ரஜினி நடிக்கவிருக்கும் ‘காலா’ படத்தின் பர்ஸ்ட் லுக் போஸ்டர் இன்று மாலை
வெளியாகியுள்ளது.
கபாலி படத்தின் வெற்றிக்கு பிறகு ரஜினி – பா.ரஞ்சித் கூட்டணி மீண்டும்
இணைந்துள்ள படம் காலா. ரஜினியின் 164வது படமாக உருவாக உள்ள இப்படத்தை
ரஜினியின் மருமகனும், நடிகருமான தனுஷ் தயாரிக்கிறார். சந்தோஷ் நாராயணன்
இசையமைக்கிறார். படத்தின் தலைப்பை இன்று காலை படக்குழுவினரால்
அதிகாரப்பூர்வமாக வெளியிடப்பட்டது.
தலைப்பு வெளியானதைத் தொடர்ந்து இப்படத்தின் பர்ஸ்ட் லுக் போஸ்டரை இன்று மாலை 6
மணிக்கு வெளியிடப்போவதாக இப்படத்தின் தயாரிப்பாளர் தனுஷ் அறிவித்திருந்தார்.
அதன்படி, ‘காலா’ படத்தின் 2 பர்ஸ்ட் லுக் போஸ்டர்களை அவர் வெளியிட்டார். ஒரு
போஸ்டரில் ரஜினி முகத்தில் ரத்தக்கறையுடனும், காயங்களுடனும் கோபத்துடன்
இருப்பதுபோல் இருக்கிறது. மற்றொரு போஸ்டரில் மும்பை தாராவி பின்னணியாக வைத்து,
நடுவில் சாதாரண லுங்கியுடன், கூலிங் கிளாஸ் அணிந்துகொண்டு ஜீப்பின் மீது
அமர்ந்துகொண்டு இருப்பதுபோல் வெளியிட்டுள்ளனர்.
‘காலா’ படத்தின் 2 பர்ஸ்ட் லுக் போஸ்டர்களும் தற்போது இணையதளங்களில் வைரலாக
பரவி வருகின்றன.
இப்படத்தின் படப்பிடிப்பு வருகிற மே 28-ந் தேதி தொடங்கவிருக்கிறது. முதற்கட்ட
படப்பிடிப்பு மும்பையிலும், அடுத்தக்கட்ட படப்பிடிப்பு சென்னையிலும்
நடத்தவிருக்கிறார்கள்.
