சென்னை: சென்னையில், தலைமறைவாக இருந்த திருட்டு விசிடி விற்றவர் கைது கைது செய்யப்பட்டார். சென்னை மண்ணடியைச் சேர்ந்தவர் அகமது சுலைமான்((38). இவர், திருட்டு விசிடிக்கள் தயாரித்து விற்று வந்துள்ளார். தகவல் அறிந்து இவரை போலீஸார் தேடினார். தலைமறைவாக இருந்த அகமது சுலைமானை போலீஸார் ஞாயிற்றுக்கிழமை கைது செய்தனர். அவரிடம் இருந்து 2,500 திருட்டு சிடிகள் பறிமுதல் செய்யப்பட்டன.

சென்னை: சென்னையில் திருட்டு விசிடி தயாரித்து விற்றவரை போலீஸார் குண்டர் தடுப்புச் சட்டத்தில் கைது செய்தனர். இதுகுறித்து போலீஸார் தெரிவித்தது…. சென்னை மண்ணடி பகுதியைச் சேர்ந்த பைசல் ரகுமான் (32) வாடகைக்கு வீடு எடுத்து, ரெகார்ட் செய்யும் தொழில்நுட்ப இயந்திரங்கள் மூலம் புதிய திரைப்படங்களின் விசிடிக்களை தயாரித்து விற்று வந்துள்ளார். தகவல் அறிந்து சென்ற போலீஸார் கடந்த மாதம் 28-ஆம் தேதி பைசல் ரகுமானை கைது செய்தனர். அவரிடம் இருந்து 2 பதிவு இயந்திரங்களும், 10,725 திருட்டு விசிடிக்களும் பறிமுதல் செய்யப்பட்டன. இந்நிலையில் பைசல் ரகுமானை குண்டர் சட்டத்தில் கைது செய்ய சென்னை காவல்துறை ஆணையர் எஸ். ஜார்ஜ் உத்தரவிட்டார். இதையடுத்து, அவர் குண்டர் சட்டத்தில் சிறையில் அடைக்கப்பட்டார்.

திருச்சி: திருச்சி சுங்கத்துறை அலுவலகத்தில் நள்ளிரவு 14.5 கிலோ தங்க நகைகள் மாயமானது அதிர்ச்சியை ஏற்படுத்தியுள்ளது. திருச்சி வில்லியம்ஸ் சாலையில் உள்ள மத்திய கலால்-சுங்க ஆணையர் அலுவலகத்தில் பாதுகாப்புப் பெட்டகத்தில் வைக்கப்பட்டிருந்த 14.5 கிலோ தங்கம் மாயமானது சனிக்கிழமை நள்ளிரவு கண்டறியப்பட்டது. இதை அடுத்து, இந்த வழக்கை சிபிஐ விசாரணைக்கு எடுத்துக் கொண்டது. வெளிநாடுகளில் இருந்து கடத்தி வரப் படும் தங்கம், விலை உயர்ந்த பொருள்கள் அனைத்தும் திருச்சி வில்லியம்ஸ் சாலையில் உள்ள மத்திய கலால்-சுங்க ஆணையர் அலுவலகத்தில் உள்ள பாதுகாப்புப் பெட்டகத்தில் வைக்கப்படும். பறிமுதல் செய்யப்படும் தங்கத்தின் மதிப்பு ரூ. 1 கோடிக்கு மேல் இருந்தால் அதைக் கடத்தி வரும் நபர்கள் கைது செய்யப்பட்டு, வழக்கு முடியும் வரை அந்த தங்கம் பாதுகாப்புப் பெட்டகத்தில் வைக்கப்படும். அவ்வகையில், சில மாதங்களுக்கு முன்னர் முத்துப்பேட்டையில் காரில் ஒருவர் கடத்தி வந்த 22 கிலோ தங்கக் கட்டிகள் பறிமுதல் செய்யப்பட்டு, பாதுகாப்புப் பெட்டகத்தில் வைக்கப்பட்டன. இதுவரை 75 கிலோ தங்கம் வரை பாதுகாப்புப் பெட்டகத்தில் வைக்கப்பட்டிருக்கிறதாம். இந்நிலையில், வெள்ளிக்கிழமை நள்ளிரவு சிங்கப்பூரில் இருந்து டைகர் ஏர்வேஸ் விமானத்தில் வந்த நவாஸ்கான் என்பவர் கொண்டு வந்த 7 கிலோ கடத்தல் தங்கம் பறிமுதல் செய்யப்பட்டு, அதை சுங்கத் துறை ஆணையர் கே.சி. ஜானி சனிக்கிழமை நள்ளிரவு பாதுகாப்புப் பெட்டகத்தில் வைக்கச் சென்றார். அப்போது, ஏற்கெனவே அதில் வைக்கப்பட்டிருந்த 75 கிலோ தங்கத்தில் 14.5 கிலோ தங்கம் திருடப்பட்டிருப்பது அவருக்குத் தெரிந்தது. இதையடுத்து அவர், சனிக்கிழமை நள்ளிரவு 12.30க்கு திருச்சி கன்டோன்மென்ட் குற்றப்பிரிவு காவல் நிலையத்தில் புகார் செய்தார். அவரது புகாரை அடுத்து காவல் துறை அதிகாரிகள் ஞாயிற்றுக்கிழமை அங்கே சென்று அனைவரிடமும் விசாரணை நடத்தினர். மேலும், சுங்கத் துறை அலுவலகத்தில் வெளியே உள்ள கண்காணிப்பு கேமராவில் பதிவாகியுள்ள காட்சிகளை ஆய்வு செய்தனர். திருடப்பட்டுள்ள தங்கத்தின் மதிப்பு சுமார் 3.50 கோடி ரூபாய் என புகாரில் தெரிவிக்கப்பட்டுள்ளது. பாதுகாப்பு பெட்டகம் உடைக்கப்படவில்லை என்பதால், அங்கே பணிபுரியும் அதிகாரிகள் மீது சந்தேகம் ஏற்பட்டுள்ளதாகக் கூறப்படுகிறது. இதை அடுத்து இந்த வழக்கு சிபிஐ-க்கு மாற்றப்பட்டுள்ளது.

