பகல் பத்து -நான்காம் திருநாள் (14-12-15 விவரம்)
2 அரையர் சேவைகளும்,கம்சவதமும்…..

நம்பெருமாள் வழக்கம் போல்,புறப்பட்டு அர்ஜுன மண்டபம் எழுந்தருளி ,ஆழ்வார் மற்றும் ஆச்சாரியர்களுக்கு
மரியாதை ஆகி உகப்புடன் சேவை சாதிப்பார்…

பகல்பத்து-மூன்றாம் திருநாள்…(விவரமும்)
நம்மாழ்வார் சந்நிதியில் மதுரகவியாழ்வார் ,மூலமாக ஆழ்வார்கள்,ஆச்சாரியர்களுக்கு,நடைபெறும் மரியாதைகளும்…

நம்பெருமாள் வழக்கம் போலவே ,இந்த பகல்பத்து
உற்சவத்தின் 3 ம் திருநாளில் (13-12-15) காலை
சிம்ஹ கதியில் புறப்பாடு கண்டருளி,
மேலைப்படி மரியாதை ஆகி, சேனைமுதலியாருக்கும், மரியாதைகள் நடந்து,கிளிமண்டபம் படியேற்றம் ஆகி,
துலுக்க நாச்சியாருக்கு சேவை சாதித்து, தாம்பூலம் பெற்றுக்கொண்டு,அரையர்களின் தாளத்துடன் பகல்பத்து மண்டபத்தில் (அர்ஜுன மண்டபத்தில்) ஆழ்வார்கள், ஆச்சாரியர்கள்,அரங்கனின் அடியார்கள் புடைசூழ,வீற்றிருப்பார்.

ஸ்ரீ வைகுண்டத்தில், எம்பெருமான் எவ்வாறு, ஆழ்வார்கள், ஆச்சாரியர்கள்,முமுக்ஷுக்கள்,நித்யசூரிகள் புடைசூழ,
நாலாயிர திவ்ய பிரபந்தத்தினை கேட்டு மகிழ்வானோ,
அவ்வாறே, பூலோக வைகுண்டமான திருவரங்கத்திலும்,
இந்த பகல்பத்து விழா நடைபெறும் அர்ஜுனமண்டபத்தில், அரங்கனும் வீற்றிருப்பார்…

இன்றைய தினம்,அரையர் சேவையில்,
பெரியாழ்வார் திருமொழி இறுதிப்பதிகமான,
“சென்னியோங்கு” பதிகம் மற்றும்”நாச்சியார் திருமொழியில்”,
12 ம் பதிகம் ஈறாக,சேவிக்கபடும்.

“சென்னியோங்கு” (பெரியாழ்வார் திருமொழி) மற்றும்
மார்கழித் திங்கள் (ஆண்டாள் அருளிச்செய்த
திருப்பாவையின் 1ம்பாடல் )ஆக, இரண்டு பாசுரங்களுக்கும், அபிநய வியாக்கியானங்கள்.நடைபெறும்.அரையர் ஸ்வாமிகளால் “மார்கழித் திங்கள்” பாசுரத்திற்கு வியாக்கியானம் ஆகும் போது,கோஷ்டியார் நின்றுகொண்டு இருப்பார்கள்..

“சென்னியோங்கு” பாசுரங்களுக்கு,அபிநய வியாக்கியானங்கள் ஆகி,அபிநயம் முன்னதாகவும்,பாசுரம் பின்னதாகவும்,அந்தத் திருமொழி முழுவதும் சேவிக்கப்படும்.

“சென்னியோங்கு” 7 வது பாசுரத்தில்,
“திருப்பொலிந்த சேவடி எஞ்சென்னியின் மேல்பொறித்தாய்” என்பது வரை,அரையர் ஸ்வாமிகள் சேவித்து, நிறுத்தி, நம்பெருமாள் திருவடிகள், தலைமேல் ஸ்தாபிக்கப்பெற்ற, பெரியாழ்வார் பெற்ற பேறு, அடியார்கள் எல்லோருக்கும் கிடைக்குமாறு,அரங்கனைப் பிரார்த்தித்து, அரையர் ஸ்வாமிகள், நம்பெருமாளின்(ஸ்ரீசடாரி) திருவடிகளைத் தம்முடைய ஸிரஸில் தரித்து வந்து, ஆழ்வார் ஆச்சாரியர்கள், கோஷ்டிக்கும், மற்றையோருக்கும் சாதிப்பார்கள்.இன்று அரையர்கள் தீர்த்தம் சாதிப்பது இல்லை.

