மதுரை: மதுரையில் எய்ம்ஸ் மருத்துவமனை அடிக்கல் நாட்டு விழா உள்ளிட்ட சில நிகழ்ச்சிகளுக்காக வரும் ஞாயிற்றுக் கிழமை ஜன.27 ஆம் மதுரை வருகிறார் பிரதமர் மோடி! அங்கே பொதுக்கூட்டத்தில் உரையாற்றும் மோடி, தேர்தல் பிரசாரத்தையும் தொடங்கி வைக்கிறார்.
ஜன.27ஆம் தேதி முற்பகல் 11:15க்கு மதுரை விமான நிலையம் வரும் பிரதமர் மோடி, அங்கிருந்து காரில் ரிங் ரோடு மண்டேலா நகர் செல்கிறார். அங்கே எய்ம்ஸ் மருத்துவமனைக்கு அடிக்கல் நாட்டுகிறார். பின்னர், மதுரை – நத்தம் சாலை உயர்மட்ட பாலம் உள்ளிட்ட மத்திய அரசின் தென்மாவட்ட திட்டங்களை தொடங்கி வைக்கிறார்.
தொடர்ந்து, அரசு மருத்துவக்கல்லுாரி மைதானத்தில் கட்டப்பட்ட பல்நோக்கு மருத்துவமனையை திறந்து வைக்கிறார் பிரதமர் மோடி. இந்த அரசு நிகழ்ச்சி முற்பகல் 11:30 மணி முதல் 12:00 மணி வரை நடைபெறுகிறது.
இதை அடுத்து, பாஜக., பொதுக்கூட்டத்தில் மதியம் 12:05 மணி முதல் 12:50 மணி வரை உரையாற்றுகிறார். பொதுக்கூட்டம் முடிந்ததும் மதியம். 1:10க்கு விமான நிலையம் சென்று அங்கிருந்து கட்சி நிர்வாகிகளுடன் ஆலோசிக்கிறார். பின்னர் மதிய உணவை முடித்துக் கொண்டு 1:55க்கு கொச்சிக்கு புறப்பட்டுச் செல்கிறார். பிரதமரின் மதுரை சுற்றுப் பயண நிகழ்ச்சி நிரல் அதிகாரபூர்வமாக நேற்று வெளியானது.