கிருஷ்ணகிரி: கிருஷ்ணகிரி மாவட்டம், ஊத்தங்கரையை அடுத்துள்ள சிங்காரப்பேட்டை அருகே சாலையோரத்தில் இருந்த ஆலமரத்தின் மீது கார் மோதி விபத்துக்குள்ளானது. இந்த விபத்தில் காரில் பயணம் செய்த 4 பெண்கள், ஒரு சிறுவன், ஒரு சிறுமி என ஒரே குடும்பத்தைச் சேர்ந்த 7 பேர் உயிரிழந்தனர். வேலூர் மாவட்டம், ஆலங்காயம் பகுதி ஓமக்குப்பம் கிராமத்தைச் சேர்ந்த வில்சன் (50) அங்குள்ள வேளாண் கூட்டுறவு வங்கியில் காசாளராகப் பணிபுரிந்தார். இவரின் மனைவி ரெஜினாமேரி (42) ரெட்டிவலசை அரசுத் தொடக்கப் பள்ளியில் ஆசிரியையாகப் பணியிலிருந்தார். இவர்களின் மகன் ஜோயல் (9) நான்காம் வகுப்பும், மகள் ஜெனிதா (6) ஒன்றாம் வகுப்பும் படித்து வந்தனர். இவர்கள் நால்வருடன், வில்சனின் தாயார் நெட்டில்டா சுசிலாபாய் (70), மூத்த சகோதரி பிரேமகுமாரி (52), இளைய சகோதரி லில்லி ஜாய் மேரி (47) என 7 பேரும் ஓமக்குப்பத்தில் இருந்து திருவண்ணாமலை அருகேயுள்ள கீழ்பெண்ணாத்தூர் சர்ச் ஒன்றில் நடைபெற்ற பெயர் சூட்டு விழாவுக்காக ஞாயிற்றுக்கிழமை அதிகாலை காரில் சென்றனர். காரை சென்னை வில்லிவாக்கத்தைச் சேர்ந்த ஓட்டுநர் திலீப்குமார் (28) ஓட்டிச் சென்றார். அவர்கள் சென்ற கார், சிங்காரப்பேட்டை அருகேயுள்ள நாற்சாம்பட்டி என்ற இடத்தில் வந்தபோது, கட்டுப்பாட்டை இழந்து நிலைதடுமாறி சாலையோர ஆலமரத்தில் மோதியது. இதில் காரின் முன்பகுதி முழுமையாக சேதமடைந்தது. இந்த விபத்தில் காரில் பயணம் செய்த 7 பேரும் பலத்த காயமடைந்து சம்பவ இடத்திலேயே உயிரிழந்தனர். ஓட்டுநர் திலிப்குமார் பலத்த காயங்களுடன் ஊத்தங்கரை அரசு மருத்துவமனைக்கு கொண்டு செல்லப்பட்டார். பின்னர் அவர் தீவிர சிகிச்சைக்காக வேலூர் மருத்துவமனைக்கு அனுப்பப்பட்டார். விபத்து குறித்து சிங்காரப்பேட்டை போலீஸார் வழக்குப் பதிந்து விசாரணை நடத்தி வருகின்றனர்.