திருவண்ணாமலை மாவட்டம் அண்ணாமலையார் திருக்கோயிலில் கார்த்திகை தீபத் திருவிழாவை முன்னிட்டு, வரும் டிச.10ஆம் தேதி உள்ளூர் விடுமுறை விடப்படும் என்று மாவட்ட ஆட்சியர் கந்தசாமி அறிவித்துள்ளார்.
திருவண்ணாமலை அண்ணாமலையார் திருக்கோயில் கார்த்திகை தீபத் திருவிழா டிசம்பர் 1ஆம் தேதி கொடியேற்றத்துடன் தொடங்கியது.
தீபத் திருவிழா வரும் 14 ஆம் தேதி வரை நடைபெறுகிறது. வரும் 10ஆம் தேதி அண்ணாமலை மலை உச்சியில் மகாதீபம் ஏற்றப்படும். இந்த தீபத் திருவிழாவைக் காண 25 லட்சம் பக்தர்கள் வருவார்கள் என எதிர்பார்க்கப்படுகிறது. இந்நிலையில் பக்தர்களின் வசதிக்காக மாவட்ட நிர்வாகம் பல்வேறு நடவடிக்கைகளை செய்து வருகிறது.
பாதுகாப்பினை முன்னிட்டு, காவலர்கள் மற்றும் அதிகாரிகள் என 9,000 பேர் பாதுகாப்பு பணியில் ஈடுபடுத்தப்படவுள்ளனர்.
தீபத் திருவிழாவை முன்னிட்டு, திருவண்ணாமலை மாவட்டத்தில் உள்ள பள்ளி, கல்லூரிகள் மற்றும் அனைத்து அரசு அலுவலகங்களுக்கும் உள்ளூர் விடுமுறை அறிவிக்கப் பட்டுள்ளது. இந்த விடுமுறை தினத்தை ஈடுசெய்யும் வகையில் டிசம்பர் 21- ஆம் தேதி வேலை நாளாக செயல்படும் என்று ஆட்சியர் வெளியிட்டுள்ள செய்திக் குறிப்பில் தெரிவிக்கப்பட்டுள்ளது.