(பெரும்பாலும்இந்த பகல்பத்து இராப்பத்து உற்சவங்கள் மார்கழி மாதத்தில் தொடங்கப்பெறும், இந்த மன்மத வருடம் போல்,
(2015) சில சமயங்களில்,மார்கழிமாதம் தொடங்கி 1 வாரத்திற்குள் “வைகுண்ட ஏகாதசி” வந்து விடுவதால், கார்த்திகை கடைசி வாரத்தில் பகல்பத்து உற்சவம் ஆரம்பிக்கப்படும்.காரணம் 20 நாட்கள் கொண்ட இந்த உற்சவத்தின்,11 வது நாளில்,வைகுண்ட ஏகாதசி ,கொண்டாடப்பட வேண்டும் என்பதற்காகவே)

பிறகு,மார்கழித்திங்கள் பாசுரத்தின் வியாக்கியானம் பூர்த்தியானதும்,ஆண்டாள்நாச்சியாரின் மனோரதத்தினைப் பூர்த்தி செய்து,”கோயிலண்ணர்” “திருப்பாவைஜீயர்” என்று பிரஸித்தி பெற்ற,ஸ்வாமி ராமானுஜர் சந்நிதியில் இருந்து,
பகல்பத்து மூன்றாம் திருநாளான இன்று,அரையர் ஸ்வாமிகளுக்கு “பஹுமாணம்” அனுப்பி வைக்கப்படும்.

அதுதவிர,திருப்பாவை பிரபந்தத்துக்கு ஏற்ப்பட்ட
“விட்டவன் விழுக்காடு”பகல் பத்து மூன்றாம்திருநாளான
இன்று “உடையவர்”சந்நிதிக்கே அனுப்பபடும்…

பிறகு வழக்கம் போல் நிவேதனம்.. விநியோகம்,,, ஆழ்வார்களும்,ஆச்சாரியர்களும் ஸ்ரீசடகோப (ஸ்ரீ சடாரி) மரியாதை ஆகி,உத்தர தினசரியா,பராங்குச பஞ்சவிம்சதி,
நக்ஷத்ர மாலிகா,முதலான ஸ்தோத்தர பாட கோஷ்டியோடு,
பகல் பத்து மண்டபத்தில் இருந்துபுறப்பட்டு,நம்மாழ்வார் சந்நிதிக்குப் போவார்கள்.

அங்கே நம்மாழ்வார் மாத்திரம்,தம்முடைய சந்நிதிக்குள் சென்று,தம்முடைய ஆஸ்தானத்தில் எழுந்தருளுவார். நம்மாழ்வார் சந்நிதியின் வெளியே நின்று சேவை சாதிக்கும், மற்றைய ஆழ்வார்களுக்கும்,ஆச்சாரியர்களுக்கும் மதுரகவியாழ்வார் செய்து வைக்கும் பாவனையாக,
கற்பூர ஆரத்தி நடைபெறும்.

பிறகு நம்மாழ்வாரின் பூமாலையில் ஒன்றைப்
பெரியாழ்வாருக்கு சாதிப்பார்கள்.எல்லா ஆழ்வார்களுக்கும், ஆச்சாரியர்களுக்கும்,நம்மாழ்வாரின் ஸ்ரீ சடரியான
மதுரகவிகள் சாதிக்கப்படும்..

