சென்னை: முதலமைச்சர்கள் மாநாட்டில் பங்கேற்க தமிழக முதலமைச்சர் ஒ.பன்னீர் செல்வம் விமானம் மூலம் சென்னையில் இருந்து தில்லிக்கு பயணம் மேற்கொண்டார். உச்ச நீதிமன்ற தலைமை நீதிபதி, உச்ச நீதிமன்ற நீதிபதிகள், உயர் நீதிமன்ற நீதிபதிகள் கலந்து கொள்ளும் மூன்று நாள் மாநாடு தில்லியில் தொடங்கியது. இந்த மாநாட்டில் உச்ச நீதிமன்ற தலைமை நீதிபதி தத்து பங்கேற்றுப் பேசினார். இதில் நீதிமன்றங்களில் நீதிபதிகளின் எண்ணிக்கையை உயர்த்த வேண்டும் என்றும், நிலுவையில் உள்ள வழக்குகளை விரைந்து முடிப்பது என்பது குறித்தும் விவாதிக்கப்பட்டது. தொடர்ந்து அனைத்து மாநில தலைமை நீதிபதிகள் மற்றும் முதலமைச்சர்கள் மாநாடு ஞாயிறு காலை தில்லியில் நடைபெறுகிறது. தில்லி விஞ்ஞான் பவனில் நடைபெறும் இந்த மாநாட்டில் அனைத்து மாநில நீதிபதிகள் மற்றும் முதலமைச்சர்கள் கலந்து கொள்கின்றனர். பிரதமர் நரேந்திர மோடி இந்த மாநாட்டைத் தொடங்கி வைக்கிறார். இந்த மாநாட்டில் பங்கேற்க தமிழக முதலமைச்சர் ஒ.பன்னீர்செல்வம் சென்னையில் இருந்து விமானம் மூலம் தில்லி புறப்பட்டுச் சென்றார்.

சென்னை: அ.தி.மு.க., முன்னாள் எம்.பி., மலைச்சாமி பாஜகவில் இணைந்தார். பெங்களூரில் பாஜக தேசியத் தலைவர் அமித் ஷா முன்னிலையில் அவர் பாஜக.,வில் இணைந்தார். கடந்த மே மாதம் அ.தி.மு.க., பொதுச் செயலாளர் ஜெயலலிதா மலைச்சாமியை கட்சியிலிருந்து நீக்கியிருந்தார். புதுச்சேரி தி.மு.க.,வை சேர்ந்த சுப்ரமணியமும் பாஜகவில் இணைந்தார். இத்தகவலை மத்திய அமைச்சர் பொன்.ராதாகிருஷ்ணன் தெரிவித்தார். மேலும், தி.மு.க.,முன்னாள் எம்.எல்.ஏ., சோமசுந்தரம், கவிஞர் கண்ணதாசன் மகள் விஷாலி கண்ணதாசன் ஆகியோரும் பா.ஜ.க.,வில் இணைந்துள்ளனர்.

சென்னை: இன்று உலகின் பல பகுதிகளில் தெரிந்த சந்திர கிரகணத்தை, சென்னையிலும் கண்டு ரசித்தனர். சென்னை கோட்டூர்புரத்தில் உள்ள பிர்லா கோளரங்கத்தில் பொதுமக்கள் சந்திர கிரணத்தை பார்க்க சிறப்பு ஏற்பாடுகள் செய்யப் பட்டிருந்தது. ஆயிரக்கணக்கான மக்கள் நீண்ட வரிசையில் நின்று தொலைநோக்கி மூலம் சந்திர கிரகணத்தை பார்வையிட்டு மகிழ்ந்தனர். பள்ளிக் குழந்தைகள் முதல் பெரியவர்கள் வரை அனைவரும் ஆர்வத்துடன் கிரணத்தை பார்வையிட்டனர். தமிழகம் முழுவதும் வெறும் கண்களாலும் இரவு, 8:30 மணி வரை ஏராளமானோர் இந்த சந்திர கிரகணத்தை கண்டு ரசித்தனர். இருப்பினும், சென்னையில் மேக மூட்டமாக இருந்ததால், தெளிவாகக் காண முடியவில்லை. மேலும், உலகின் பல்வேறு நாடுகளில் இன்று நிகழ்ந்த சந்திர கிரகணத்தை பல்லாயிரக்கணக்கான மக்கள் உற்சாகமாகக் கண்டுகளித்தனர். வட அமெரிக்கா, ஹாவாய் தீவுகள், ஜப்பான், நியூசிலாந்து, ஆஸ்திரேலியா, இந்தோனேஷியா, கிழக்கு ஆசியா என பல இடங்களில் மக்கள் இந்த சந்திர கிரகணத்தைப் பார்க்க முடிந்தது. இந்த ஆண்டின் முதல் சந்திர கிரகணம் இது என்பது குறிப்பிடத்தக்கது. சந்திர கிரகணம் மாலை 3:45 மணிக்கு துவங்கி 7:14 மணி வரை நீடித்தது. மாலை 5.27க்குத் தொடங்கி முழு கிரகணம் சுமார் நான்கரை நிமிடம் நீடித்தது.

சென்னை: இந்திய கடல் பகுதியில் அத்துமீறி மீன் பிடித்த இலங்கை மீனவர்கள் 6 பேர் கைது செய்யப்பட்டனர். தமிழக கடல் பகுதியில் சுமார் 158 கடல் மைல் தொலைவில் இந்திய கடலோர காவல் படையினர் வெள்ளிக்கிழமை ரோந்துப் பணியில் ஈடுபட்டிருந்தனர். அப்போது அங்கே இலங்கை மீனவர்கள் சர்வதேச கடல் எல்லையை தாண்டி, இந்திய கடல் பகுதியில் விசைப் படகு ஒன்றில் மீன் பிடித்துக் கொண்டிருப்பது தெரியவந்தது. இதையடுத்து கடலோர காவல் படையினர், அந்தப் படகில் இருந்த மீனவர்கள் 6 பேரைக் கைது செய்தனர். படகைப் பறிமுதல் செய்து, சென்னைக்குக் கொண்டு வந்து, சென்னை துறைமுக காவல் நிலைய போலீஸாரிடம் ஒப்படைத்தனர். இது தொடர்பாக துறைமுகம் போலீஸார் வழக்குப் பதிவு செய்து, விசாரித்து வருகின்றனர்.