புது தில்லி:

ஆப்கானிஸ்தானில் இன்று மதியம் ரிக்டர் அளவுகோலில் 5.8 என்ற அளவில் நிலநடுக்கம் ஏற்பட்டது. இதன் காரணமாக இந்தியாவின் வட மாநிலங்களில் நில அதிர்வு உணரப்பட்டது.

ஆப்கானிஸ்தானின் இன்று மதியம் 2.07 மணிக்கு நிலநடுக்கம் உணரப்பட்டது. இந்துகுஷ் மலைப் பகுதியில் நிலநடுக்கத்தின் மையம் அமைந்திருந்தது. இது ரிக்டர் அளவு கோலில் 5.8 ஆகப் பதிவாகியிருந்தது. இத்தகவலை இந்திய வானிலை ஆய்வு மையம் தெரிவித்துள்ளது. இந்த நிலநடுக்கத்தால் சேதம் ஏற்பட்டதாக தகவல் ஏதுமில்லை.

சீனாவில் ஒரு குழந்தை திட்டம் முடிவுக்கு வந்தது, மேலும், புத்தாண்டு முதல் 2 குழந்தைகள் பெற அனுமதி அளித்து மக்கள்தொகை கொள்கையில் திருத்தம் மேற்கொள்ளப்பட்டு, புதிய திட்டம் நேற்று முதல் அமலுக்கு வந்துள்ளது.

உலகிலேயே மக்கள் தொகை அதிகம் கொண்ட நாடாக சீனா முதலிடத்தில் உள்ளது. இங்கு 2015–ம் ஆண்டு கணக்கெடுப்புபடி மக்கள் தொகை 140 கோடியே 15 லட்சமாக உள்ளது. மக்கள் தொகை பெருக்கத்தால் சீனா பல்வேறு நெருக்கடிக்கு ஆளானது. உணவு தட்டுப்பாடு, வாகனம் மற்றும் குடியிருப்புகள் பெருக்கம், வேலையில்லா திண்டாட்டம் போன்றவை ஏற்பட்டது.

இந்நிலையில் அரசு அங்கு ஒரு குழந்தை திட்டத்தை அறிமுகப்படுத்தியது. 40 ஆண்டுகளுக்கும் மேலாக இந்த திட்டம் அமலில் இருந்து வந்தது. இதனால் மக்கள் தொகை பெருக்கம் ஓரளவுக்கு கட்டுப்படுத்தப்பட்டது. ஆனால் மற்ற பிரச்சினைகள் உருவானது. தொழில் வளர்ச்சியில் வேகமாக முன்னேறிய சீனாவில் வேலைக்கு ஆட்கள் பற்றாக்குறை மற்றும் பாலியல் தொடர்பான குற்றங்கள் பெருகியது. எனவே ஒரு குழந்தை திட்டத்தை தளர்த்தி 2 குழந்தை பெற்றுக்கொள்ள அனுமதிக்க வேண்டும் என்று அரசுக்கு பல்வேறு தரப்பில் கோரிக்கை முன்வைக்கப்பட்டது. ஆளும் கம்யூனிஸ்டு உயர் மட்டக்குழு 2 குழந்தை பெற்றுக் கொள்ள அனுமதிக்கலாம் என்று கடந்த அக்டோபர் மாதம் ஒப்புதல் அளித்தது.

இது தொடர்பான சட்டம் தேசிய நாடாளுமன்றத்தில் கடந்த டிசம்பர் மாதம் நிறைவேறியது. அதில் ஜனவரி 1 ஆம் தேதி 2 குழந்தை பெற்றுக் கொள்ளும் திட்டம் அமலுக்கு வரும் என்று அறிவிக்கப்பட்டது. அதன்படி ஒரு குழந்தை திட்டம் முடிவுக்கு வந்து, புத்தாண்டு தினமான நேற்று முதல் 2 குழந்தை பெற்றுக் கொள்ளும் திட்டம் அமலுக்கு வந்தது. இந்த திட்டத்தை சீன தம்பதிகள் மகிழ்ச்சியுடன் வரவேற்றுள்ளனர்.

