திமுக தலைவர் கருணாநிதியும், பொருளாளர் ஸ்டாலினையும், மட்டும் கேள்வி கேட்கும் பத்திரிக்கையாளரை நாங்கள் காறித் துப்ப நினைத்தோம். ஆனால் அதற்கு முன் விஜயகாந்த் காறி துப்பி விட்டார். பாராட்டதக்கது என திமுக தலைமை கழக பேச்சாளர் மனுஷ்யபுத்திரன் பேசியது பரபரப்பை ஏற்படுத்தியது.

மதுரை மாவட்டம் திருமங்கலம் தேவர்திடலில் அதிமுக ஆட்சியின் அவலத்தை மக்களிடையே விழிப்புணர்வு ஏற்படுத்தும் பொதுக்கூட்டத்தில் திமுக தலைமை கழக பேச்சாளர் மனுஷ்யபுத்திரன் பங்கேற்று சிறப்புரை ஆற்றியபோது பேசியதாவது :-

சென்னையில் கடந்த ஒரு மாதத்திற்கு முன்பு கடும் வெள்ளத்தில் சிக்கி பல லட்சம் மதிப்புள்ள பொருள் இழப்பு அடைந்த மக்களுக்கும் உயிரிழந்தவர்களுக்கும் முதலமைச்சர் ஜெயலலிதா ரூ.5000 வழங்கியது ஈமச்சடங்கிற்கா எனவும் மக்கள் இதற்கு தக்கபாடத்தை வரும் தேர்தலில் அதிமுகவின் முகத்திரையை கிழித்து வெளிப்படுத்துவார்கள் .இன்றைக்கு குற்றவாளி என்ற முத்திரையை அதிமுக மீது மக்கள் குத்தியுள்ளனர்.

அதிமுக ஆட்சியை மீண்டும் வரவழைத்தால் மக்கள் தங்களைத் தாங்களே தற்கொலை செய்து கொள்வதற்கும், தங்கள் முகத்தில் செருப்பா ல் அடித்துக் கொள்வதற்கும் சமம் எனவும் அதிமுக அரசுக்கு சாதகமாக மறைமுகமாக செயல்பட்டு வரும் 3வது அணியை மக்கள்தூக்கி எறிவார்கள் எனவும் ஜாதிக்கட்சியை வளர்த்து தாங்கள்தான் முதலமைச்சர் என தப்பட்டம் அடித்துவரும் கட்சியையும் மக்கள் விரட்டியடிப்பார்கள் எனவும் பேசினார்.

மேலும் சென்னையில் விஜயகாந்த் பத்திரிக்கையாளர்கள் சந்திப்பில் தூ என காறி துப்பியது சரியானது எனவும் அவர் காறி துப்பவில்லை என்றால் நாங்களே காறிதுப்புவதாக இருந்தோம் எனவும் மனுஷ்யபுத்திரன் பேசினார்.

இக்கூட்டத்தில் முன்னாள் சபாநாயகர் சேடபட்டி முத்தையா, தெற்கு மாவட்ட செயலாளர் மணிமாறன், மாவட்ட துணை செயலளர் முருகன், முன்னாள் சட்டமன்ற உறுப்பினர்கள் சாமிநாதன், லதாஅதியமான் உள்ளிட்ட திமுக நிர்வாகிகள் மற்றும் தொண்டர்கள் கலந்து கொண்டனர். கூட்த்தில் கலந்து கொண்டவர்களுக்கு திமுக நகர செயலாளர் நாகராஜன் நன்றி தெரிவித்தார்.

பத்திரிக்கையாளரை நாங்கள் காறி துப்பம் முன் விஜயகாந்த் காறி துப்பிவிட்டார் என திமுக தலைமை கழக பேச்சாளர் மனுஷ்யபுத்திரன் பேசிய காணொளி இந்த செய்தியுடன் இணைக்கப்பட்டுள்ளது.

சிவகுமார், செய்தியாளர்

புது தில்லி:

தில்லி ரயில் நிலையத்துக்கு இன்று காலை இமெயில் மூலம் வெடிகுண்டு மிரட்டல் அனுப்பப்பட்டுள்ளது. அதில், தில்லி-கான்பூர் ரயிலை குண்டு வைத்து தகர்க்கப் போவதாக மிரட்டல் விடுக்கப்பட்டுள்ளது. இந்தத் தகவல் மும்பை பயங்கரவாத தடுப்புப் பிரிவுக்கு அனுப்பி வைக்கப்பட்டது. தொடர்ந்து, லக்னோ சதாப்தி ரயில் காஜியாபாத் ரயில் நிலையத்தில் நிறுத்தப் பட்டு, முழுதும் சோதிக்கப்பட்டது. அதில் அச்சப்படும் படியான எந்தப் பொருளும் இல்லை என வடக்கு ரயில்வே சிஇஓ நீரஜ் சர்மா தெரிவித்தார்.

வெடிகுண்டு மிரட்டலை அடுத்து தில்லியில் பல ரயில்கள் நிறுத்தி வைக்கப்பட்டன. பல ரயில்கள் ஆங்காங்கே நிறுத்தப்பட்டு, பின்னர் தாமதமாக இயக்கப்பட்டன. ரயில் நிலையங்களில் பலத்த பாதுகாப்பு சோதனைகள் மேற்கொள்ளப்பட்டன. இவற்றால், பயணிகள் கடும் அவதிக்கு ஆளாகினர்.

