வாஷிங்டன்: அமெரிக்காவில், இந்தியரைத் தாக்கிய அமெரிக்க போலீஸ் அதிகாரி மீது குற்றச்சாட்டு பதிவு செய்யப்பட்டது. அமெரிக்காவில் அலபாமா மாகாணத்தில் மேடிசன் நகர் பகுதியில் வசித்து வரும் தனது மகன், மருமகள், புதிதாக பிறந்த பேரக் குழந்தையை பார்த்து வருவதற்காக குஜராத்தை சேர்ந்த சுரேஷ் பாய் படேல் (57) சென்றிருந்தார். இந்நிலையில், கடந்த மாதம் 6-ந்தேதி அவர் அந்தப் பகுதியில் நடைப் பயிற்சியில் ஈடுபட்டிருந்தபோது, சந்தேகத்துக்கு இடமளிக்கும் வகையில் காட்சி தருவதாக போலீசில் ஒருவர் புகார் செய்தார். உடனே ரோந்துப் பணியில் ஈடுபட்டிருந்த போலீஸ் அதிகாரிகள் அவரைத் தடுத்து நிறுத்தி விசாரணை நடத்தினர். ஆங்கில மொழி தெரியாத அவர் தொடர்ந்து பதில் அளிக்க முடியாமல் திணறியபோது, எரிக் பார்க்கர் (26) என்ற போலீஸ் அதிகாரி அவரை மடக்கி கீழே பிடித்து தள்ளினார். இதில் அவர் முடமானார். இது தொடர்பான வீடியோ வெளியாகி பெரும் பரபரப்பை ஏற்படுத்தியது. இதில் இந்தியா தலையிட்டு, அமெரிக்கா கடும் நடவடிக்கை எடுக்கவேண்டும் என்று வலியுறுத்தியது அதைத் தொடர்ந்து எப்.பி.ஐ. விசாரணை நடத்தியது. அலபாமா மாகாணத்தின் கவர்னர் ராபர்ட் பென்ட்லி, இந்திய அரசிடம் மன்னிப்பும் கேட்டுக்கொண்டார். இதற்கிடையே எரிக் பார்க்கர் இடைநீக்கம் செய்யப்பட்டார். பின்னர், பணி நீக்கம் செய்யுமாறு அரசுக்கு மேடிசன் போலீஸ் துறை பரிந்துரை செய்துள்ளது. இந்த நிலையில் அமெரிக்க அரசு வக்கீல்கள் குழுவினர், எரிக் பார்க்கர் மீது குற்றச்சாட்டு பதிவு செய்தனர். இது தொடர்பாக உதவி அட்டார்னி ஜெனரல் வனிதா குப்தா, அலபாமா வடக்கு மாவட்ட அட்டார்னி ஜாய்ஸ் வான்சி ஆகியோர் எரிக் பார்க்கர் மீது பதிவு செய்த குற்றச்சாட்டில்… சுரேஷ் பாய் படேலை கீழே தள்ளிவிட்டு எரிக் பார்க்கர் முடமாக்கி விட்டார். பார்க்கரின் செயல்கள், அமெரிக்க அரசியல் சாசனத்தின்படி, பாதிக்கப்பட்ட நபர் உரிமையை இழக்க செய்துள்ளது. போலீஸ் அதிகாரிகள், சட்டத்தின் ஆட்சியை நிலை நிறுத்துவதற்கும், மக்களைப் பாதுகாப்பதற்கும்தான் பதவி ஏற்கிறார்கள். தங்களது பதவிப்பிரமாணத்தின்மீது எடுத்துக்கொண்ட உறுதிமொழியை காக்காமல், மீறி, பலப்பிரயோகம் செய்த ஒருவர் நீதியின் முன் நிறுத்தப்படவேண்டும் – என்று கூறப்பட்டுள்ளது. எரிக் பார்க்கர், தன் மீதான குற்றசாட்டை மறுத்து விட்டார். இதையடுத்து அவர் மீது அடுத்த மாதம் 29-ஆம் தேதி முறைப்படியான நீதிமன்ற விசாரணை தொடங்கி நடைபெறும். இந்த வழக்கில் எரிக் பார்க்கர் மீதான குற்றச்சாட்டுகள் நிரூபிக்கப்பட்டால், அமெரிக்க மனித உரிமை மீறல் குற்றச்சாட்டுகளுக்காக அவருக்கு 10 ஆண்டு சிறைத்தண்டனை விதிக்க முடியும்.

  மெல்போர்ன்: உலகக் கோப்பை இறுதிப் போட்டியில் 74 ரன்கள் எடுத்த நிலையில், ஆஸி., கேப்டன் மைக்கேல் கிளார்க் ஆட்டம் இழந்தார். ஏற்கெனவே அவர் அறிவித்திருந்தபடி, இந்தப் போட்டியுடன் அவர் ஒருநாள் போட்டிகளில் இருந்து ஓய்வு பெற்றார். வெற்றிகரமாக போட்டியை நிறைவு செய்து, கோப்பை வாங்கிக் கொடுத்த ஆனந்தக் கண்ணீருடன், ரசிகர்களிடம் இருந்து கிளார்க் விடை பெற்றார். நியூசிலாந்து மற்றும் ஆஸ்திரேலிய வீரர்கள் அவரை பாராட்டினர்.

