ஆக்சிஸ் ஃபிலிம் ஃபேக்டரி சார்பில் ஜி.டி.டில்லிபாபு தயாரிப்பில் வெளிவர இருக்கும் திரைப்படம் உறுமீன். இதில் ஜிகர்தண்டா படத்தில் நடித்த பாபி சிம்ஹா நாயகனாகவும், மெட்ராஸ் படத்தில் நடித்த கலையரசன் வில்லனாகவும் நடிக்கின்றனர். படத்தின் நாயகியாக ரேஷ்மி மேனன் நடிக்கிறார். அப்புக்குட்டி, காளிவெங்க, மனோபாலா ஆகியோர் முக்கிய வேடங்களில் நடிக்கின்றனர். சக்திவேல் பெருமாள்சாமி இயக்க, அச்சு இசையமைக்க, ரவீந்திரநாத் குரு படத்துக்கு ஒளிப்பதிவு செய்துள்ளார். படப்பிடிப்பு வேலைகள் பெரும்பாலும் முடிந்துவிட்ட நிலையில், படத்தை மே மாதம் திரையிடத் திட்டமிட்டுள்ளனர். அதற்கு முன்னர், படத்தின் டிரைலர் ஜனவரி மாத இறுதியில் வெளியிடவுள்ளனர். படப்பிடிப்பு சென்னையில் தொடங்கி கேரளா, பாண்டிச்சேரி, மியான்மர் என பல இடங்களில் நடந்து முடிந்துள்ளது. இரண்டு வித்தியாசமான கதைக் களனில் பயணிக்கும் திரைக்கதை இன்றைய பொருளாதார பின்னணியை மையமாகக் கொண்டது. அண்மையில் இப்படத்தின் உச்சக்கட்ட காட்சி கேரளாவின் அடர்ந்த வனப்பகுதியில் படமாக்கப்பட்டது. இதற்குமுன் இத்தகைய இடங்களில் படப்பிடிப்பு நடத்த யாருக்கும் அனுமதி கிடைத்ததில்லையாம்!

]நடிகர் தனுஷ் நடித்து இயக்குநர் கே.வி.ஆனந்த் இயக்கியிருக்கும் படம் ‘அனேகன்’. வரும் பிப்.13ம் தேதி வெளியாகவிருக்கிறது. இந்தப் படத்தில் தனுஷ் நான்கு விதமான கதாபாத்திரங்களில் நடித்திருக்கிறார். அதில் ஒன்று சலவைத் தொழிலாளி கதாபாத்திரம். இந்தப் படத்தில் சலவைத் தொழிலாளர் சமூகத்தை சேர்ந்த பெண்களை இழிவுப்படுத்தும் விதமாக வசனங்கள் இடம் பெற்றுள்ளதாகவும் எனவே, படத்தை தமிழ்நாடு முழுவதும் வெளியிட தடை விதிக்க வேண்டும் எனவும் சலவைத் தொழிலாளர்கள் சிலர் எதிர்ப்பு தெரிவித்துள்ளனர். இதுதொடர்பாக மதுரை வண்டியூரைச் சேர்ந்த வழக்கறிஞர் சாலின்மணி, கே.கே.நகர் வழக்கறிஞர் ரமேஷ் மற்றும் 50-க்கும் மேற்பட்ட சலவைத் தொழிலாளர்கள் மதுரை மாநகர போலீஸ் ஆணையர் சஞ்சய் மாத்தூரை சந்தித்து மனு ஒன்றை கொடுத்தனர். அந்த மனுவில்… கே.வி.ஆனந்த் இயக்கத்தில் தனுஷ் நடிக்கும் அனேகன் திரைப்படம் விரைவில் வெளிவர இருக்கிறது. அந்த படத்தில் சலவைத் தொழிலாளர் சமூகத்தை சேர்ந்த பெண்களை இழிவுபடுத்தும் விதமாக வசனங்கள் இடம் பெற்றுள்ளன. எனவே அந்த படத்தை தமிழ்நாடு முழுவதும் வெளியிட தடை விதிக்க வேண்டும். படத்தில் இழிவு வசனங்கள் இடம்பெறச் செய்த இயக்குனர் கே.வி.ஆனந்த், அதை பேசி நடித்த நடிகர்கள் ஜெகன், தனுஷ் ஆகியோர் மீது நடவடிக்கை எடுக்க வேண்டும். – என்று குறிபிடப்பட்டிருந்தது. இந்த மனுவை விசாரித்து நடவடிக்கை எடுப்பதாக ஆணையர் சஞ்சய் மாத்தூர் அவர்களிடம் தெரிவித்துள்ளார்.

