சென்னை:

தேமுதிக தலைவர் விஜயகாந்தை, பாஜக தலைவர்கள் சனிக்கிழமை நேற்று திடீரென சந்தித்துப் பேசினர். இந்தச் சந்திப்பு குறித்து கருத்துத் தெரிவித்த பாஜக தலைவர்கள், இது நட்பின் அடிப்படையிலும், மரியாதை நிமித்தமாகவும் நடைபெற்ற சந்திப்பு என்றனர். இருப்பினும் இது வைகோ.,வின் நடவடிக்கைகளின் பாதிப்பு என்று கூறப்படுகிறது.

பாஜக.,வின் தேசிய ஜனநாயகக் கூட்டணியில் இடம்பெற்றிருந்த மதிமுக., கூட்டணியை விட்டு ஒரு கட்டத்தில் விலகியது. மேலும், கூட்டணியில் இடம்பெற்றிருந்த தேமுதிக., உள்ளிட்ட பிற கட்சிகள் தங்கள் நிலையை அதன் பின்னர் இதுவரை தெளிவுபடுத்தவில்லை. இந்நிலையில், ஆங்கில நாளிதழுக்கு பேட்டியளித்த தேமுதிக., தலைவர் விஜயகாந்த், மக்கள் நலக் கூட்டணியை வரவேற்று பேட்டி அளித்திருந்தார்.

மேலும், சென்னையில் செய்தியாளர்களை சனிக்கிழமை சந்தித்த மதிமுக பொதுச் செயலாளர் வைகோ., மக்கள் நலக் கூட்டணியை விஜயகாந்த் பாராட்டிப் பேசியதாகவும், அவரை நேரில் சந்தித்துப் பேசி, தங்களது கூட்டணிக்கு வர அழைப்பு விடுக்க இருப்பதாகவும் தெரிவித்தார்.

மக்கள் நலக் கூட்டணி குறித்த விஜயகாந்தின் கருத்தும், வைகோவின் அழைப்பும் தேசிய ஜனநாயகக் கூட்டணிக்குள் சலசலப்பை ஏற்படுத்தியுள்ளது.

இந்நிலையில், மத்திய அமைச்சர் பொன்.ராதாகிருஷ்ணன், பாஜக மாநிலத் தலைவர் தமிழிசை சௌந்தரராஜன், பாஜக மாநில பொதுச் செயலாளர் மோகன்ராஜூலு உள்ளிட்டோர் விஜயகாந்தை அவரது கட்சி அலுவலகத்தில் சனிக்கிழமை நேற்று சந்தித்துப் பேசினர். அப்போது என்ன பேசினார்கள் என்பது குறித்து எந்த விவரமும் வெளியிடப்படவில்லை. இந்த சந்திப்புக்குப் பிறகு, செய்தியாளர்களைச் சந்தித்த பாஜக., தலைவர்கள், விஜயகாந்தை நட்பு மற்றும் மரியாதை அடிப்படையில் சந்தித்ததாகவும், அரசியல் ரீதியாக எதையும் பேசவில்லை என்றும் தெரிவித்தனர்.

சென்னை:

உயர்கல்வியை வணிக மயமாக்கும் பொது உடன்படிக்கையில் இந்தியா கையெழுத்திடும் அபாயம் உள்ளது என்று திமுக தலைவர் கருணாநிதி தெரிவித்துள்ளார்.

உலக வர்த்தக அமைப்பு மாநாடு நைரோபியில் நடைபெற்று வருகிறது. இதில் சேவைத்துறையில் வர்த்தகம் பற்றிய பொது உடன்படிக்கையில் இந்தியா கையெழுத்திட்டால் உயர்கல்வி வணிக மயமாகிவிடும் என்று கல்வித்துறை நிபுணர்களின் கவலையை கருணாநிதி அறிக்கையில் தெரிவித்து, தனது வேதனையை வெளிப்படுத்தியுள்ளார்.

