என்ஜினீயர் கோகுல்ராஜ் கொலையில் போலீசாரால் தேடப்படும் யுவராஜ் இன்று காலை பரபரப்பான ஆடியோ ஆதாரத்தை சமூக ஊடகங்கள் மூலம் வெளியிட்டார். அவர் வெளியிட்ட ஆடியோவில் அவர் பேசியதாவது:–

கொலை வழக்கில் பெண் உள்பட 6 பேர் கைதானது முழுக்க முழுக்க சட்ட விரோதம். இதை டி.எஸ்.பி விஷ்ணுபிரியா ஏற்கவில்லை. மேலும் குண்டர் சட்டத்தில் கைது செய்வதையும் அவர் விரும்பவில்லை. இந்த வழக்கில் அவர் பெயரளவுக்குத்தான் விசாரணை அதிகாரியாக செயல்பட்டார். அவரை உண்மையான விசாரணை அதிகாரியாக செயல்பட விடவில்லை. ஆனால் இந்த வழக்கில் உண்மையில் வேறு ஒரு அதிகாரிதான் விசாரணை அதிகாரியாக செயல்பட்டார். அவருக்கு என்ன மாதிரியான அழுத்தம் கொடுக்கப்பட்டது என்பதை நான் வெளியிடுவேன். .

இந்த வழக்கில் 17 பேர் கைது செய்யப்பட்டனர் என்பது தான் வெளி உலகுக்கும், இந்த நாட்டுக்கும் தெரியும். ஆனால் தர்மபுரி ,சேலம், நாமக்கல், ஈரோடு, திண்டுக்கல். தேனி மாவட்டங்களில் ஆயிரக்கணக்கானவர்களை அழைத்து வந்து போலீசார் அடித்து சித்ரவதை செய்த தகவல் வெளியாகவில்லை.

ஒரு கொலை வழக்கு என்றால் அதில் அந்த கொலை வழக்கு மற்றும் அதனை சார்ந்த விஷயங்கள் மட்டுமே இருக்க வேண்டும். ஆனால் இதில் எல்லாமே அதிகப்படியான விஷயங்களாக இருக்கின்றன. ஆரம்பத்தில் இருந்தே இந்த வழக்கின் விசாரணை வேறு திசையில் செல்கிறது.

இந்த கொலை வழக்கு எப்.ஐ.ஆர். போடும் வரை நான் இருந்தேன். ஆனால் வழக்கு திசை மாறியதால் நான் தலைமறைவாகிவிட்டேன். தற்போது நான் கேரளாவில் இருக்கிறேன். நான் கோவை கோர்ட்டில் சரண் அடைய திட்டமிட்டு இருந்தேன். இதற்கான ஏற்பாடுகளையும் செய்து இருந்தேன். ஆனால் அரூரில் 2 பேரை கைது செய்தவுடன் சரண் அடைய மறுத்து விட்டேன்.

மேலும் அந்த பெண் அதிகாரி விஷ்ணுபிரியாவை கைதானவர்கள் முன்னிலையில் உயர் அதிகாரி தரக்குறைவாக பேசியது எல்லோருக்கும் தெரியும். விஷ்ணுபிரியாவை செயல்பட முடியாமல் அவரை தடுத்து வைத்து இருந்தனர்.

மேலும் விஷ்ணு பிரியா கொலை வழக்கில் உண்மை வெளியாகாவிட்டால் சென்னை உயர் நீதிமன்றத்தில் வழக்கு போடுவேன். விஷ்ணுபிரியா கொலை வழக்கில் சி.பி.சி.ஐ.டி. போலீசார் விசாரணை சரியான திசையில் போக வில்லை. உயர் அதிகாரி நிர்பந்தம் காரணமாக அவர் நிர்பந்தக்கொலை செய்யப்பட்டார்.