நடிகர் ஜெய் தற்போது வலியவன், புகழ் ஆகிய படங்களில் நடித்து வருகிறார். இதில் புகழ் படத்தை மணிமாறன் இயக்குகிறார். இவர் ஏற்கெனவே என்எச்4 என்ற படத்தை இயக்கியவர். பிலிம் டிபார்ட்மெண்ட் நிறுவனத்தின் சார்பில் சுஷாந்த் பிரசாத் படத்தை தயாரித்து வருகிறார். ஒரு தயாரிப்பாளர் தன் படத்தில் நடிக்கும் கதாநாயகனை பாராட்டுவது அரிதாகி வரும் இந்தக் காலகட்டத்தில் சுஷாந்த் பிரசாத், படத்துக்கு ஜெய் தரும் ஒத்துழைப்பைப் பாராட்டி மாய்ந்துதான் போகிறார். ‘ஜெய்யின் நல்ல கதைக்கான தேடல், நேரம் தவறாமை, எளிமை ஆகியவை என்னை மிகவும் கவர்ந்த குணங்கள். அவர் தயாரிபாளர்களுக்கு ஒரு வரப்பிரசாதம். ‘வடகறி’ படத்தை தொடர்ந்து நாங்கள் அவரோடு இணைவது இது இரண்டாவது படம். வணிக ரீதியாக பெரும் வெற்றி பெற்ற ‘வடகறி’ ஒரு நகைசுவை கலந்த த்ரில்லர் படம். ‘புகழ்’ பெயருக்கேற்றபடி வெற்றிப் படமாக அமையும். என்எச்4 படத்தை இயக்கிய மணிமாறன் இயக்கத்தில் உருவாகும் இந்தப் படம் அவருக்கு ஒரு முக்கியப் படமாக இருக்கும். இந்தப் படம் பெரிய அளவில் பேசப்பட்டு புகழ்பெற நாங்கள் எல்லா விதமான முயற்சிகளையும் மேற்கொண்டிருக்கிறோம். ரேடியன்ஸ் மீடியா வருண் மணியனோடு இணைந்து இந்தப் படத்தை வழங்குவதில் நாங்கள் பெருமிதம் கொள்கிறோம் ‘ என்று கூறியுள்ளார் சுஷாந்த். பகவதி படத்தில் விஜய்யின் தம்பியாக அறிமுகமானவர் ஜெய். இவர், சுப்ரமணியபுரம், எங்கேயும் எப்போதும் உள்ளிட்ட ஹிட் படங்களைக் கொடுத்து தமிழ் சினிமா உலகில் தனக்கென ஒரு இடத்தைத் தக்கவைத்துக் கொண்டுள்ளார்.

ஜெய், ஆண்டிரியா, அளகம்பெருமாள் ஆகியோர் நடிப்பில் உருவாகிறது வலியவன். இந்தப் படத்தில் ஆரோன் சௌத்ரி அறிமுகமாகிறார். பால சரவணன், அனுபம் குமார் ஆகியோர் உடன் நடித்திருக்கிறார்கள். சரவணன் இயக்கத்தில், டி.இமான் இசையமைப்பில் இந்தப் படம் வருகிறது. சிவா, சில்வா ஆகியோர் சண்டைக்காட்சிகளை அமைத்திருக்கின்றார்கள். நா.முத்துக்குமார், விவேகா ஆகியோர் படத்துக்கான பாடல்களை எழுதியுள்ளனர்.