இது குறித்து அவர் வெளியிட்டுள்ள அறிக்கை:

உலக வர்த்தக அமைப்பு (WTO) உறுப்பு நாடுகளைச் சேர்ந்த பத்தாவது வர்த்தக அமைச்சர்களின் பத்தாவது மாநாடு கென்யா நாட்டின் தலைநகரான நைரோபியில், இந்த மாதம் 15ஆம் தேதியிலிருந்து நடைபெறுகிறது. இந்த மாநாட்டில், சேவைத் துறை யில் வர்த்தகம் பற்றிய பொது உடன்படிக்கையில், இந்தியா தற்போது கையொப்பமிடும் அபாயம் உள்ளது. அப்படி அந்த ஆபத்து ஒப்பந்த வடிவம் பெறுமானால், இனிமேல் உயர் கல்வி வணிகமயமாகி விடும்; கல்வியின் அடிப்படை நோக்கமே நொறுங்கிச் சின்னாபின்னமாகி விடும் என்று நமது கல்வியாளர்கள் கருது கிறார்கள். இந்திய உயர் கல்வியில் வெளிநாடுகளின் மேலாதிக்கம் அதிகரிக்கும். ஜனநாயக ரீதியில் செயல் படும் உயர் கல்வி அமைப்பின் அடித்தளம் வலுவிழக்கும்.

கல்விச் சேவையை வணிக மயமாக்கும் முயற்சி, 160 நாடுகள் உறுப்பினர் களாக உள்ள உலக வர்த்தக அமைப்பின் தோகா மாநாட்டில் 2001ஆம் ஆண்டு தொடங்கியது. 2005இல் உயர் கல்வியில், உலக வர்த்தக அமைப்புக்கு சந்தை வாய்ப்பை வழங்கும் ஒப்புதலை, உறுப்பு நாடான இந்தியாவும் ஆமோதித்தது. ஆனால் இதற்கான பேச்சுவார்த்தை முடிவடையவில்லை.

இந்தியக் கல்வித் துறையில், இப்போதே தனியாரின் ஆதிக்கம் அதிகமாக உள்ளது. இந்நிலையில் உயர் கல்வியில் வெளிநாட்டுக் கல்வி நிறுவனங்களையும் அனுமதித்தால், கல்வி, சேவை என்பது மாறி, சந்தைப் பொருள்களில் ஒன்று என்றாகி விடும். உலக வர்த்தக அமைப்பின் 160 நாடுகளும் இந்தியக் கல்வித் துறையில் நுழைந்து வர்த்தகம் செய்ய அனுமதி கிடைத்து விடும்.

வெளிநாட்டு நிறுவனங்கள் இங்கு கல்விவணிகம் செய்ய வரும் போது அவர்களின் பாடத் திட்டங்கள், ஆசிரியர்களின் தரம் போன்றவற்றை ஒழுங்கு படுத்த இங்குள்ள கல்வி அமைப்புகளால் இயலாது. எப்படியென்றால், பல்கலைக் கழக மானியக் குழு, தொழில் நுட்பக் கல்விக் குழு, மருத்துவக் கவுன்சில் போன்ற அமைப்புகளைக் கலைத்து விட்டு, அவற்றுக்குப் பதிலாக பிற சேவை களில் ஏற்கனவே இருப்பதைப் போன்ற தற்சார்பு ஒழுங்கு முறை ஆணையங்கள் அமைக்கப்பட்டு விடும். அவை, தற்சார்புத் தன்மை கொண்டதாகவும், வெளி நாட்டு மூலதனத்துக்கு சாதகமாகவும் இருக்கும். மேலும் இட ஒதுக்கீடு, கல்வி உதவி, இந்திய மொழிகள் ஆகியவற்றுக்கும் பாதகம் ஏற்படுத்தும். மேலும் சிறுபான்மை நிறுவனங்களுக்கான மானியங்கள் போன்றவை கூட கேள்விக்குறியாகும்.

