புதுதில்லி: நிலக்கரி ஊழல் வழக்கில், அப்போது தொடர்பான அமைச்சகப் பொறுப்பில் இருந்த முன்னாள் பிரதமர் மன்மோகன் சிங்கை விசாரணைக்கு சிபிஐ அழைத்தது மிக மோசமான ஒன்று என்று கருத்து தெரிவித்துள்ளார் ராம் ஜேத்மலானி. பாஜக முன்னாள் தலைவரான ராம் ஜேத்மலானி, இது குறித்து கருத்து தெரிவித்த போது, ஒரு முன்னாள் பிரதமரை இவ்வாறு விசாரணைக்கு வருமாறு அழைப்பது மிக மோசமான ஒன்று. யாருமே இப்படி ஒரு முன்னாள் பிரதமர் அழைக்கப்படுவதை விரும்பமாட்டார்கள். அவர் தனது குற்றமின்மையை நிரூபிப்பார் என்று நான் நம்புகிறேன் என்று கூறியுள்ளார் ராம் ஜேத்மலானி.

  புது தில்லி: முன்னாள் மத்திய அமைச்சர் சசி தரூரீன் மனைவி சுனந்த புஷ்கர் மரணம் தொடர்பாக, பாகிஸ்தானைச் சேர்ந்த ஊடகவியலாளர் மெஹர் தராரும் விசாரணைக்கு உட்படுத்தப் படுவார் என்று தெரிகிறது. இந்த வழக்கை விசாரித்து வரும் சிறப்பு புலனாய்வுக் குழு, மெஹர் தராரையும் விசாரிக்கலாம் என்று கூறப்படுகிறது. சுனந்தா மர்மமான முறையில் மரணம் அடைவதற்கு முன்பாக, மெஹர் குறித்து சசி தரூரிடம் சண்டையிட்டார் என்பது விசாரணையில் தெரியவந்தது.

பெங்களூரு: 3 மகள் ஒரு மகன் உள்பட பெங்களூருவில் ஒரே குடும்பத்தைச் சேர்ந்த 6 பேர் தற்கொலை செய்து கொண்ட சம்பவம் அந்தப் பகுதியில் பெரும் சோகத்தை ஏற்படுத்தியுள்ளது. பெங்களூரு நகரபாவி எம்.பி.எம். லே அவுட் பகுதியில் வசித்தவர் தொலைபேசி ஊழியரான கங்கா ஹனுமய்யா (57) . இவரது மனைவி ஜெயலக்ஷ்மா (54 ). இத்தம்பதிக்கு 3 மகள்கள் மற்றும் ஒரு மகன். மூத்த மகள் ஹேமலதா (30) பொறியாளராகவும், இரண்டாவது மகள் விமலா (28) ரயில்வேயிலும் பணி புரிந்து வருகின்றனர். மகன் யாதிஷ் (26) வேலை தேடிக் கொண்டிருக்கிறார். கடைசி மகள் நேத்ராவதி (24) பொறியியல் கல்லூரி மாணவி. இந்நிலையில், இன்று அவர்களது வீட்டில் ஆள் நடமாட்டம் இன்றி அமைதியாக இருந்ததை அருகில் இருந்தவர்கள் கவனித்துள்ளனர். வீட்டில் திறந்திருந்த ஜன்னல் வழியே பார்த்த போது, ஒருவர் தூக்கில் தொங்குவது தெரிந்தது. உடனே போலீசாருக்கு அவர்கள் தகவல் தெரிவித்தனர். சம்பவ இடத்துக்கு விரைந்து வந்த போலீசார், வீட்டின் கதவைத் திறந்து பார்த்த போது, வீட்டில் உள்ள அனைவருமே தற்கொலை செய்து கொண்டது கண்டுபிடிக்கப் பட்டது. தொடர்ந்து சடலங்களை மீட்டு பிரேத பரிசோதனைக்காக மருத்துவமனைக்கு அனுப்பி வைத்த போலீசார், தற்கொலைக்கான காரணம் குறித்து விசாரித்து வருகின்றனர். ஒரே குடும்பத்தைச் சேர்ந்த 6 பேர் ஒரே நேரத்தில் தற்கொலை செய்து கொண்ட சம்பவம் அப்பகுதி மக்களிடையே சோகத்தை ஏற்படுத்தியுள்ளது.

