காமன்வெல்த் விளையாட்டுப் போட்டிகள், பர்மிங்ஹாம் – ஐந்தாம் நாள் – 02.08.2022
- முனைவர் கு.வை. பாலசுப்பிரமணியன்
காமன்வெல்த் போட்டிகளில் ஐந்தாம் நாளிலும் இந்திய வீரகள் மேலும் பதக்கங்கள் பெற்றனர். இந்தியா இதுவரை 13 பதக்கங்கள் பெற்றுள்ளது. 5 தங்கம், 5 வெள்ளி, 3 வெண்கலப் பதக்கங்கள். லான் பவுல்ஸ் போட்டியில் இந்திய பெண்கள் அணி நால்வர் பிரிவில் தங்கப் பதக்கம் வென்று வரலாறு படைத்தனர்.
இந்திய அணி தென் ஆப்பிரிக்காவை இறுதிப்போட்டியில் 17-10 என்ற புள்ளிக் கணக்கில் வென்றது. இந்தியாவின் விகாஸ் தாகூர் 96 கிலோ எடைப் பிரிவில் பளுதூக்குதலில் வெள்ளிப் பதக்கம் வென்றார்.
பாட்மிண்டன் கலப்பு அணி போட்டியில் இந்தியா மலேசியாவிடம் 2-1 என்ற கணக்கில் தொற்றுப்போனது. பி.வி. சிந்து தனது ஆட்டத்தில் வெற்றி பெற்றார். ஆனால் ஆண்கள் இரட்டையர் அணியும், கிடம்பி ஸ்ரீகாந்தும் தோற்றுப்போனார்கள். ஸ்ரீகாந்த் தன்னைவிட தரவரிசைப் பட்டியலில் கீழே உள்ள மலேசிய வீரரிடம் தோற்றுப் போனது சோகம். டேபிள் டென்னிஸ் ஆண்கள் அணி இறுதிப்போட்டியில் விளையாடியது.
முதல் போட்டியில் ஷரத் கமல் 7-11, 14-12, 3-11, 9-11 என்ற புள்ளிக்கணக்கில் தோற்றுப்போனார். இரண்டாவது போட்டியில் சத்யன் ஞானசேகரன் யூ-பாங்கை 12-10, 7-11, 7-11, 11-4 என்ற கணக்கில் வென்றார். மூன்றாவது போட்டியில் ஹர்மீத் தேசாய் சிங்கப்பூர் அணியின் கிளாரன்ஸ் ச்யூவை 11-8, 11-5, 11-6 என்ற செட் கணக்கில் வென்று அணிக்கு தங்கப்பதக்கத்தைப் பெற்றுத் தந்தார்.
ஆண்கள் 67 கிலோ குத்துச் சண்டைப் போட்டியில் ரோஹித் டோகாஸ் கானா நாட்டு வீரரை தோற்கடித்து, காலிறுதிக்கு முன்னேறியிருக்கிறார். முரளி ஸ்ரீஷங்கர், முகம்மது அனீஸ் இருவரும் நீளத்தாண்டுதல் இறுதிப் போட்டிக்குத் தகுதி பெற்றிருக்கிறார்கள். இந்திய வீராங்கனை ட்யூடி சந்த் 100 மீட்டர் தகுதிச் சுற்றில் நாலாவதாக வந்தார். எனவே அடுத்த சுற்றுக்குத் தேர்ச்சி பெறவில்லை.
ஸ்குவாஷ் பெண்கள் போட்டியில் சாரா குருவில்லா பாகிஸ்தானிய வீராங்கனையைத் தோற்கடித்து அடுத்த சுற்றுக்கு முன்னேறினார். பெண்கள் ஹாக்கிப் போட்டியில் இந்திய பெண்கள் அணி இங்கிலாந்து அணியிடம் 1-3 என்ற கோல் கணக்கில் தோற்றுப் போனது.
ஸ்குவாஷ் ஆண்கள் அரையிறுதிப் போட்டியில் சௌரவ் கோஷல் நியூசிலாந்து வீரரிடம் தோற்றுப்போனார். இனி அவர் வெண்கலப் பதக்கத்திற்கான ஆட்டத்தில் ஆடுவார்.