இந்திய நாட்டின் சட்டங்கள் அனைத்தும் மாற்றப்பட்டு கல்வி வியாபாரத்தில் முதலீடு செய்யும் இந்திய மற்றும் அந்நிய முதலீட்டாளர்களின் நலன் காக்கும் வகையில் புதிய சட்டங்கள் இயற்றப்படும். இந்த ஒப்பந்தத்தின்படி, இந்திய நீதி மன்றங்கள் எந்தக் கல்வி நிறுவனத்தின் மீதான வழக்கையும் விசாரிக்க இயலாது. ஐந்தாண்டிற்கு ஒரு முறை தேர்தல் நடைபெற்று, ஆட்சி மாறினால் கூட, ஒப்பந்தத்தைத் தற்போது ஏற்றுக் கொண்டு கையெழுத்திட்டுவிட்டால் பின்னர் அதைத் திரும்பப் பெற இயலாது.

அண்ணா பல்கலைக் கழக முன்னாள் துணை வேந்தர் இ. பாலகுருசாமி இது பற்றிக் கூறும்போது, அன்னிய கல்வி நிறுவனங்களை அனுமதித்தால், இந்தியாவில் கல்விக் கட்டணம் உயரும். இங்கே குறைந்த எண்ணிக்கையில் உள்ள தரமான ஆசிரியர்களையும், கூடுதல் ஊதியம் தருவதாகக் கூறி, அன்னிய கல்வி நிறுவனங்கள் அழைத்துச் சென்று விடுவார்கள் என்று கூறியிருக்கிறார். மேலும் பேராசிரியர்கள் பலர் இந்த ஒப்பந்தத்தில் கையெழுத்திடுவதால் எப்படிப்பட்ட பேராபத்துகள் வரக் கூடுமென்று கருத்து தெரிவித் திருக்கிறார்கள்.

கல்வியை முழுமையாகக் கடைச்சரக்காக மாற்றும் “காட்ஸ்” ஒப்பந்தத்தில் மத்திய பா.ஜ.க. அரசு கையெழுத்திடக் கூடாதெனக் கோரி பல்வேறு அமைப்புகள் குரல் கொடுத்தும், இந்திய அரசு அதனைக் காதில் போட்டுக் கொள்ளவில்லை. புதிய கல்விக் கொள்கை காரணமாக கல்வி கற்பதற்காக வழங்கப்பட்டு வந்த உதவித் தொகைகள் ரத்து செய்யப்படுவதுடன், இட ஒதுக்கீடும் ரத்து செய்யப்படும். கல்வியில்சிறந்தவர்கள் என்று ஒரு சதவிகிதமும், பொருளாதார ரீதியாக பின் தங்கியவர்களுக்கு ஒரு சதவிகிதமும் மட்டுமே உதவித் தொகை பெறலாம் என்று ஒப்பந்தம் கூறுகிறது. இத்தனை ஆபத்துகளைக் கொண்ட ஒப்பந்தத்தில் தங்கள் நாடுகள் கையெழுத்திடக் கூடாது என்று ஆப்பிரிக்க, அமெரிக்க, ஐரோப்பிய நாடுகளின் ஆசிரியர்களும், மாணவர்களும் போராட்டம் நடத்தினர்.

இந்த ஒப்பந்தத்தில் கையெழுத்திடக் கூடாதென்று இந்தியா முழுதும் மாணவர்கள் போராட்டம் நடத்தினர். இந்தியக் குடியரசுத் தலைவருக்கும் இதைப் பற்றி மாணவர்கள் சார்பில் தெரிவித்திருக்கின்றனர்.