அவர் காதல் தோல்வி காரணமாக தற்கொலை செய்து கொண்டதாக ஒரு செய்தி வெளியாகி உள்ளது. இந்த தகவலை சி.பி.சி.ஐ.டி. போலீசார் வெளியிட்டார்களா? இல்லையா? என்பது தெரியவில்லை. ஆனால் விஷ்ணுபிரியா வழக்கு வேறு திசையில் செல்கிறது. உயர் அதிகாரியின் நிர்பந்தம் காணமாக அவர் கொலை செய்யப்பட்டார்.

கோகுல்ராஜ் வழக்கை போல் இந்த வழக்கும் வேறு திசையில் பொய் வழக்காக செல்கிறது என யுவராஜ் பேசி உள்ளார்.

மேலும் யுவராஜ் விஷ்ணுபிரியாவுடன் பேசிய பேச்சையும் அதில் வெளியிட்டு உள்ளார். தான் கேரளாவில் இருப்பதாகவும், 6 பேரை குண்டர் சட்டத்தில் சிறையில் அடைத்ததில் உடன்பாடு இல்லை என்று விஷ்ணுபிரியா கூறி சரண் அடையுமாறு அவர் யுவராஜை கேட்டுக் கொள்ளும் விவரங்களும் அந்த ஆடியோவில் வெளியாகி உள்ளன.

மேலும் பல வழக்கு விவரங்களை யுவராஜ் கூறி இவையெல்லாம் பொய் வழக்கு என்றும், ஒரு அதிகாரி அந்த வழக்குகளை போட வைத்து தன்னை காப்பாற்ற நாடகம் ஆடுவது போல் அவர் தன்னை காப்பாற்றிக் கொள்வதாகவும் கூறி உள்ளார்.

பொய் வழக்கு போட்ட உயர் அதிகாரி விரைவில் ஜெயிலுக்கு போவார் என்றும் யுவராஜ் கூறி உள்ளார். அந்த உயர் அதிகாரி பெயரையும் அவர் அடிக்கடி கூறி அவரை திட்டியும் வாட்ஸ் அப்பில் தகவல் அனுப்பி உள்ளார். இப்படி அடுக்கடுக்கான தகவல்கள் அடங்கிய ஆடியோவை யுவராஜ் வெளியிட்டுள்ளாதல் தமிழக காவல் துறை வட்டாரங்கள் பெரும் பரபரப்பு அடைந்துள்ளது.

ஆந்திர முதலமைச்சர் சந்திரபாபு நாயுடு தனது குடும்ப சொத்து விவரங்களை ஆண்டுதோறும் வெளியிட்டு வருகிறார்.

ஐதராபாத்தில் உள்ள தெலுங்குதேச கட்சி அலுவலகமான என்.டி.ஆர். பவனில் 5–வது ஆண்டாக நேற்று குடும்ப சொத்து விவரங்களை சந்திரபாபு நாயுடு மகன் லோகேஷ் வெளியிட்டார்.

அதன்படி சந்திரபாபு நாயுடுவின் குடும்ப சொத்து ரூ.61.25 கோடி என்றும் கடன் ரூ.15.30 கோடி என்றும் கடன் போக எஞ்சிய சொத்து மதிப்பு ரூ.45.95 கோடி என்றும் அவர் தெரிவித்தார்.

குடும்ப உறுப்பினர்கள் மற்றும் நிறுவனங்களின் சொத்து விவரங்களை தனித்தனியாக பட்டியலிட்டு தெரிவித்த லோகேஷ் இதற்கு மேல் எங்களுக்கு சொத்து இருப்பதாக நிரூபித்தால் அதனை அவர்களே எடுத்துக் கொள்ளலாம் என்று சவால் விடுத்தார். மேலும் லோகேஷ் தெரிவித்தது

நாங்கள் ஹெரிட்டேஜ் பால் நிறுவனத்தை 1992–ல் தொடங்கினோம். 7 மாநிலங்களில் ஹெரிட்டேஜ் நிறுவனம் செயல்பட்டு வருகிறது. இதன் மொத்த மார்க்கெட் மதிப்பு ரூ.913 கோடி. இதன் 40 சதவீதம் பங்குதாரர்கள் வசம் உள்ளது.

