இஸ்லாமாபாத்: இலங்கை அதிபர் மைத்ரிபால சிறிசேன மூன்று நாள் அரசு முறைப் பயணமாக பாகிஸ்தான் தலைநகர் இஸ்லாமாபாத் சென்றுள்ளார். அவர் அந்நாட்டு பிரதமர் நவாஸ் ஷெரீபை சந்தித்துப் பேசியபோது, பேரிடர் மேலாண்மை, விளையாட்டு, கப்பல் போக்குவரத்து, போதைப் பொருள் தடுப்பு உள்ளிட்ட துறைகளில் இரு நாடுகளுக்கும் இடையே 6 முக்கிய ஒப்பந்தங்கள் கையெழுத்தாயின. இதன் பின்னர் இருவரும் இணைந்து செய்தியாளர்களிடம் பேசினர். அப்போது, இலங்கை, பாகிஸ்தான் இடையிலான பொருளாதார, வர்த்தக உறவை மேம்படுத்த ஆக்கபூர்வமான நடவடிக்கைகள் எடுக்கப்பட்டு வருகின்றன என்று சிறீசேன கூறினார்.

விருப்பப் படாத ஒரு திருமண பந்தத்தை எப்படி முடிவுக்குக் கொண்டு வருவது? அதுவும் குறிப்பாக உங்கள் விவாகரத்து கோப்புகளைப் பெறாமல் அடுத்தவர் தவிர்த்து வந்தால்..? இதற்கும் வழிகாட்டியது ஃபேஸ்புக்! அமெரிக்காவின் மன்ஹட்டன் உச்ச நீதிமன்ற நீதிபதி மனது வைத்தது போல், உங்களுக்கும் யாராவது மனது வைத்தால்..! அமெரிக்காவைச் சேர்ந்த விக்டர் சேனா பிளட் சராகு. இவரது மனைவி லெனோரா பைடூ (26). இந்த தம்பதிகளுக்கு இடையே கருத்து வேறுபாடு காரணமாக மன்ஹாட்டன் உச்ச நீதிமன்றத்தில் விவாகரத்து கேட்டு மனு அளித்திருந்தனர். மேலும், விக்டர் சேனா தனது வீட்டை காலி செய்துவிட்டு வேறு இடத்திற்கு சென்று விட்டார். தன் கணவர் எங்கே வேலை செய்கிறார் என்று தெரியாத சூழலில், அவரது ‘பேஸ்புக்’ கணக்கு மூலம் சம்மன் அனுப்ப உச்ச நீதிமன்றத்தில் மனைவி பைடூ மனு அளித்தார். இந்த மனுவை உச்ச நீதிமன்ற நீதிபதி மேத்திவ் கூப்பர் ஏற்றுக் கொண்டார். அதை அடுத்து, பேஸ்புக்கில் நோட்டிபிகேஷனாக விக்டருக்கு நோட்டீச் அனுப்பப் பட்டது. ஒருவாரம் அதைத் தவிர்த்தார் விக்டர், ஆனால், மூன்றாவது வாரம் மூன்றாவது முறையாக வந்த நோட்டீஸை திறந்து பார்த்தார். அதன் மூலம் தன் விவாகரத்து தகவல்களை பரிமாறிக் கொள்ள வழி செய்யப்பட்டது. பின்னர் அந்தத் தம்பதிகளுக்கு உச்ச நீதிமன்றம் விவாகரத்து வழங்கியது. தன் கணவர் அல்லது துணை எங்கே இருக்கிறார் என்று தெரியாத நிலையில், அவரது விலாசம் அறியாத பட்சத்தில், அவர் நிரந்தர முகவரியில் இல்லாமலோ அல்லது வேலையில் இல்லாமலோ இருக்கும் பட்சத்தில், பேஸ்புக் கணக்கின் மூலம் அவரைத் தொடர்பு கொண்டு, சட்டப்படி, இவ்வாறு விவாகரத்து வழங்கி, நீதிபதி ஒரு முன்மாதிரியாக இருந்துள்ளார். [Image credit: Alamy] SOURCE: New York Daily News

