புது தில்லி: தில்லியில் ஆம் ஆத்மி கட்சியின் சார்பில் நடைபெற்ற பேரணிக்கு முன்னதாக, பொதுக்கூட்டம் நடந்தபோது, கஜேந்திரா என்ற விவசாயி மரத்தில் ஏறி தற்கொலை செய்து கொண்டார். இந்தச் சம்பவத்துக்கு பிரதமர் மோடி இரங்கல் தெரிவித்துள்ளார். இது குறித்து அவர் வெளியிட்ட டிவிட்டர் பதிவில்,  

Gajendra’s death has saddened the Nation. We are all deeply shattered & disappointed. Condolences to his family. — Narendra Modi (@narendramodi) April 22, 2015

கஜேந்திராவின் மரணத்தினால் நாடு சோகத்தில் ஆழ்ந்துள்ளது. இதனால் நாங்கள் உடைந்து போய்விட்டோம். ஏமாற்றமாக உள்ளது. அவரின் குடும்பத்துக்கு இரங்கலைத் தெரிவித்துக் கொள்கிறேன்.  

At no point must the hardworking farmer think he is alone. We are all together in creating a better tomorrow for the farmers of India. — Narendra Modi (@narendramodi) April 22, 2015

கடுமையாக உழைக்கும் விவசாயிகள், எந்த நேரத்திலும் தனித்துவிடப்பட்டோம் என உணர வேண்டாம். இந்தியாவில், நாளை விவசாயிகளுக்கு சிறந்த நாளாக உருவாக்க நாங்கள் ஒருங்கிணைந்துள்ளோம் – எனத் தெரிவித்துள்ளார்.

புது தில்லி: மத்திய அரசின் நிலம் கையகப் படுத்தும் சட்டத்துக்கு எதிர்ப்பு தெரிவித்து, தில்லி முதல்வர் அரவிந்த் கேஜ்ரிவால் இன்று புது தில்லி ஜந்தர் மந்தர் மைதானத்தில் பொதுக் கூட்டம் ஒன்றில் பேசினார். அப்போது, மோடி அரசு விவசாயிகளுக்கு எதிராகவும், பணக்காரர்களுக்கு ஆதரவாகவும் செயல்படுவதாக குற்றம் சாட்டினார். அப்போது, கேஜ்ரிவால் முன்னிலையில், ராஜஸ்தானைச் சேர்ந்த கஜேந்திர சிங் என்ற விவசாயி மைதானத்தில் இருந்த மரம் ஒன்றில் ஏறி தற்கொலை செய்ய முயன்றார். இருப்பினும் அவரை உடனடியாக ஆம் ஆத்மி தொண்டர்கள் கீழே இறக்கி மருத்துவமனையில் சேர்த்தனர். இருப்பினும் அவர் உயிரிழந்துவிட்டதாக மருத்துவர்கள் தெரிவித்தனர். இந்தச் சம்பவத்தால் ஆம் ஆத்மி தொண்டர்கள் பெரும் அதிர்ச்சி அடைந்தனர். இந்த விவகாரத்தில், விவசாயி தற்கொலையை ஆம் ஆத்மி தொண்டர்கள் தடுக்கத் தவறியதாக காங்கிரஸ் குற்றம்சாட்டியுள்ளது. இந்த சோகச் சம்பவத்துக்குப் பின்னரும் ஆம் ஆத்மி கட்சியினர் பேரணி நடத்தியது வெட்கக்கேடான செயல் என்று காங்கிரஸ் கட்சி விமர்சனம் செய்துள்ளது.

புது தில்லி: நரேந்திர மோடி தலைமையிலான மத்திய அரசு பெரும் பணக்காரர்களுக்காக செயல்படுகிறது என்று தில்லி முதல்வர் அரவிந்த் கேஜ்ரிவால் விமர்சித்துள்ளார். மத்திய அரசின் நிலம் கையகப்படுத்தும் சட்டத்துக்கு எதிர்ப்பு தெரிவித்து ஆம் ஆத்மி கட்சி சார்பில் தில்லி ஜந்தர் மந்தர் மைதானத்தில் நடைபெற்ற போராட்டத்தில் கலந்து கொண்டு பேசிய அரவிந்த் கேஜ்ரிவால், “விவசாயிகள் மோடி மீது நம்பிக்கை வைத்து அவருக்கு ஓட்டு போட்டனர். தற்போது அரசு மீது வைத்த நம்பிக்கையை ஓர் ஆண்டுக்குள் விவசாயிகள் இழந்துவிட்டனர். நிலம் கையகப்படுத்தும் மசோதாவுக்கு எதிராக ஆயிரக்கணக்கில் திரண்டு அவர்கள் போராடுகின்றனர். நரேந்திர மோடி அரசு விவசாயிகளுக்கு எதிரானது. இது பெரும் பணக்காரர்களுக்கு ஆதரவாக செயல்படுகிறது. நிலம் கையகப்படுத்தும் அவசரச் சட்டம் ஏன் கொண்டு வரப்பட்டுள்ளது என்று நாடு தெரிந்துகொள்ள விரும்புகிறது. ஏதாவது திட்டம் தடைப்பட்டு நிற்கிறதா? அதுபோன்று எதுவும் இல்லாத நிலையில் பிறகு ஏன் இந்த அவசரச் சட்டம்? – என்று கேள்வி எழுப்பினார்.