உடனே பெரியாழ்வார்,உடையவர்,கூரத்தாழ்வான்,
பிள்ளை லோகாச்சாரியார் இவர்கள் நால்வர் தவிர,
இதர ஆழ்வார்கள்,ஆச்சாரியர்கள் அவர்களின்
சந்நிதிகளுக்கு எழுந்தருளுவார்கள்…

இந்த நால்வரும் புறப்பட்டு,கார்த்திகை கோபுர வாசலுக்கு வெளியே,(ஆலய அலுவலகத்தின்அருகில்) கிழக்கு முகமாக எழுந்தருளும் பெரியாழ்வார் ,எதிரில்,கூரத்தாழ்வான்,
பிள்ளை லோகாச்சாரியார்களுக்கு மத்தியில், மேற்கு முகமாக இருக்கும் உடையவருக்கு, நம்மாழ்வார் தமக்கு சாதித்த பூமாலையை,சாதித்தபிறகு, பெரியாழ்வார் தம்முடைய
சந்நிதிக்கு எழுந்தருளுவர்.

பிறகு உடையவர்,கிழக்கு முகமாகத் திரும்பி,தமக்கு முதலில் நம்மாழ்வாரும்,பிறகு பெரியாழ்வாரும்,சாதித்த மாலைகளில், ஒன்றை ,கூரத்தாழ்வானுக்கு சாதித்து,அவரை சந்நிதிக்கு
அனுப்பி வைப்பார்…

பிறகு உடையவர்,மற்றொரு மாலையை பிள்ளை லோகாச்சாரியாருக்கு சாதித்து,அவரோடும்,ஸ்தோத்தர பாட கோஷ்டியினரோடும்,புறப்பட்டு, தங்களுடைய சந்நிதிக்கு உடையவரும்,பிள்ளை லோகாச் சாரியரும் எழுந்தருளுவார்கள்.

உடையவர் ஆஸ்தானத்திற்கு எழுந்தருளிய பிறகு,
அடியார்களின் கோஷ்டிக்கு,தீர்த்த பிரஸாத விநியோகம் ஆகும். இதுவரை பெருமாள்,அன்றைய உபயதாரர்களுக்கு சேவை மரியாதை அணுக்ரஹித்து,தோளுக்கினியானில் (பல்லக்கு) எழுந்தருளி,உடையவர் கோஷ்டியில் இருந்து,
சேவார்த்திகள் மற்றும் கைங்கர்ய பரர்கள் வரும்வரை
காத்திருந்து,அதன்பிறகே வழக்கம் போல் புறப்பட்டு,பத்தி உலாத்துதல் ஆகி, ஸர்ப்ப கதியில்,மூலஸ்தானம் திரும்புவார்…..

கட்டுரை: ஶ்ரீரங்கம் மாலு

இன்று பகல் பத்து -இரண்டாம் திருநாள் …(விவரம்)
அரங்கன் மகிழும் அத்யயன உற்சவம் ….

அத்யயன உற்சவத்தின் (பகல் பத்து ) முதல் திருநாளினைப் போலவே,அனைத்து வைபவங்களும் நடைபெறும்.இந்த
இரண்டாம் திருநாளில் (12-12-15) மாற்றம் என்னவென்றால், நம்பெருமாள் சாற்றிக்கொள்ளும் திருவாபரணங்களும்,
(நகைகள்) அரையர் சேவை பாசுரங்கள் மட்டுமே…

இந்த பகல் பத்து உற்சவம் முழுவதும்,நம்பெருமாள்
ஒருநாளுக்கு ஒருஒரு விதமான,கபாய்(அங்கி) சாற்றியும்,
பல விதமான திருவாபரணங்கள் சாற்றிக்கொண்டும்,கிரீடம்
அல்லது குல்லாய், ராஜமுடி அல்லது சவுரிமுடி, வைரமுடி இவைகளையும்,

செங்கழுநீர் பூக்களாலும்,கதிர்பச்சை இலைகள் கலந்த பூச்செண்டை,பின்புறம் முடிச்சில் திருக்குழல் கற்றையாக சாற்றிக்கொண்டு,மதுரகவிஸ்வாமிகளின் ,பிருந்தாவனத்தில்
இருந்து மட்டுமே அரங்கனுக்காக,நியமத்தோடும்,பக்தியோடும்
தயார் செய்யப்படும் பூமாலைகளையும் சாற்றிக்கொண்டு
சேவை சாதிப்பார்….

