் கிழிக்கவில்லை. பீட்டர் ஹெய்ன் சண்டைக்காட்சிகள் அருமையாக படமாக்கப்பட்டிருக்கின்றன…
சூப்பர் ஸ்டார் படம் , பொங்கல் விடுமுறை , ஹீரோ – இயக்குனர் இருவருக்குமே முந்தைய படங்களின் வெற்றி இவையெல்லாமே படத்தின் கமர்ஸியல் சக்ஸசுக்கு பெரிய கை கொடுக்கும் . ரஜினி இந்த வயதிலும் ஃப்ரெஸ்ஸாக , துடிப்பாக இருக்கிறார் ஆனால் அதே போல கதையும் , திரைக்கதையும் இல்லாதது துரதிருஷ்டமே .
மாஸ் ஹீரோ படங்களில் லாஜிக் பார்க்கக்கூடாது தான் . அதுக்காக இப்படியா ? ரஜினி நிஜத்தில் தான் சூப்பர் ஸ்டார் ஆனால் கதைப்படி அவர் கமிஷனர் தானே தவிர கடவுள் இல்லையென்பதை இயக்குனர் ஏனோ மறந்து விட்டார் .
இரண்டாம் பாதியை ஹீரோ – வில்லன் விளையாட்டாக சுவாரசியமாக கொண்டு செல்லாமல் வெறும் சென்டிமென்டை மட்டும் நம்பியது சறுக்கல் …
ரஜினி – நயன் உறவுக்குள்ளான குழப்பம் , க்ளைமேக்சில் துப்பாக்கியை தூக்கிப்போட்டு விட்டு சவடால் பேசி அடி வாங்கும் வில்லனின் டெம்ப்லேட் காட்சிகள் , ஹீரோ தான் ஜெயிப்பான் என்று எல்லோருக்கும் தெரியும் ஆனால் அதில் எந்தவிதமான சேலஞ்சும் இல்லாமல் போகும் ஃப்ளாட்டான ஸ்க்ரீன்ப்ளே , கபாலி , பேட்ட என்று ரஜினியின் சமீபத்திய படங்களையே நினைவுபடுத்தும் சீன்கள் இவையெல்லாம் தாறுமாறாக இருந்திருக்க வேண்டிய தர்பாரை தடம் மாற்றுகின்றன …
ரத்தம் , சதை , நாடி நரம்பெல்லாம் ரஜினி வெறி ஊறிப்போன ரசிகர்களுக்கும் , பொங்கலுக்கு குடும்பத்தோட ஏதோ ஒரு படத்துக்கு போனும் என்று நினைப்பவர்களுக்கும் படம் நிச்சயம் பிடிக்கும் . ஹீரோவையும் தாண்டி படமே நல்ல அனுபவமாக இருக்க வேண்டுமென நினைப்பவர்களுக்கு
( பாட்சா , படையப்பா ) ரஜினியே படத்தில் ” எம்ஜிஆர் ஏன் மூணு தடவ அடி வாங்குறார் தெரியுமா ” என்று சொல்வது போல ” நாம ரஜினிக்காக மூணு அடிக்கு மேலயே வாங்குறோமோ ?! என்றே தோன்றும்
ஆனால் ” நம்புறவங்களுக்கு வயசு வெறும் நம்பர் ” என்று டயலாக் மட்டும் பேசாமல் நிரூபித்தே காட்டியிருக்கும் சூப்பர் ஸ்டாருக்காக அதை அட்ஜெஸ்ட் செய்து கொள்ளலாம் …
( டிஸ்கி : நான் ரஜினி யின் அரசியல் வருகையை வரவேற்கிறேன் , நடிகராகவும் மதிக்கிறேன்
ஆனால் ஒரு விமர்சகனாக அவர் நடிக்கும் படம் எப்படி இருந்தாலும் பாராட்ட வேண்டுமென்பதில்லை .
இது புரியாதவர்கள் சுற்றும் கம்புக்கு நிர்வாகம் பொறுப்பல்ல )
ரேட்டிங் : 2.5 * / 5 * ஸ்கோர் கார்ட் : 41
- அனந்து (வாங்க ப்ளாக்கலாம் அனந்து)