மெல்பர்ன் உலகக் கோப்பை இறுதிப் போட்டியில் நியூசிலாந்தை 7 விக்கெட் வித்தியாசத்தில் வீழ்த்திய ஆஸ்திரேலிய அணி, 5 ஆவது முறையாக உலகக் கோப்பையை வென்று சாதனை படைத்தது. இன்று நடைபெற்ற இறுதிப் போட்டியில், முதலில் விளையாடிய நியூசிலாந்தை 45 ஓவரில் அனைத்து விக்கெட்களையும் இழக்கச் செய்து, 183 ரன் மட்டுமே எடுக்க வைத்தது ஆஸ்திரேலியா. எளிய இலக்கை நோக்கி விளையாடிய ஆஸ்திரேலியா 33.1 ஓவரில் 3 விக்கெட்டை மட்டுமே இழந்து 186 ரன் எடுத்து வெற்றி பெற்றது. ஸ்மித் 56 ரன் எடுத்தார். வார்னர் 45 ரன் எடுத்தார். க்ளார்க் 74 ரன் குவித்தார். இதன் மூலம் ஆஸ்திரேலியா கோப்பையை வென்று சாதனை படைத்தது.

பீஜிங்: சீனா உருவாக்கி வரும் ஆசிய உள்கட்டமைப்பு முதலீட்டு வங்கியில் மேலும் பல நாடுகள் இணையும் என்று அதிபர் ஜீ ஜிங் பிங் தெரிவித்தார். சீனாவின் தென் பகுதியிலுள்ள ஹைனான் தீவில் நடைபெறும் போவோ சர்வதேசக் கருத்தரங்கில், நேபாளம், இலங்கை அதிபர்கள், மைக்ரோஸாஃப்ட் நிறுவனர் பில் கேட்ஸ், டாடா முன்னாள் தலைவர் ரத்தன் டாடா உள்ளிட்டோர் பங்கேற்றுள்ளனர். சர்வதேச அளவில் முக்கியத் தொழிலதிபர்கள், அதிகாரிகளும் இந்தக் கருத்தரங்கில் கலந்து கொள்கின்றனர். டாடா முன்னாள் தலைவர் ரத்தன் டாடா, இக் கருத்தரங்கை ஏற்பாடு செய்யும் போவோ நிர்வாகக் குழு உறுப்பினராக கடந்த ஆண்டு சேர்க்கப்பட்டார். இந்தக் கருத்தரங்கில் சனிக்கிழமை கலந்து கொண்டு பேசிய சீன அதிபர் ஜீ ஜிங் பிங், பொருளாதாரத்தில் தாராள மயம், வெளிநாட்டு முதலீடுகள் வருவதற்கு ஏற்ற சூழல், முதலீட்டாளர்களின் சட்டபூர்வமான உரிமைகளுக்கும் நலன்களுக்கும் பாதுகாப்பு ஆகியவற்றை சீனா உறுதி செய்யும். சீனா உருவாக்கி வரும் ஆசிய உள்கட்டமைப்பு முதலீட்டு வங்கியில் இந்தியா உள்பட 30 நாடுகள், உறுப்பினர்களாகச் சேர்ந்துள்ளன. ரஷியாவும் இந்த வங்கியில் பங்கு பெறப் போவதாக அறிவித்துள்ளது. அந்த வங்கியில் உறுப்பு நாடாகச் சேருவதற்கு கடைசி நாளான மார்ச் 31-ஆம் தேதிக்குள் மேலும் பல நாடுகள் அதில் பங்கு பெறுவதாக அறிவிக்கும் என எதிர்பார்ப்பதாகக் கூறினார்.

அனைத்து அண்டை நாடுகளுடனும் நட்புறவு, ஒத்துழைப்புக்கான ஒப்பந்தம் ஏற்படுத்த சீனா தயாராக இருப்பதாக அந்நாட்டு அதிபர் ஜீ ஜின்பிங் தெரிவித்தார். சீன அரசு சார்பில் ஆண்டுதோறும் நடைபெறும் போவோ சர்வதேசக் கருத்தரங்கில் சனிக்கிழமை கலந்து கொண்டு அவர் பேசினார். அப்போது அவர் … “தூரத்து உறவினர்களைவிட, அண்டை வீட்டார் மேல்’ என்று சீனாவில் ஒரு பழமொழி உண்டு. அண்டை நாடுகளுடன் ஒத்துழைப்பு ஏற்படுத்தும் முயற்சிகளை சீனா தொடர்ந்து மேற்கொண்டு வருகிறது. நட்புறவு, ஒத்துழைப்பு, அரசியல் ஸ்திரத்தன்மை, பொருளாதார வளர்ச்சி ஆகியவற்றை உறுதி செய்யும் விதமாக அண்டை நாடுகள் அனைத்துடனும் ஒப்பந்தம் ஏற்படுத்த தயாராக உள்ளோம் என்றார்.