நம்பெருமாள் திருவாபரணங்கள் பலவற்றை ,இந்த உற்சவத்தின் ஒவ்வொருநாளும் சாற்றிக்கொண்டு,சிம்ம கதியில் கருவறையில் (காயத்ரி மண்டபத்தில்) இருந்து புறப்பாடு கண்டருளுவார்.

(சிம்மம்-சிங்கம்.ஸிம்ஹ கதி- சிங்கநடை )

அவ்வாறு புறப்பாடு கண்டு வெளியில் வரும் சமயம், சந்தனமண்டபத்திற்கு,எழுந்தருளியவாறே,இரண்டடி ஒய்யார நடையிட்டு,தன்னுடைய பரத்வத்தை வெளிபடுத்துகிறார்…

நம்பெருமாள் சிம்ம கதியில்(சிங்கநடை போட்டு)
மூலஸ்தானத்தில் இருந்து புறப்பட்டு, சந்தனமண்டபத்திற்கு
வரும் முன்,வேத்ர பாணிகளாகிய,(பாதுகாவலர்கள்)
சாத்தாத ஸ்ரீ வைஷ்ணவர்கள் கட்டியம் சேவிப்பர்….

(கட்டியம் = கட்டு + இயம். மன்னர் மரபு, அவரின் வெற்றி, புகழ் முதலியவற்றைக கட்டிக் கூறுதல்.அரங்கன் ஸ்ரீ ரங்கராஜன் ஆகையாலே,அரங்கனுக்கும் கட்டியம் கூறப்படுகிறது )

முதலில் வடமொழியான ஸம்ஸ்க்ருதத்தில் ஒருகட்டியமும்,
பிறகு தமிழ்மொழியில் ஒருகட்டியமும் சேவிப்பார்கள்….
அந்த கட்டியம் இதோ…..

“ஸ்ரீ யதி புரந்தராபராவதாரபூத ஸ்ரீவரவரமுநி ஸமுபந்யஸ்த

த்ராமிட ப்ரம்ஹ ஸம்ஹிதா ஸஹஸ்ர ஸாகா வ்யாக்யாந ஸ்ரவண ப்ரகுணித பரமாநந்த

பாரவஸ்ய ப்ரக்யாபித ததாசார்யபாவ ரங்கேஸ்வரா
எச்சரீகை…|

மன்னியசீர் மணவாளமாமுனி ஈடுரைப்பது கேட்டு
பின்னொரு ஸ்ரீசைலேசா எனப்பேசுமரங்கா, எச்சரீகை ||

என்று கட்டியம் கூறுவார்கள் ….

பிறகு ,மேலைப்படியில் கோயிலின் ஸ்தலத்தார்களுக்கும்,
தீர்த்த மரியாதை உரிமை உடையவர்களுக்கும்,மரியாதைகள் நடைபெறும்.

பிறகு நம்பெருமாள் மேலைப்படியை விட்டு கீழே இறங்கி,
வடக்கு நோக்கி எழுந்தருளி இருப்பார்.அப்போது அரங்கனின் அரையர்களை நோக்கி,
“இசையறியும் பெருமாள் கூட்டத்தார்” என்ற “அருளப்பாடு” சாதிக்கப்படும்.பெருமாளின் அனுமதி பெற்ற பின்னரே இது தொடங்கும்.இந்த அனுமதிக்கு அருளப்பாடு என்று பெயர்.
இது கிடைத்தவுடன் அரையர்கள் “நாயிந்தே’ என்று கூறி,
உடனே அரையர் ஸ்வாமிகள், தாளத்தோடு,இசையை தொடங்குவார்கள்…

இதன்பிறகு,நம்பெருமாள் சேனைமுதலியார் சந்நிதியின்,
முன்புறம் எழுந்தருளி, சேனை முதலியாருக்கு மரியாதைகள் நடைபெறும்.பிறகு பகல்பத்து (அர்ஜுன)மண்டபத்தின்
முன் பகுதியில் உள்ள, கிளிமண்டபத்தில் நம்பெருமாள்
படியேற்ற சேவை ஆகும்.