புது தில்லி:

சமூக ஆர்வலர் அன்னா ஹசாரே பிரமதர் மோடிக்கு எழுதியுள்ள கடிதத்தில், மோடி தன்னைத் தொடர்ந்து புறக்கணித்து வருகிறார், மேலும் அவர் தேர்தலின் போது அளித்த வாக்குறுதிகளை நிறைவேற்ற வேண்டும் என வலியுறுத்தியுள்ளார். கடந்த கால காங்கிரஸ் ஆட்சிக்கும் தற்போதைய பாரதீய ஜனதா கட்சி ஆட்சிக்கும் எவ்வித வேறுபாடும் இல்லை என்றும் அவர் கூறியுள்ளார்.
இதுதொடர்பாக பிரதமருக்கு ஹசாரே எழுதியுள்ள 3 பக்க கடிதம், மும்பையில் வெள்ளிக்கிழமை வெளியிடப்பட்டது.

பிரமதர் மோடிக்கு புத்தாண்டு வாழ்த்து தெரிவித்து அன்னா ஹசாரே எழுதியுள்ள அந்தக் கடிதத்தில், கடந்த 2014 ஆம் ஆண்டு நடைபெற்ற மக்களவைத் தேர்தலின் போது வழங்கப்பட்ட வாக்குறுதிகளான கருப்புப் பணத்தை திரும்ப கொண்டு வருதல், ஊழலற்ற இந்தியாவை உருவாக்குதல் உள்ளிட்டவைகளை மோடி மறந்துவிட்டதாக அதில் குறிப்பிட்டுள்ளார்.

”லோக்பால், லோக் ஆயுக்தா அமைப்புகள் சீராக செயல்படும்” என்ற தேர்தல் வாக்குறுதியை நினைவுப்படுத்தியுள்ள அன்னா ஹசாரே, கடந்த மக்களவைத் தேர்தலின்போது, வெளிநாடுகளில் பதுக்கி வைக்கப்பட்டுள்ள இந்தியர்களின் கருப்புப் பணத்தை மீட்போம், ஊழலற்ற இந்தியாவை உருவாக்குவோம் என்பன போன்ற பல்வேறு வாக்குறுதிகளை அளித்தீர்கள். அவற்றை, நீங்கள் மறந்திருக்கலாம். நிறைவேற்றப்படாத அந்த வாக்குறுதிகளை மீண்டும் நினைவூட்டும் வகையில் இக்கடிதத்தை எழுதியுள்ளேன். நான் ஏற்கெனவே எழுதிய பல கடிதங்கள் புறக்கணிக்கப்பட்டு விட்டன. அவை, குப்பைத் தொட்டியில் தான் வீசப்பட்டிருக்கும் என்பதை அறிவேன். எனது தற்போதைய கடிதத்துக்கும் அதே கதி ஏற்படலாம். ”பிரதமருக்கு அனுப்பப்படும் ஒவ்வொரு கடிதத்துக்கும் பிரதமர் பதிலளிக்க முடியாது. எனினும், நாட்டுக்காக தங்களையே அர்பணித்துள்ள சமூக ஆர்வலர்கள் அளிக்கும் கடிதங்களுக்கு பிரதமர் பதில் அனுப்பலாம்.” என தனது கடிதத்தில் குறிப்பிட்டுள்ளார் ஹசாரே.

கடந்த காங்கிரஸ் ஆட்சியில் ஊழல் அதிக அளவில் இருந்தது. லஞ்சம் வழங்கப்பட்டால் மட்டுமே வேலை நடைபெற்றது. மோடியின் வாக்குறுதியை நம்பி வாக்களித்த மக்கள் தற்போதும் அதே நிலையை தான் எதிர்கொள்கின்றனர். பணம் இல்லாமல் ஒரு வேலையும் நடைபெறுவதில்லை. பணவீக்கமும் குறையவில்லை. கடந்த காலங்களில் நரசிம்ம ராவ் பிரதமராக இருந்தபோது தொலைபேசியில் என்னோடு பேசுவார். வாஜ்பாய் புணே வரும்போது, என்னைக் குறித்து விசாரிப்பார். மன்மோகன் சிங் கூட எனது கடிதங்களுக்குப் பதில் அனுப்பியுள்ளார்.

ஆர்.எஸ்.எஸ். தலைவர் சேஷாத்ரி எனது கிராமத்துக்கு வந்து, என்னைக் குறித்து புத்தகம் எழுதியுள்ளனர். ஆனால், பிரமதர் மோடி தன்னை தொடர்ந்து புறக்கணித்து வருவதாக குறிப்பிட்டுள்ளார் ஹசாரே.