இங்கு பால், காய்கறி விற்பனை செய்வதன் மூலம் ஆண்டுக்கு ரூ.36 கோடி வருமானம் வருகிறது. இதுவே எங்கள் குடும்ப வருமானம் ஆகும். எங்கள் நிறுவனத்துக்கு அரசு எந்த சலுகையும் அளிக்கவில்லை. மாறாக ஹெரிடேஜ் மூலம் விவசாயிகள்தான் அதிகம் பயன் பெறுகிறார்கள்.

விவசாயிகளுக்கு மட்டும் ரூ.1238 கோடி கொடுத்து உள்ளோம். எதிர்காலத்தில் உலகம் முழுவதும் ஹெரிட்டேஜ் நிறுவனம் தொடங்க திட்டமிட்டு உள்ளோம் என அவர் தெரிவித்தார்.

லோகேஷ் வெளியிட்ட சொத்து விவரப்படி சந்திரபாபு நாயுடு பெயரில் மட்டும் ரூ.42 லட்சம் சொத்து உள்ளது. இது கடந்த ஆண்டை விட குறைந்து உள்ளது.

கடந்த ஆண்டு 77 லட்சத்துக்கு சொத்து இருந்தது குறிப்பிடத்தக்கது. முதலமைச்சர் சந்திரபாபுநாயுடு மனைவி புவனேஸ்வரிக்கு கடந்த ஆண்டு ரூ.31 கோடி சொத்து இருந்தது. அது இந்த ஆண்டு ரூ.33.7 கோடியாக அதிகரித்து உள்ளது.

லோகேஷ் சொத்து மதிப்பு ரூ.7.67 கோடி. அவரது மனைவி பிராமணி சொத்து மதிப்பு ரூ.4.77 கோடி. சந்திர பாபு நாயுடுவின் நிர்மான ஹோல்டிங் பிரைவேட் நிறுவனத்தின் சொத்து மதிப்பு ரூ.1.37 கோடி என வெளியிட்டார்.

மத்திய அரசு இந்தியாவில் 847 ஆபாச வலைத்தளங்களை தடைசெய்ய முடிவெடுத்த போது கடும் எதிர்ப்பு காரணமாக திடீரென தனது முடிவில் இருந்து பின்வாங்கியது. சிறுவர்கள் தொடர்பான ஆபாச வலைத்தளங்களுக்கு மட்டுமே தடை விதிக்கப்பட்டுள்ளதாக அறிவித்தது.

இந்நிலையில், உச்ச நீதிமன்ற பெண் வழக்கறிஞர்கள் சங்கம் அனைத்து ஆபாச வலைத்தளங்களுக்கும் தடை விதிக்க வேண்டும் என உச்ச நீதிமன்றத்தில் புதிய மனு ஒன்றை தற்போது தாக்கல் செய்துள்ளது.

நாட்டில் இன்று பெண்களுக்கு எதிரான குற்றங்கள் பெருகி கொண்டே வருகின்றன. பாலியல் தொடர்பான ஆபாச வலைத்தளங்கள் நாளுக்கு நாள் அதிகரித்து வருகின்றன. இத்தகையை வலைத்தளங்கள் பெண்கள், சிறுவர்கள் மற்றும் குழந்தைகளுக்கு எதிரான பாலியல் குற்றத்தின் பக்கம் இளையதலைமுறையினரை ஈர்க்கின்றன.

எனவே அனைத்து ஆபாச வலைத்தளங்கயும் தடை செய்ய உத்தரவிட வேண்டும் என அந்த மனுவில் கோரிக்கை விடப்பட்டுள்ளது.

