புது தில்லி: ஐபிஎல் போட்டிகளில் பிரகாசித்து, மீண்டும் இந்திய அணியில் இடம்பிடிப்பேன் என்று நம்பிக்கை தெரிவித்தார் கிரிக்கெட் வீரர் யுவராஜ் சிங். இந்திய அணியின் ஆல் ரவுண்டராகத் திகழ்ந்தவர் யுவராஜ் சிங். 2011 ஆம் ஆண்டு நடந்த உலகக் கோப்பைத் தொடரில் தனது அதிரடி ஆட்டம் மூலம் பல வெற்றிகளை இந்திய அணிக்கு பெற்றுத் தந்தவர் யுவராஜ் சிங். மேலும் அந்தத் தொடரின் தொடர் நாயகன் விருதையும் தட்டிச் சென்றவர். அப்போது, யுவராஜின் தந்தை, இந்திய அணி உலகக் கோப்பையை வெல்ல யுவராஜே காரணம் என்றெல்லாம் பேட்டி அளித்து பரபரப்பை ஏற்படுத்தியிருந்தார். இவ்வகையில் அதிரடி ஆட்டத்தை வெளிப்படுத்திய யுவராஜ் சிங்கை, புற்று நோய் பாதிப்பு ஏற்பட்டு அவரை கட்டிப் போட்டது. பின்னர் தகுந்த சிகிச்சை பெற்று, தற்போது முழுவதுமாக மீண்டுள்ளார். இந்நிலையில் ஐபிஎல் போட்டி குறித்து தில்லியில் நடைபெற்ற ஒரு நிகழ்ச்சியில் யுவராஜ் சிங் பேசுகையில், புற்றுநோய் சிகிச்சைக்கு பின் தற்போது உடல் தகுதியுடன் நலமாக உள்ளேன். மேலும் வரும் ஐபிஎல் கிரிக்கெட் போட்டிகளில் அசத்தல் ஆட்டத்தை வெளிபடுத்தி இந்திய அணிக்கு திரும்புவேன் என்றார். யுவராஜ் சிங்கை, டெல்லி டேர்டெவில்ஸ் அணி 16 கோடி ரூபாய்க்கு ஏலம் எடுத்துள்ளது.

பெங்களூரு: பெங்களூருவில், உறைவிடப் பள்ளியில் 12ஆம் வகுப்பு பள்ளி மாணவி ஒருவர் ஒரு நபரால் சுடப்பட்டு, பரிதாபமாக உயிரிழந்தார். அவரை ஒருதலையாகக் காதலித்த பள்ளி உதவியாளர் அவரை துப்பாக்கியால் சுட்டுவிட்டு, தப்பி விட்டதாக முதல் கட்ட விசாரணையில் தெரிய வந்துள்ளது. 18 வயதான அந்தப் பெண் பெயர் கௌதமி என்றும், அவர் பள்ளி வளாகத்தில் அவருடைய தோழியுடன் சேர்த்து அவர் சுடப்பட்டதாகவும், காயமடைந்த தோழி மருத்துவமனையில் அனுமதிக்கப்பட்டுள்ளதாகவும் போலீஸார் தெரிவித்துள்ளனர். சுட்டுவிட்டு தப்பியோடிய 30 வயது நபர் மகேஷைத் தேடும் பணியில் 3 போலீஸ் குழு ஈடுபடுத்தப் பட்டுள்ளது. அவர் அந்த 12ம் வகுப்பு மாணவியைக் காதலித்தாராம். கௌதமி பெங்களூரில் இருந்து 80 கி.மீ. தொலைவில் தும்கூர் மாவட்டத்தைச் சேர்ந்த ஓர் ஊரில் இருந்து படிக்க வந்தவராம். அவருடைய தோழி ஸ்ரீஷா அளித்த தகவல்படி, மூன்றாவது மாடியில் இருந்த கௌதமியின் அறைக்கதவைத் திறக்க முயன்றபோது, செவ்வாய் இரவு 11 மணி அளவில் சுடப்பட்டாராம். இதனை காவல் ஆணையர் எம்.என். ரெட்டி தெரிவித்துள்ளார். தலைமறைவான மகேஷ் அந்தப் பள்ளியில் உதவியாளராக கடந்த இரண்டு வருடமாக வேலை செய்து வருகிறாராம். ஒரு தலைக் காதலால் ஒரு பள்ளி மாணவி துப்பாக்கியால் சுடப்பட்டது பெங்களூரில் பெரும் அதிர்ச்சியை ஏற்படுத்தியுள்ளது.