புது தில்லி பாரதிய ஜனதாக் கட்சியின் உயர் பொறுப்பான தேசிய செயற்குழுவில் இருந்து நஜ்மா ஹெப்துல்லா, ஹேமமாலினி ஆகியோர் திடீரென நீக்கப்பட்டுள்ளனர். மேலும், ஷெய்னாவும் நீக்கப்பட்டுள்ளார். இவர் மகாராஷ்டிர பாஜக பொருளாளராகவும், செய்தித் தொடர்பாளராகவும் இருப்பவர். இவரும் தேசிய செயற்குழு உறுப்பினர் பொறுப்பில் இருந்து நீக்கப்பட்டுள்ளார்.

புது தில்லி:  மாநிலங்களவையில் எனக்கு எதிராக தீர்மானம் நிறவேற்றினால் மட்டும் போதாது; விசாரணையே இன்றி என்னை தூக்கில் போட எம்.பி.க்கள் முன்வரலாம் என்று மார்கண்டேய கட்ஜூ கேலியாகக் கூறியுள்ளார். ஓய்வுபெற்ற உச்ச நீதிமன்ற நீதிபதியும், இந்திய பிரஸ் கவுன்சிலின் முன்னாள் தலைவருமான மார்கண்டேய கட்ஜூ தனது வலைப்பக்கத்தில் காந்தி பிரிட்டிஷ் ஏஜென்ட் என்றும், பசுவதையும் காந்தியும் என்பது குறித்தும் கட்டுரைகளை எழுதியிருந்தார். கட்ஜுவின் இந்தக் கருத்து, மாநிலங்களவையில் பெரும் அமளியைக் கிளப்பியது. கட்ஜூவின் கருத்துக்களுக்கு கண்டனம் தெரிவித்து அனைத்து உறுப்பினர்களும் ஒருமனதாக தீர்மானம் ஒன்றைக் கொண்டு வந்தனர். இதற்கு பதிலளித்து கருத்து தெரிவித்துள்ள கட்ஜு, விசாரணை இன்றி தன்னை தூக்கில் போடலாம் என்று கூறினார். “இது அற்புதமான ஒரு செய்தி. மாநிலங்களவை எனக்கு கண்டனம் தெரிவித்து தீர்மானம் நிறைவேற்றியுள்ளது! சரிதான்… ஆனால் அது மட்டும் போதாது. நான் போலியாக தேசத்தந்தை என்று அழைக்கப்படும் ஒருவரைப் பற்றியும், ஜப்பானிய பாசிச சக்திகளின் ஏஜெண்ட் பற்றியும் கருத்து தெரிவித்ததற்காக நிச்சயம் தண்டிக்கப்பட வேண்டும். வெறூம் கண்டனம் தண்டனை ஆகாது. நான் உச்சநீதிமன்ற நீதிபதி பதவியிலிருந்து ஓய்வுபெற்றவன் என்பதால், எனது சலுகைகளைப் பறிக்க வேண்டும் என்று சிலர் கூறி இருக்கிறார்கள். ஆனால் அதற்கு விதிகளைத் திருத்தி தீர்மானம் நிறைவேற்ற வேண்டி இருக்கும். நான் வேண்டுமானால், எளிமையாக ஒன்றைச் செய்யலாம். நாடாளுமன்ற உறுப்பினர்களுக்கு ஒரு யோசனை கூறுகிறேன். நான் வெளிநாட்டில் இருந்து திரும்பியவுடன், என்னைக் கைது செய்து, விசாரணையே இன்றி தூக்கில் போட வேண்டும் என்று தீர்மானம் நிறைவேற்றுங்கள்” என்று கேலியாகக் கூறியுள்ளார்.