நியூசிலாந்துக்கு எதிரான ‘டுவென்டி-20’ தொடரில் பங்கேற்கும் இந்திய அணியில் தோனி இடம் பிடித்துள்ளார்.
ஆஸ்திரேலியா, நியூசிலாந்துக்கு எதிரான ஒருநாள் தொடரில் பங்கேற்கும் இந்திய அணியில் ரிஷப் பந்த் இடம் பெறவில்லை.
ஆஸ்திரேலியா சென்றுள்ள இந்திய அணி, மூன்று போட்டிகள் கொண்ட ஒருநாள் தொடரில் பங்கேற்கிறது. முதல் போட்டி வரும் ஜன. 12ல் சிட்னியில் நடக்கவுள்ளது. மீதமுள்ள போட்டிகள் அடிலெய்டு (ஜன. 15), மெல்போர்ன் (ஜன. 18) நகரங்களில் நடக்கவுள்ளது.
அடுத்த மாத இறுதியில் நியூசிலாந்து செல்லவுள்ள இந்திய அணி ஐந்து ஒருநாள் (ஜன. 23, 26, 28, 31, பிப். 3) மற்றும் மூன்று ‘டுவென்டி-20’ (பிப். 6, 8, 10) போட்டிகள் கொண்ட தொடரில் பங்கேற்கிறது.
இத்தொடர்களுக்கான இந்திய அணி அறிவிக்கப்பட்டுள்ளது. இதில் ஆஸ்திரேலியா, நியூசிலாந்துக்கு எதிரான ஒருநாள் தொடரில் பங்கேற்கவுள்ள இந்திய அணியில் இளம் விக்கெட் கீப்பர் பேட்ஸ்மேன் ரிஷப் பந்த் தேர்வு செய்யப்படவில்லை. கேப்டனாக கோலி, துணை கேப்டனாக ரோகித் சர்மா தொடர்கின்றனர்.
நியூசிலாந்துக்கு எதிரான ‘டுவென்டி-20’ தொடரில் பங்கேற்கவுள்ள இந்திய அணியில் முன்னாள் கேப்டன் தோனி இடம் பிடித்துள்ளார். இவர் கடைசியாக கடந்த ஜூலை மாதம் இங்கிலாந்துக்கு எதிரான ‘டுவென்டி-20’ போட்டியில் விளையாடினார். அதன் பின் இந்திய அணி விளையாடிய 6 ‘டுவென்டி-20’ போட்டிகளுக்கு இவர் தேர்வு செய்யப்படவில்லை.
ஒருநாள் அணி: விராத் கோஹ்லி (கேப்டன்), ரோகித் சர்மா (துணைக் கேப்டன்), லோகேஷ் ராகுல், ஷிகர் தவான், அம்பதி ராயுடு, தினேஷ் கார்த்திக், கேதர் ஜாதவ், தோனி (விக்கெட் கீப்பர்), ஹர்திக் பாண்ட்யா, குல்தீப் யாதவ், யுவேந்திர சகால், ரவிந்திர ஜடேஜா, புவனேஷ்வர் குமார், ஜஸ்பிரித் பும்ரா, கலீல் அகமது, முகமது ஷமி.
’டுவென்டி-20′ அணி: விராத் கோஹ்லி (கேப்டன்), ரோகித் சர்மா (துணைக் கேப்டன்), லோகேஷ் ராகுல், ஷிகர் தவான், ரிஷாப் பன்ட், தினேஷ் கார்த்திக், கேதர் ஜாதவ், தோனி (விக்கெட் கீப்பர்), ஹர்திக் பாண்ட்யா, குர்னால் பாண்ட்யா, குல்தீப் யாதவ், யுவேந்திர சகால், புவனேஷ்வர் குமார், ஜஸ்பிரித் பும்ரா, கலீல் அகமது.