நாடாளுமன்றம் நடந்து கொண்டிருக்கின்ற நேரத்தில், நாடாளுமன்றத்தின் ஒப்புதல் இல்லாமல், இப்படிப்பட்ட ஒப்பந்தத்தில் அரசு கையெழுத்திடுவது நாடாளு மன்றத்தையும் ஜனநாயகத்தையும் அவமதிக்கும் செயலாகும். முறைப்படி நாடாளுமன்றத்தில் இதுபற்றிய பிரச்சினை கொண்டு வராவிட்டாலுங்கூட, தி.மு. கழகத்தின் சார்பில் தம்பி திருச்சி சிவா நேற்றையதினம் இந்த ஒப்பந்தத்தில் இந்தியா கையெழுத்திடக் கூடாதென வலியுறுத்திப் பேசியிருக்கிறார். அண்ணல் அம்பேத்கர், தந்தை பெரியார், பேரறிஞர் அண்ணா போன்ற தலைவர்கள் பல ஆண்டுகள் தொடர்ந்து போராடி நிலைநாட்டிய சமூக நீதி அடிப்படையிலான அனைத்துச் சட்டங்களும் அவற்றின் பலன்களும் இனி இல்லாமலே போய் விடும்.

இத்தனை பேராபத்துகள் நிறைந்த, இந்திய சமுதாய விரோத ஒப்பந்தத்தில் கையெழுத்திடக் கூடாது. மத்திய பா.ஜ.க. அரசு, உடனடியாக இந்த ஒப்பந்தத்திலிருந்து தன்னை விடுவித்துக் கொள்வதற்கான அனைத்து முயற்சிகளிலும் உடனடியாக ஈடுபட வேண்டும் என்று தி.மு. கழகத்தின் சார்பில் மீண்டும் மீண்டும் வலியுறுத்துகிறேன்.

என்று கருணாநிதி இந்த அறிக்கையில் கேட்டுக் கொண்டுள்ளார்.

புது தில்லி:

நேஷனல் ஹெரால்ட் வழக்கில், ரூ.50 ஆயிரம் பிணைத் தொகையில் சோனியா, ராகுலுக்கு ஜாமீன் வழங்கப்பட்டது. தனிநபர் ஜாமீனில் ஏ.கே. அந்தோணி, பிரியங்கா ஆகியோர் கையெழுத்து இட்டனர்.

நேஷனல் ஹெரால்டு வழக்கு விசாரணைக்காக பாட்டியாலா நீதிமன்றத்தில் இன்று ஆஜரான காங்கிரஸ் கட்சித் தலைவர் சோனியா, துணைத் தலைவர் ராகுல் ஆகியோருக்கு ஜாமீன் வழங்கி நீதிபதி உத்தரவிட்டார்.

இந்த வழக்கில் குற்றம் சாட்டப்பட்ட மேலும் 4 பேருக்கும் பாட்டியாலா நீதிமன்றம் ஜாமீன் வழங்கியுள்ளது. இதையடுத்து சோனியா மற்றும் ராகுல் தரப்பில் தலா ரூ.50 ஆயிரம் பிணைத் தொகையாக நீதிமன்றத்தில் செலுத்தப்பட்டது.

சோனியா காந்திக்கான தனிநபர் ஜாமீன் பத்திரத்தில் முன்னாள் மத்திய அமைச்சர் ஏ.கே. அந்தோணி கையெழுத்திட்டார். ராகுலுக்கான ஜாமீன் பத்திரத்தில் அவரது தங்கை பிரியங்கா கையெழுத்திட்டார். இதையடுத்து இருவருக்கும் பாட்டியாலா நீதிமன்றம் ஜாமீன் வழங்கியது.

வழக்கு விசாரணை 2016ம் ஆண்டு பிப்ரவரி 20ம் தேதிக்கு ஒத்திவைக்கப்பட்டது. இதை அடுத்து சோனியாவும், ராகுலும் நீதிமன்றத்தில் இருந்து கிளம்பிச் சென்றனர். 

நேஷனல் ஹெரால்டு வழக்கு விசாரணை இன்று பாட்டியாலா நீதிமன்றத்தில் நடைபெற்றது. இதில் குற்றம்சாட்டப்பட்டுள்ள காங்கிரஸ் கட்சித் தலைவர் சோனியா, ராகுல் ஆகியோர் நேரில் ஆஜராகினர். நீதிமன்ற வளாகத்தில் ஏராளமான காங்கிரஸ் கட்சியினரும், பத்திரிகையாளர்களும் குவிந்தனர். இதனால் பாதுகாப்பு தீவிரப்படுத்தப்பட்டது.