ஐ.நா. பொதுச்சபை கூட்டத்தில் பங்கேற்க அமெரிக்காவின் நியூயார்க் நகரம் சென்ற பிரதமர் நரேந்திர மோடி, இன்று கலிபோர்னியாவில் நடைபெறும் பல்வேறு நிகழ்ச்சிகளில் பங்கேற்று வருகிறார்.

கலிபோர்னியாவின் சான் ஜோஸ் நகரில் ‘டிஜிட்டல் இந்தியா’ நிகழ்ச்சியில் பங்கேற்று பேசிய பிரதமர் மோடி, ’பேஸ்புக், டுவிட்டர், இன்ஸ்டாகிராம் போன்றவை நமது புதிய சுற்றுப்புறமாக மாறிவிட்டது’ என குறிப்பிட்டார்.

மேலும் அவர் பேசியதாவது , ’ஆசிரியர்கள் மற்றும் தாத்தா-பாட்டிகளின் வேலையை கூகுள் குறைத்துவிட்டது. உலகில் சூரியன் மறைவதை பார்க்க கலிபோர்னியா மிகப்பெரிய இடமாகும். ஆனால், இங்குதான் ஒவ்வொரு புதிய ஐடியாக்களும் முதலில் காணப்படுகிறது.

மராட்டியத்தில் விவசாயிகள் வாட்ஸ்-அப் குரூப் மூலம் தொழில் நுட்பம் தொடர்பான தகவல்களை பகிர்ந்து கொண்டு பலன்பெறுகின்றனர். தொழில் நுட்பம் என்பது அதிகாரம் அளிக்கும் மற்றும் நம்பிக்கை மற்றும் வாய்ப்புகளுக்கு இடையிலான பாலம் என்பதை நான் காண்கிறேன்.

மத்தியில் எனது அரசு பதவியேற்றதும், நாங்கள் நரேந்திர மோடி மொபைல் ஆப்-பை தொடங்கினோம். அது நான் மக்களுடன் நெருங்கிய தொடர்பு வைத்துக் கொள்ள உதவுகிறது’

எனது அரசு மத்தியில் பதவியேற்றதும், அதிகாரமளித்தலுக்கு ஒரு புதிய சகாப்தத்தை தொடங்க நாங்கள் இணையம் மற்றும் செல்போன் மூலமாக வறுமைக்கு எதிரான தாக்குதலை தொடங்கினோம்.

அனைத்து விமான நிலையங்கள் மற்றும் 500 ரெயில் நிலையங்களில் நாங்கள் ஒயர்லெஸ் நெட்வோர்க் சேவையை கொடுத்து வருகிறோம். இவ்விவகாரம் தொடர்பாக கூகுளுடன் நாங்கள் இணைந்து பணியாற்றி வருகிறோம்.

சமூக வலைதளங்கள், சமூக தடைகளை குறைத்துவிட்டது. சமூக வலைதளமானது பொதுமக்களை அடையாளத்தின் மூலம் மதிப்பிடாமல் மனிதம் என்ற மதிப்பின் மூலம் இணைக்கிறது. எனவே, அனைத்து பள்ளிகள் மற்றும் கல்லூரிகளை வயர்லெஸ் நெட்வொர்க்கு மூலம் இணைக்க உள்ளோம் என்று பேசினார்.

நமக்கு நாமே விடியல் எழுச்சி பயணத்தில் மதுரையில் 2 நாள் பயணத்தை முடித்துக் கொண்ட திமுக பொருளாளர் ஸ்டாலின், இன்று தேனி மாவட்டம் புறப்பட்டு சென்றார்.

