பயங்கரவாதியாக இருந்து ஜனாதிபதியாக மாறியவரை சந்தித்த ட்ரம்ப்!
மத்தியக் கிழக்கு நாடுகளுக்கு பயணம் மேற்கொண்டுள்ள அமெரிக்க அதிபர் டொனால்ட் டிரம்ப், சௌதி அரேபியாவில் சிரியாவின் இடைக்கால ஜனாதிபதி அஹ்மத் அல்-ஷாராவை சந்தித்ததன் மூலம் தன் வாழ்நாளின் சர்ச்சைக்குரிய வரலாற்றை எழுதியுள்ளார்.
அண்மைக் காலம் வரை அஹ்மத் அல்-ஷாரா, ஐ.நா.வால் தடைசெய்யப்பட்ட மற்றும் அமெரிக்காவால் பயங்கரவாதியாக அறிவிக்கப்பட்ட அபு முகமது அல்-ஜவ்லானி (அல்-கோலானி அல்லது அல்-ஜவுலானி என்றும் உச்சரிக்கப்படுகிறார்) என்ற புனைப்பெயரால் அறியப்பட்டார்.
கடந்த இரண்டு தசாப்தங்களாக அல்-ஜவ்லானி அல்-கொய்தா மற்றும் ஐ.எஸ்.ஐ.எஸ் போன்ற உலகளாவிய பயங்கரவாத அமைப்புகளில் முக்கிய பதவிகளை வகித்தார்.
ஐக்கிய நாடுகள் சபையின் ‘ஐ.எஸ்.ஐ.எஸ் மற்றும் அல்-கொய்தா தடைகள் குழு’ படி, ஜூலை 2013 இல், அபு முகமது அல்-ஜவ்லானி “பயங்கரவாத செயல்களுக்கு நிதியளித்தல், திட்டமிடுதல், வசதி செய்தல், தயாரித்தல் அல்லது செயல்படுத்துவதில் பங்கேற்றதற்காக” உலகளாவிய பயங்கரவாதியாக அறிவிக்கப்பட்டார்.
2012 ஆம் ஆண்டில், அல்-ஜவ்லானி அல்-நுஸ்ரா முன்னணியை (ஜபத் அல்-நுஸ்ரா என்றும் அழைக்கப்படுகிறது) நிறுவினார், இது அதிகாரப்பூர்வமாக ஜபத் ஃபதா அல்-ஷாம் என்று அழைக்கப்படுகிறது.
இது ஐ.நா.வால் அறிவிக்கப்பட்ட பயங்கரவாதக் குழுவாகும், இது அதிகாரப்பூர்வமாக சிரியாவில் அல்கொய்தாவின் கிளையாக மாறியது.
சிரியாவை 53 ஆண்டுகள் இரும்புக்கரம் கொண்டு ஆட்சி செய்த அசாத் ஆட்சி 2024ல் கவிழ்ந்தது.
2025 ஜனவரியில் சிரியாவின் இடைக்கால ஜனாதிபதியாக நியமிக்கப்பட்டார். பின்னர் அவர் அதிகாரபூர்வமாக தனது தற்போதைய பெயரான அஹ்மத் அல்-ஷராவை ஏற்றுக் கொண்டார்.
