குரு பெயர்ச்சி பலன்கள் 2018 – 2019: குரு பகவான் நவ கோள்களில் தலையாய இடத்தைப் பெறுகிறார்.
குரு பார்க்க கோடி நன்மை என்பது சத்திய வாக்கு. அவரது பார்வை பட்டாலே ஜாதகன் சிறப்பாக இருப்பான் என்பதால், நாம் குரு பெயர்ச்சியை ஒட்டி, நமது ராசிக்கு குரு பகவான் எத்தகைய பலன்களைத் தரப் போகிறார் என்பதை அறிந்து கொள்ள மிகுந்த ஆவலுடன் காத்திருப்போம்.
இதோ இந்த குரு பெயர்ச்சி, துலா ராசியினரான நமக்கு எத்தகைய பலன்களைத் தரப் போகிறது என்பதை இங்கே பார்ப்போம்…
துலா ராசி
சித்திரை 3,4, ஸ்வாதி, விசாகம் 3 பாதம் முடிய
85/100
குடும்பத்தைக் காப்பவராயும் தன்னுடைய நிலையிலிருந்து மாறாதவராயும் இருக்கும் துலா ராசி அன்பர்களே!
உங்கள் சோதனைக்காலம் முடிந்துவிட்டது எனலாம். குருபகவான் ராசிக்கு 2ல் வருகிறார். ஏற்கனவே ஜென்மத்தில் குருவும் 10ல் ராகுவும் இருந்து படாது பாடு படுத்தி கொண்டிருந்தனர்; இனி நல்ல காலம். பெரிய வெற்றிகளை எளிதில் பெறுவீர்கள்,
குடும்பத்தில் குதூகலம் அதிகரிக்கும். சிலர் சொந்த தொழில் முயற்சியை தொடங்குவர். உங்கள் தசை புக்திகள் நன்றாக இருந்தால் கோடீஸ்வரர் ஆவீர்கள். எதிர்பார்த்த செயல்கள் யாவும் சாதகமாக அமையும். குடும்பத்தில் ஒற்றுமை இருக்கும் பண வரவுகள் தாராளம்
சிலருக்கு திருமண வாய்ப்பு கைகூடும். புத்திர பாக்கியமும் சிலருக்கு உண்டாகும். உடல் நலம் நன்றாக இருக்கும். வெளிநாட்டு வாய்ப்புகள் கைகூடும். குடும்ப தேவைகள் பூர்த்தியாகும் ஆடை ஆபரண சேர்க்கை புதிய சொத்து வாங்குதல் போன்றவை நிறைவேறும்.
மேலும் பிப்ரவரி 2019க்கு பின் சனிபகவானுடன் கேது பகவான் இணைவதால் உங்கள் வாழ்க்கை ஒளிமிக்கதாக இருக்கும். இதுவரையில் பட்ட கஷ்டங்கள் அனைத்தும் முடிந்து நல்ல வாழ்க்கை துவங்கும் நேரம் இது இதை பயன்படுத்தி கொள்ளுங்கள்.
உடல் ஆரோக்கியம் : இதுவரை இருந்துவந்த உடல் கோளாறுகள் நீங்கி தேக ஆரோக்கியம் மிக நன்றாக இருக்கும். குடும்பத்தாரின் உடல் ஆரோக்கியமும் மிக நன்றாக இருக்கும். மனதில் உற்சாகம் வந்து வாழ்க்கையில் நோய் நொடி இனி இல்லை என்ற எண்ணம் மேலோங்கி நிற்கும். தாய் தந்தையர் உடல் நிலை தேறி மருத்துவ செலவுகள் குறைந்துவிடும்.
குடும்பம் மற்றும் உறவுகள் : குடும்ப உறுப்பினர்கள் மற்றும் நண்பர்கள் உங்கள் வளர்ச்சிக்கு பாடுபடுவர் பிரிந்த உறவுகள் நெருக்கமாகிவிடும். சொந்தங்கள் முன் உங்கள் மதிப்பு கூடும். பெரியோர்களின் ஆசீர்வாதங்கள் கிடைக்கும். விவாகரத்து போன்று விஷயங்களால் பாதிக்கப் பட்டவர்களுக்கு புதிய உறவு ஏற்படும். மகன்/மகள் திருமண விஷயமாக முயற்சித்துக் கொண்டிருந்தீர்கள் என்றால் அது கைகூடும் நேரம் இது. இல்லத்தில் சுப நிகழ்வுகளால் குடும்ப உறவுகள் ஒற்றுமை பெருகும். பிள்ளைகளால் பெருமை உண்டாகும். சொந்த பந்தங்கள் உங்களுக்கு உதவ முன்வருவார்கள் மகிழ்ச்சியான குடும்பமாக அமையும்.
உத்தியோகஸ்தர்கள் : இதுவரை உழைத்ததற்கு இனி நல்ல பலன் கிடைக்கும், உத்தியோகத்தில் உயர்ந்த நிலை ஏற்படும் புதிய உத்தியோகம் பெரிய நிறுவனத்தில் நல்ல சம்பளத்தில் கிடைக்கும். சிலருக்கு வெளிநாட்டில் உத்தியோக வாய்ப்பு உண்டாகும். வேலைச் சுமை குறையும். வேலையில் உற்ஸாகமும் உத்வேகமும் இருக்கும். சிலருக்கு பதவி உயர்வு தேடி வரும் புதிய பொறுப்பும் வரும் அதன் மூலம் எதிர்காலம் மிக பலமாக அமைந்துவிடும்.