புது தில்லி: இணைய சமநிலை – நெட் நியூட்ராலிட்டி குறித்த விவாதத்தின்போது, இணைய வசதியை கார்ப்பரேட் நிறுவனங்கள் கையில் ஒப்படைக்க மத்திய அரசு முயற்சி செய்துவருகிறது, அதற்கான டிரையல் பலூன் இப்போது பறக்கவிடப்பட்டுள்ளது என்று காங்கிரஸ் துணைத் தலைவர் ராகுல்காந்தி குற்றம் சாட்டியுள்ளார். நாடாள்மன்ற பட்ஜெட் கூட்டத்தொடரின் 2ஆவது கட்ட கூட்டம் ஒரு மாத இடைவெளிக்குப் பின்னர் திங்கள் அன்று தொடங்கி நடைபெற்று வருகிறது. இதில், இன்று கேள்வி நேரத்தை ஒத்திவைத்து விட்டு நெட் நியூட்ராலிட்டி குறித்து விவாதிக்க வேண்டும் ராகுல் காந்தி தரப்பில் நோட்டீஸ் கொடுக்கப்பட்டது. இதை அடுத்து மக்களவையில் பேசிய ராகுல்காந்தி, மத்திய அரசு இணையத்தைப் பிடுங்கி கார்ப்ரேட் நிறுவனங்கள் கையில் கொடுக்க முயற்சி செய்கிறது. நெட் நியூட்ராலிட்டி விவகாரத்தில் சட்டத்தை மாற்றுங்கள் இல்லை புதிய சட்டத்தை உருவாக்குங்கள் என்று கூறினார். நாடாளுமன்றக் கூட்டம் முடிந்த பின்னர் வெளியே செய்தியாளர்களைச் சந்தித்தபோது அவர்களிடம், எதிர்ப்பை சோதித்துப் பார்ப்பதற்கான டிரையல் பலூனை பறக்க விட்டிருக்கிறார்கள். எதிர்ப்பு பலமாக இருந்தால், அது செயல்படுத்தப்படாது. எனவே, நெட்நியூட்ராலிடியை பாதுகாக்கவே நாங்கள் எதிர்ப்பு தெரிவிக்கிறோம். நிலம் கையகப்படுத்தலைஅடுத்து, இன்டர்நெட் வசதியை கார்ப்ரேட் நிறுவனங்களிடம் ஒப்படைக்க மத்திய அரசு முயற்சி செய்து வருகிறது என்றார் ராகுல் காந்தி.

காத்மண்டு: நேபாளத்தில் இந்திய பக்தர்கள் சென்ற பஸ் ஒன்று விபத்துக்கு உள்ளானதில் 12 பேர் உயிரிழந்தனர் நேபாளத் தலைநகர் காத்மண்டுவில் இருந்து சுமார் 75 கிமீ., தொலைவில் உள்ள தாடிங் மாவட்டத்தில் மலைப்பகுதியில் சென்ற பேருந்து விபத்துக்கு உள்ளானது. இதில் 14 பேர் உயிரிழந்தனர். 25 பேர் படுகாயமடைந்து அருகிலுள்ள மருத்துவமனையில் அனுமதிக்கப்பட்டனர். அவர்களில் சிலரது நிலைமை கவலைக்கு இடமாக இருப்பதாக மருத்துவமனை வட்டாரங்கள் தெரிவித்தன. குஜராத் மாநிலத்தில் இருந்து காத்மண்டுவில் உள்ள பசுபதிநாதர் கோவிலுக்கு தரிசனம் செய்ய 45 பக்தர்கள் சென்றனர். அவர்கள் சுவாமி தரிசனம் முடித்து, இந்தியாவின் கோரக்பூரை நோக்கி வந்தபோது இந்த விபத்து நடந்துள்ளது.