இந்நிலையில், இது புரளி எனத் தெரியவந்தது. இதை அடுத்து, ரயில்கள் வழக்கம்போல் குறித்த நேரத்தில் சென்றடைய ரயில்வே நிர்வாகம் முயற்சி எடுத்தது.

பதான்கோட் தாக்குதலை அடுத்து, இந்த மிரட்டல் வந்ததால், ரயில்வே துறை மிக கவனமாக இந்த மெயிலை அணுகி, சோதனைகளை மேற்கொண்டு வருகிறது.

சென்னை:

அதிமுக துணை கொள்கை பரப்புச் செயலாளர் பதவியிலிருந்து நாஞ்சில் சம்பத் நீக்கப்படுவதாக முதலமைச்சரும், அக்கட்சியின் பொதுச் செயலாளருமான ஜெயலலிதா அறிவித்துள்ளார்.

இது தொடர்பாக அவர் விடுத்துள்ள அறிக்கையில், அதிமுக கொள்கை பரப்புச் செயலாளர் பதவியிலிருந்து நாஞ்சில் சம்பத் விடுவிக்கப்படுகிறார் என தெரிவித்துள்ளார்.

நாஞ்சில் சம்பத் பதவி பறிப்புக்கு, அவர் தனியார் தொலைக்காட்சிகளில் பங்கேற்ற நேர்காணல் நிகழ்ச்சியில் கட்சிக்கு சங்கடத்தை ஏற்படுத்தும் விதமாக அளித்த சில பதில்களே காரணம் எனக் கூறப்படுகிறது.

அவர் புதிய தலைமுறை செய்தி சேனலுக்கு அளித்த பேட்டியின்போது, வெள்ளம் பாதித்த நிலையிலும், அதிமுக பொதுக்குழு கூட்டம் கோலாகலமாக நடைபெற்றதே என்ற கேள்விக்கு, சாவு வீட்டுக்காக கல்யாணங்கள் நடக்காமலா இருக்கிறது என்று அலட்சியமாக பதிலளித்துள்ளார்.

இந்நிலையில், தொடர்ந்து தந்தி தொலைக்காட்சி கேள்விக்கு என்ன பதில் நிகழ்ச்சிக்காக, ரங்கராஜ் பாண்டே கேள்விகளுக்கு, நாஞ்சில் சம்பத் பதில் கொடுத்துள்ளார். அதன் ப்ரமோ வீடியோ அத்தொலைக்காட்சியில் காண்பிக்கப்பட்டு வந்தது. இந்த டிவியிலும், நாஞ்சில் கூறிய பதில்கள் சர்ச்சைக்கு உரியதாக இருந்தது.

பெருவெள்ளம் புரட்டிப் போட்ட பிறகு பொதுக்குழு கூட்டம் கோலாகலமாக, கொண்டாட்டமாக நடக்கும்போது சரியா என்ற விமர்சனம் முன்வைக்கப்படுகிறதே என்று கேள்விக்கு நாஞ்சில் சம்பத், ‘எறும்புகள் சாகிறது என்பதற்காக யானை நடக்காம இருக்க முடியுமா’ என்று பதில் சொல்லும் காட்சியும் காண்பிக்கப்பட்டது.

வெள்ளத்தில் உயிரிழந்த 500 பேரை ஏன் கண்டுகொள்ளவில்லை, அதிமுக பொதுக்குழுவில் அதுதொடர்பாக ஏன் தீர்மானம் நிறைவேற்றவில்லை? என்ற கேள்விக்கு, தேவையில்லை, நிறைவேற்றவில்லை என்று நாஞ்சில் பதிலளிப்பது போல காட்சி ஒளிபரப்பானது.

இந்தப் பேட்டிகள் உண்டாக்கிய கசப்பு உணர்வுகள் பரவுவதற்கு முன்னரே, அதிரடி நடவடிக்கை எடுக்கப்பட வேண்டும் என்பதற்காகவே நாஞ்சில் சம்பத் பதவியைப் பறித்திருக்கிறார்கள் என்று சொல்லப்படுகிறது!

ஜெட் வேகத்தில் கட்சியில் பதவியைப் பிடித்த நாஞ்சில் சம்பத், ராக்கெட் வேகத்தில் அதை இழந்துள்ளார் என்று சமூக வலைத்தளங்களில் பேசப்பட்டு வருகிறது.

முன்னர் மதிமுக., வில் இருந்தபோது, ஜெயலலிதாவை அதிகம் விமர்சித்தவர் இவர். பின்னர் வைகோ.,வுடன் ஏற்பட்ட கசப்புணர்வில் கட்சியில் இருந்து நீக்கப்பட்டு வெளியில் வந்தவர் அதிமுகவில் போய்ச் சேர்ந்தார். அவருக்கு கட்சியில் துணை கொள்கை பரப்புச் செயலர் பதவியும், ஒரு இன்னோவா காரும் வழங்கப்பட்டது. முதலமைச்சரின் கையால் அவர் பெற்றுக் கொண்ட இன்னோவா கார் சாவி குறித்த படங்கள் அப்போது சமூக வலைத்தளங்களில் பெரிதும் பகிரப்பட்டு, பலத்த விமர்சனத்துக்கு உள்ளானார் நாஞ்சில் சம்பத்.