தேனிக்கு புறப்படும் முன் மதுரையில் செய்தியாளர்களிடம் பேசிய ஸ்டாலின் எனது எழுச்சி பயணத்தை தடை செய்வதற்காக மதுரைக்குள் நுழைய தடை விதித்தனர். நான் நடைபயிற்சி செய்வதாக இருந்த பூங்காவிற்கும் பூட்டு போடப்பட்டது. எனது பயணத்தை அவர்கள் தடை செய்திருந்தால், தடையை மீறி இந்த பயணத்தை நடத்த வேண்டும் என நினைத்திருந்தேன். ஆனால் அவ்வாறு நடக்கவில்லை. பல்வேறு தடைகளை மீறி இந்த பயணம் எழுச்சிகரமாக நடந்து கொண்டுள்ளது. தொடர்ந்து பயணம் நடைபெறும். எனது 2ம் கட்ட பயணம் குறித்த அறிவிப்பு விரைவில் வெளியிடப்படும்.

தமிழக அரசு மட்டுமின்றி மதுரை மாநகராட்சியும் குடிநீர், ரேஷன் பொருட்கள், முதியோர் உதவித்தொகை ஆகியவற்றை முறையாக வழங்குவதில்லை .

மேலும் இலவச பொருட்கள் எங்களுக்கு வேண்டாம். இலவசங்களை அடகு வைத்து கணவன்மார்கள் மது குடித்து விடுவதால் தமிழகத்தில் பூரண மதுவிலக்கை கொண்டு வர வேண்டும் என பொதுமக்களும், பெண்களும் குறைகூறி உள்ளனர்.

சட்டசபையில் நடைபெற்ற மானிய கோரிக்கை மீதான விவாதத்தின் போது பேசிய அமைச்சர் நத்தம் விஸ்வநாதன், மதுவிலக்கை கொண்டு வரமுடியாது என பேசி உள்ளது வேதனை அளிக்கிறது.

மதுவிலக்கு கொண்டு வரப்படுமா, வராதா என்பது குறித்து சட்டசபையில் முதலமைச்சர் ஜெயலலிதா தெளிவுபடுத்த வேண்டும் என ஸ்டாலின் கூறினார் .

வருமானத்திற்கு அதிகமாக சொத்து குவிப்பு வழக்கில் சிக்கிய இமாச்சல பிரதேசத்தின் முதலமைச்சர் வீரபத்திரசிங் வீட்டில் சி.பி.ஐ. அதிகாரிகள் நடத்தினர்.

இமாச்சல பிரதேசத்தில் காங்கிரஸ் கட்சியின் ஆட்சி நடக்கிறது.
கடந்த 2009-ம் ஆண்டு முதல் 2012-ம் ஆண்டு வரை பிரதமர் மன்மோகன்சிங் அமைச்சரவையில் மத்திய அமைச்சராக பதவி வகித்தார் வீரபத்திரசிங், இவர் மீதும், மனைவி பிரதீபா சிங், மகன் விக்ரமாதித்யாசிங் ஆகியோர் மீது வருமானத்திற்கு அதிகமாக சொத்து சேர்த்ததாக, டில்லி ஐகோர்டில் பொதுநல வழக்கு தொடரப்பட்டது. கடந்த ஜுன் மாதம் வீரபத்திரசிங் மீது வருமானத்திற்கு அதிகமாக சொத்து சேர்த்ததாக வழக்கில் முதல் தகவல் அறிக்கை பதிவு செய்யப்பட்டது.

இதையடுத்து இந்த வழக்கினை சி.பி.ஐ. மற்றும் அமலாக்கத்துறையினர் தீவிரப்படுத்தி தலைநகர் ஷிம்லாவில் உள்ள முதலமைச்சரின் வீடு, அலுவலங்கள் உள்ளிட்ட 11 இடங்களில் நேற்று சி.பி.ஐ. மற்றும் அமலாக்கத்துறையின் 18 பேர் கொண்ட குழுவினர் அதிரடியாக ரெய்டு நடத்தினர்.

முக்கிய ஆவணங்கள் கைப்பற்றப்பட்டன. சி.பி.ஐ. ரெய்டால் முதலமைச்சர்வீரபத்திரசிங்கிற்கு நெருக்கடி ஏற்பட்டுள்ளது.