தொழிலதிபர்கள் / வியாபாரிகள்: நல்ல முன்னேற்றம் லாபம் எல்லாம் உண்டாகும், கூட்டாளிகளால் அதிக நன்மை உண்டாகும். அரசாங்கத்தில் எதிர்பார்த்த உதவி எளிதில் கிடைக்கும். வங்கி கடன் எளிதாக கிடைத்துவிடும். புதிய தொழில் தொடங்க நேரம் இது. முதன் முதலாக தொழில் தொடங்க ஆசைப்படுபவரும் தொழில் தொடங்கினால் நிச்சயம் வெற்றியை பெறலாம் இந்த வருடம் முழுவதும் சாதகமாக இருக்கிறது.
கலைஞர்கள் : புதிய ஒப்பந்தங்கள் தேடி வரும், நண்பர்கள் மூலம் பெரிய உதவி கிடைக்கும், சமூகத்தில் அந்தஸ்து உண்டாகும், அரசாங்க விருது பதவி பட்டம் என்று சிறப்பாக இருக்கும். ரசிகர்களின் ஆதரவு பெருகும், பணப்புழக்கம் தாராளம், விருந்து கேளிக்கைகள் என்று மகிழ்ச்சியாக இருக்கும்.
அரசியல்வாதிகள் : புதிய பதவி நாடி வரும், மேலிடத்தில் செல்வாக்கு பெருகும். தொண்டர்களிடம் உத்வேகம் உண்டாகும் பணவரவு தாராளம் மக்கள் செல்வாக்கு பெருகும். கட்சியில் ஒரு உயர்ந்த அந்தஸ்தைப் பெறுவீர்கள். எதிரிகள் தொல்லை முற்றிலும் நீங்கிவிடும்.
விவசாயிகள் : நல்ல மகசூல் பெருகி வருமானம் அதிகரிக்கும். கால்நடைகளால் அதிக நன்மை உண்டாகும், புதிய சொத்து வாங்கும் எண்ணம் ஈடேறும், வழக்குகளில் சாதக நிலை உண்டாகும். இல்லத்தில் சுப நிகழ்ச்சிகள் நடந்து மகிழ்ச்சியை ஏற்படுத்தும், வீடுவாங்கும் நிலை உண்டாகும்.
மாணவர் : படிப்பில் நல்ல முன்னேற்றம் இருக்கும். வெளிநாட்டு படிப்பு எண்ணம் ஈடேறும், ஆசிரியர் நன்மதிப்பை பெறுவர், பெற்றோர்களின் ஆதரவு உண்டு, போட்டி பந்தயங்களில் வெற்றி உண்டகும், கல்வியால் வளம் பெறுவர் மனதில் உறுதி ஏற்பட்டு மதிப்பெண்களிய பெறுவர்.
பெண்கள் : மகிழ்ச்சிக்கு குறைவு இருக்காது. புதிய ஆடை ஆபரண சேர்க்கை உண்டாகும் சகோதர வகையில் உதவி கிடைக்கும் பிறந்தவீட்டு சீதனம் சிலருக்கு கிடைக்கும், புதிய வீடு குடிபோகும் யோகம் உண்டாகும், பிள்ளைகளால் பெருமையும் கணவரின் அன்பும் நிறைந்து காணப்படும், புனித யாத்திரை சிலர் போகலாம். உழைக்கும் மகளிருக்கு விரும்பிய பதவி உயர்வு சம்பள உயர்வு இடமாற்றம் இவை ஏற்படும் சில பெண்கள் புதிய தொழிலை ஆரம்பிக்கலாம் அதில் விரைவில் வெற்றியை பெறுவர். பண வரவு தாராளம்.
வணங்க வேண்டிய தெய்வமும் நற்செயல்களும் : நரசிம்மரை வழிபடுவது நல்லது. முக்கியமாக ஞாயிற்றுக்கிழமை மற்றும் ப்ரதோஷ நாட்களில் நரசிம்மரை வழிபட்டால் நலம். சுதர்சன சக்ரத்தாழ்வாரோடு ந்ருஸிம்ஹர் சேர்ந்து இருக்கும் கோவில் என்றால் இன்னும் விசேஷம், பானகம் கரைத்து நரசிம்மருக்கு நைவேத்யம் பண்ணி விநியோகம் செய்யவும். ந்ருஸிம்ஹ மந்திரம் சொல்வது நல்லது. சிறப்பாக இருப்பதால் தான தர்மம் ஏழைகளுக்கு உதவுவது சரீர ஒத்தாசை இவை செய்தால் இன்னும் நன்றாக இருக்கும்.
குரு பெயர்ச்சி பலன்கள் – 2018-19 கணித்து வழங்குபவர்…
லக்ஷ்மீ ந்ருஸிம்ஹாச்சாரி
ஸ்ரீசார்வபௌம ஜோதிட நிலையம்
FG,II block , Alsa Green Park ஹஸ்தினாபுரம் மெயின் ரோடு நேரு நகர், குரோம்பேட்டை, Near MIT Gate Phone : 044-22230808
Skype / Whats app : 8056207965
Email.: [email protected]
Contact Timings for fixing appointment –
6 AM to 8 AM & 8.30 PM to 10 PM