கிளிமண்டபத்தில் “சாரீயோம்” என்ற அருளப்பாடு சாதிக்கப்பட்ட உடனே, நட்டு முட்டு வாத்தியங்கள் முழங்கப்படும்.

“சாரீயோம்” என்ற அருளப்பாடு,நல்ல குரல்வளம் படைத்த நட்டுவாங்கனை நோக்கி கூறப்படுவதாகும்.ஒருகாலத்தில் (முற்காலங்களில்) கிளிமண்டபத்தில் நம்பெருமாள் எழுந்தருளியவுடன்,நல்ல குரல்வளம் மிக்க நட்டுவாங்கன் பாட, வாத்தியங்கள் முழங்க,தாஸிகள் நர்த்தனம் ஆடி வருவார்களாம்.
1953 ம் ஆண்டு,தாஸிகள் ஒழிப்புச் சட்டத்தின் படி,இத்தகைய இசையுடன் கூடிய நடனங்கள் நின்று போயிற்று…

(குறிப்பு- தாஸிகள் என்றால்,அரங்கனை தலைவனாக
ஏற்ற,அரங்கனுக்கு மட்டுமே கைங்கர்யங்கள் (சேவைகள்)
செய்கின்ற பெண் அடியார்கள்…ஆனால் காலப்போக்கில்
இதற்கு தவறான,அனர்த்தமான பொருளுடன், சில அர்த்தம் புரியாதவர்களால், வேறு அர்த்தங்கள் பரப்பப்பட்டது…
அரங்கனை அன்றைய துலுக்க ராஜாக்களிடம் இருந்து
காப்பாற்றியது “வெள்ளையம்மாள்”என்னும் பேரழகியான,
இந்த நடன கூடத்தினைச்சேர்ந்த ஒரு தாஸிதான் என்பது வரலாறு.அரங்கனை கொள்ளை அடிக்கவும்,ஆலயத்தை கைப்பற்றவும் வந்த துலுக்க அரசனை, கோபுரத்தின் மேலே அழைத்துச் சென்று,தள்ளிவிட்டு கொலைசெய்து,தானும்
உயிரை மாய்த்துக்கொண்ட,தாஸி வெள்ளையம்மாளின்
அரங்கனுக்காக செய்த,தியாகத்தையும் ,சேவையையும் ,
துலுக்க அரசனைக் கொன்று,தானும் தற்கொலை செய்து
கொண்ட,நிகழ்வை குறித்தே, அரங்கனின் கிழக்கு வாயிலின் கோபுரத்திற்கு “வெள்ளை கோபுரம்” என்ற பெயர் அன்றிலிருந்து இன்றும் அழைக்கப்படுகிறது.தாஸி என்பவர்கள்
எம்பெருமானுக்கு மட்டுமே ,சேவகம் செய்பவர்கள்
என்பதை மனதில் கொள்க.வேசி என்ற வார்த்தையும்,
தாஸி என்ற வார்த்தையும் வேறு உவமைகளைச் சொல்லும் )

பிறகு,நம்பெருமாள், கிளிமண்டபத்தில் இருந்து படியேற்றம் ஆகி, அர்ஜுன மண்டபத்தின் உள்ளே நுழைவார்..அதன்பிறகு
நம்பெருமாள் “சுரதானி” என்னும் துலுக்க நாச்சியார் சந்நிதிக்கு எதிரில்,படியேற்றசேவை சாதித்து,.அங்கே சித்திர ரூபமாக (ஓவியமாக) எழுந்தருளி இருக்கும்,”சுரதானி” என்னும்
துலுக்க நாச்சியார் முன்பு,சேவை சாதிப்பார்…அரையர்கள் கொண்டாட்டம் ஆனபிறகு,பகல்பத்து உற்சவம் நடைபெறும் அர்ஜுனமண்டபத்திற்கு ,நம்பெருமாள் எழுந்தருளியிருப்பார்.

நம்பெருமாள் அர்ஜுன மண்டபத்தில் (பகல்பத்துமண்டபம்) எழுந்தருளியிருக்கும் போது,கீழ்க்கண்டவாறு,
ஆழ்வார்களுக்கும்,ஆச்சார்யர்களுக்கும்,அருளப்பாடு சாதிக்கப்படும்.