கோலாலம்பூர்: மலேசியத் தலைநகரில் பயங்கரவாதத் தாக்குதல்களை நடத்தத் திட்டமிட்டார்கள் எனும் சந்தேகத்தில் 17 பேர் கைது செய்யப்பட்டுள்ளனர் என்று தேசிய காவல்துறைத் தலைவர் கூறியுள்ளார். கோலாலம்பூரில் தாக்குதல்களை நடத்தத் திட்டமிட்டிருந்த இவர்களில் இருவர் அண்மையில்தான் சிரியாவில் மோதல் நடக்கும் பகுதிகளில் இருந்து திரும்பியிருந்தனர் என தேசிய காவல் துறைத் தலைவர் காலித் அபு பக்கர் தெரிவித்துள்ளார். காவல் நிலையங்கள், ராணுவப் பாசறைகள் ஆகியவை அவர்களது திட்டமிட்ட இலக்குகளாக இருந்தன என்று மலேசிய உள்துறை அமைச்சர் அஹ்மத் ஜாகித் ஹமீது தெரிவித்துள்ளார். மலேசியாவில் பயங்கரவாதத்துக்கு எதிரான புதிய சட்ட வழிமுறைகள் குறித்த தீர்மானங்களை மலேசிய அரசு கடந்த வாரம் முன்வைத்தது. அதன் அடிப்படையில் பயங்கரவாதிகள் என சந்தேகிக்கப் படுபவகளை நீதிமன்றத்தின் முன் நிறுத்தாமல் காலவரம்பற்ற காவலில் வைக்க வழி செய்யப்பட்டுள்ளது. இருப்பினும், அரசு கொண்டுவந்துள்ள இந்தத் தீர்மானம், அடக்குமுறை உள்நோக்கம் கொண்டது என்று மனித உரிமை அமைப்புகளும், எதிர்கட்சிகளுக்கும் குறை கூறியுள்ளன.

மலேசிய விமானம் எம்எச் 370 மாயமாகி ஓர் ஆண்டுக்கும் மேல் ஆகிவிட்ட நிலையில், இந்தியப் பெருங்கடலில் அமைந்துள்ள மிகவும் குட்டித் தீவான குடா ஹுவதூ தீவுவாசிகள், அன்றைய தினம் மிகவும் தாழ்வாகப் பறந்த மிகப் பெரிய விமானம் ஒன்றைப் பார்த்ததாகக் கூறியுள்ளனர். கடந்த ஆண்டு மார்ச் 8ம் தேதி காணாமல் போன மலேசிய விமானம் எம்.எச்.370 குறித்து இதுவரை எந்தத் தகவலும் கிடைக்காத நிலையில், தேடுதல் வேட்டை தொடர்ந்து கொண்டிருக்கிறது. இந்நிலையில், இந்தியப் பெருங்கடல் தீவான குடா ஹுவதூ தீவுவாசிகள், அன்றைய தினம், மிகவும் தாழ்வாகப் பறந்த விமானத்தைப் பார்த்ததாக அருகில் உள்ள காவல்நிலையத்தில் கூறியுள்ளனர். இந்தத் தீவு மிகச் சிறிய தீவு. அந்த விமானத்தைப் பார்த்தது பற்றி அன்றைய தினம் தீவுவாசிகள் பேசிக் கொண்டனர். ஆனால், விமானம் மாயமான தகவல்கள் எதுவும் அவர்களுகு அப்போது தெரியவில்லை. பிறகுதான் விமானம் மாயமான தகவல் தெரிய வந்ததாம். அங்குள்ள உள்ளூர் இணைய்தளமான ஹவீருவுக்கு ஒருவர் அளித்த தகவலில், தாங்கள் கடல் விமானங்களைப் பார்த்திருப்பதாகவும், ஆனால், அவ்வளவு பெரிய விமானத்தை அதுவரை பார்த்ததில்லை என்றும் கூறியுள்ளார். மேலும், அந்த விமானத்தின் கதவுகளைக் கூட துல்லியமாகத் தாங்கள் பார்த்ததாக சிலர் கூறியுள்ளனர். ஒரு வேளை தாங்கள் பார்த்த அந்த விமானம்தான் மாயமான மலேசிய விமானமாக இருக்கலாம் என்று அவர்கள் கூறுகின்றனர். விமானம் பறந்து சென்ற சில நிமிடங்களில் பலத்த சத்தம் கேட்டதாகவும் அவர்கள் கூறியுள்ளனர். இந்நிலையில், அந்தத் தீவுக்கு செய்தித் தாள் ஊடகம் ஒன்று தங்கள் செய்தியாளர்களை அனுப்பி விரிவான தகவல்களைச் சேகரிக்கச் சொல்லியுள்ளதாம்.