புது தில்லி: பெட்ரோல் டீசல் விலைகள் இன்று நள்ளிரவு முதல் குறைக்கப்படுகின்றன. சர்வதேச சந்தையில் கடந்த சில மாதங்களாக கச்சா எண்ணெய் விலையில் தொடர்ந்து வீழ்ச்சி ஏற்பட்டபடி உள்ளது. இதனால் இந்தியாவில் பெட்ரோல், டீசல் விலைகள் கணிசமாக குறைந்தன. பெட்ரோல் விலை 10 முறைக்கு மேல் குறைக்கப்பட்டது. இதன் மூலம் முன்னர் இருந்த விலையில் இருந்து ரூ. 17 வரை குறைக்கப்பட்டிருந்தது. டீசல் விலையும் 12 ரூபாய் அளவுக்கு குறைந்தது. ஆனால் கடந்த பிப்ரவரி மற்றும் மார்ச் மாதங்களில் 2 முறை பெட்ரோல், டீசல் விலைகள் உயர்த்தப்பட்டன. பெட்ரோல் 82 காசும், டீசல் 61 காசும் உயர்த்தப்பட்டது. பின்னர், மார்ச் 1ல் பெட்ரோல் விலை அதிரடியாக ரூ.3.18 உயர்த்தப்பட்டது. டீசல் விலையும் ரூ.3 உயர்த்தப்பட்டது. இந்நிலையில் சர்வதேச சந்தையில் கச்சா எண்ணெய் விலையில் வீழ்ச்சி ஏற்பட்டதால் பெட்ரோல், டீசல் விலையைக் குறைக்க எண்ணெய் நிறுவனங்கள் முடிவு செய்தன. அதன்படி பெட்ரோல் விலை லிட்டருக்கு 51 காசு குறைக்கப்பட்டுள்ளது. டீசல் விலை லிட்டருக்கு 1 ரூபாய் 31 காசு குறைக்கப்பட்டுள்ளது. இந்த விலைக் குறைப்பு இன்று நள்ளிரவு முதல் அமலுக்கு வருகிறது.

உத்தரப் பிரதேசத்தில் ரூ.2 லட்சம் லஞ்சம் வாங்கிய வருமான வரித்துறை அதிகாரியை சிபிஐ அதிகாரிகள் கைது செய்தனர். அப்போது, சக வருமான வரித்துறை அலுவலர்கள் சிபிஐ அதிகாரிகள் மீது தாக்குதல் நடத்தியதில் 2 பேர் படுகாயமடைந்தனர். இதுதொடர்பாக சிபிஐ செய்தித் தொடர்பாளர் கூறியது..: லக்னோவில் வருமான வரித்துறை அதிகாரி நிரஞ்சன் குமார் என்பவர், 2011-12-ம் நிதியாண்டுக்கான வரி கணக்கீடு தொடர்பாக ஒருவரிடம் ரூ.10 லட்சம் லஞ்சம் கேட்டுள்ளார். அதில் முதல் தவணையாக ரூ. 2 லட்சம் வாங்கினார். அப்போது, சிபிஐ அதிகாரிகள் சோதனை நடத்தி அவரைக் கைது செய்தனர். அப்போது, வருமான வரித்துறை அதிகாரிகள் சங்க உறுப்பினர்கள் அங்கே வந்து, சிபிஐ குழுவினர் மீது தீயணைப்புக் கருவி உள்ளிட்டவற்றால் தாக்குதல் நடத்தினர். இதில், சிபிஐ இன்ஸ்பெக்டர் உள்ளிட்ட 2 பேர் படுகாயமடைந்தனர். தாக்குதல் நடத்தியவர்கள் மீது காவல்துறையில் புகார் செய்யப் பட்டுள்ளது என்றார்.

ஒடிசா தோன்றிய தினமான உத்கல திவஸ் இன்று. ஏப்.1ம் தேதியான இதை ஒட்டி, ஒடிசா மக்களுக்கு மோடி தனது வாழ்த்துகளை தெரிவித்துக் கொண்டுள்ளார். தனது டிவிட்டர் பக்கத்தில் ஒடிசாவின் சகோதர சகோதரிகளுக்கு உத்கல திவஸில் எனது வாழ்த்து. ஒடிசாவின் முன்னேற்றத்துக்கு எனது வாழ்த்து என்று தெரிவித்துக் கொண்டிருக்கிறார்.

Wishing my sisters and brothers of Odisha on Utkala Dibasa. My best wishes for Odisha’s progress. pic.twitter.com/xncxwKWCrF — Narendra Modi (@narendramodi) April 1, 2015