திருநாளுடையபிரான்,(கலியன்) ராமானுசன், பட்டர்பிரான், மதுரகவி,பொய்கை,பூதம்,பேயார்,சேரன்,பாணன்,
தொண்டரடிப்பொடி,மழிசை,நம்பி,ஆழ்வான்,
பிள்ளைலோகாச்சாரியாருக்கு அருளப்பாடு என்று,
அரங்கன் ஆலய ஸ்தாநீகர் அருளப்பாடு சாதிப்பார்….
ஆழ்வார் ஆச்சாரியர்களுக்கு மரியாதைகள் நடைபெறும்…

அதன் பிறகு பெரியாழ்வார் திருமொழியில் இருந்து,பாசுரங்கள் பெரியாழ்வார் திருமொழி” துக்கச்சுழலை” என்று தொடங்கும்,
பாசுரம் தொடங்கி,மொத்தம் 250 பாசுரங்கள், அரையர் ஸ்வாமிகளால்,அர்ஜுன மண்டபத்தில்,அரங்கன் கேட்டு மகிழ்வார்….

அந்த பெரியாழ்வார் திருமொழி பாசுரங்களில் “ஆற்றிலிருந்து” எனத்தொடங்கும் பாசுரத்திற்கும்,”தன்னேராயிரம்” எனத்
தொடங்கும் பாசுரத்திற்கும்,இந்த இரண்டு பாசுரங்களுக்கும்,
அரையர் ஸ்வாமிகள் அபிநயம் மற்றும் வியாக்கியானங்கள் சேவிப்பர்….

அரையர்களின் தாளத்துடன் ,அரங்கன் பாசுரங்களைக் கேட்டு
மகிழ்ந்த பிறகு, அரங்கனுக்கு நிவேதனம் நடைபெறும்.
நிவேதன விநியோகங்களும் நடைபெறும்.
அர்ஜுன மண்டபத்தில்(பகல்பத்து) ஆழ்வார்கள் மற்றும்
ஆச்சாரியர்களுக்கு மரியாதைகள் நடைபெறும்.அதன் பிறகு,
ஆழ்வார் ஆச்சாரியர்கள், ஸ்தோத்திரபாட கோஷ்டிகளுடன்,
தங்களுடைய சந்நிதிகளுக்கு எழுந்தருளுவார்கள்.

நம்பெருமாள் வழி நடை உபயங்கள் கண்டருளி,
ராஜமஹேந்திரன் திருச்சுற்றில் உள்ள “மீனாட்சி மண்டபத்தில்”
தீர்த்த கோஷ்டி நடைபெறும்.சிறிது நேரம் நம்பெருமாள்,
“பத்தி உலாத்துதல்” ஆகி, மேலப்படியில் படியேற்றம் ஆகி, திருவந்திக்காப்பு (ஒருவித ஆரத்தி) கண்டருளுவார்.
பிறகு நம்பெருமாள் ஸர்ப்ப கதியில், கருவறைக்குள் (காயத்ரிமண்டபம்) எழுந்தருளுவார்.

அரங்கன் இந்த திருநாள்களில், காலையில் கருவறையில்
இருந்து, ஸிம்ஹ கதியில் புறப்படுவார்.
(ஸிம்ஹம்-சிங்கம்,ஸிம்ஹகதி-சிங்கநடை)

அரங்கன்(நம்பெருமாள்) அர்ஜுன மண்டபத்தில் இருந்து,
புறப்பாடு கண்டருளும்போது,கஜகதியில் பத்தி உலாவுவார்.
(கஜம்-யானை,யானையைப் போல் நடந்து சேவை சாதிப்பார்.
இதற்கு கஜகதி என்று பெயர்)

ஸர்ப்ப கதியில் நம்பெருமாள் மூலஸ்தானத்திற்கு எழுந்தருளுவார்..(சர்ப்பம்-பாம்பு-சர்ப்பகதி-பாம்பினைப்போல் ஊர்ந்து சேவை)..

ரங்கா ரங்கா ரங்கா…