இலங்கை போர்க்குற்றம் குறித்து சர்வதேச நீதிபதிகள் அடங்கிய உள்நாட்டு விசாரணை நடத்தலாம் என்று அமெரிக்க வரைவு தீர்மானத்தில் கூறப்பட்டுள்ளது. இந்நிலையில், இதுகுறித்து இலங்கை பிரதமர் ரனில் விக்ரமசிங்கே நிருபர்களிடம் நேற்று தெரிவித்ததாவது:-

எனது அரசு இலங்கை அரசியல் சாசனத்துக்கு உட்பட்டுத்தான் செயல்பட முடியும். வெளிநாட்டு நீதிபதிகள், இங்கு செயல்படுவதை அரசியல் சாசனம் அனுமதிக்காது. எனவே, உள்நாட்டு விசாரணையில் வெளிநாட்டு நீதிபதிகளை இடம்பெறச் செய்ய முடியாது. ஐ.நா. மனித உரிமை கவுன்சிலிடம் இலங்கை வெளியுறவுதுறை அமைச்சர் எடுத்துக் கூறுவார்.

அதேசமயத்தில், சர்வதேச நிபுணர்களின் உதவியை ஏற்றுக்கொள்வோம். அதற்கு கூட இலங்கை நீதித்துறை ஒப்புதல் அளிக்க வேண்டும். ராஜபக்சேவின் தவறால்தான், சர்வதேச விசாரணையை சந்திக்கும் நிலைக்கு இலங்கை தள்ளப்பட்டது. ஆனால், நாங்கள் இப்பிரச்சினையை சரியாக கையாண்டு, போர்க்குற்ற விசாரணையை சந்திப்பதில் இருந்து ராஜபக்சேவை காப்பாற்றி உள்ளோம் என ரனில் விக்ரமசிங்கே தெரிவித்தார்.

துடைப்பத்தை வைத்து போஸ்டர்களிலும், போட்டோக்களிலும் போஸ் கொடுத்து கொண்டு, நாடகம் நடத்தும் அரவிந்த் கெஜ்ரிவால் முதலில் இந்த மனநிலையை விட்டு வெளியேவந்து பின்னர் யதார்த்தத்தை பற்றி விமர்சிக்கட்டும் என மத்திய கலாசாரத்துறை அமைச்சர் மகேஷ் ஷர்மா கூறியுள்ளார்.

முன்னதாக நேற்று, இந்தியாவில் தயாரியுங்கள் என்ற முழக்கத்துடன் உலகம் முழுவதும் பிரதமர் நரேந்திர மோடி சுற்றுப்பயணம் செய்துவரும் நிலையில் இந்தியாவில் தயாரியுங்கள் என்பதைவிட இந்தியாவை உருவாக்குங்கள் என்பதே முக்கியம் என டெல்லி முதலமைச்சர் கெஜ்ரிவால் கூறியிருந்தார்.

இதுதொடர்பாக, தனது டுவிட்டரில் நேற்று கருத்து பதிவிட்டுள்ள கெஜ்ரிவால், ஆம் ஆத்மி கட்சியின் தலைமையிலான எங்கள் அரசில் சுகாதாரம், கல்வி, குடிநீர், பாதுகாப்பு, நீதி, உள்கட்டமைப்பு போன்றவற்றுக்கு முக்கியத்துவம் அளித்து வந்துள்ளோம். மின்சார உற்பத்தி துறையை பற்றி கூறப்பட்டுவந்த தவறான விமர்சனங்கள் எல்லாம் எங்களது நேர்மையான அரசு நிர்வாகத்திறனால் தவிடுப்பொடியாக்கப்பட்டுள்ளன.

இந்தியாவில் தயாரியுங்கள் என்பதைவிட மேற்கண்ட துறைகளில் முதலீடு செய்து இந்தியாவை உருவாக்கும் பணியே மக்களுக்கு நன்மை பயக்கும் நல்ல திட்டமாக இருக்கும். மக்கள்தான் நமது சிறந்த சொத்து. அந்த மக்களில் முதலீடு செய்தால் போதும். முதலில் இந்தியாவை நாம் உருவாக்கினால் போதும். பின்னர், உலகம் தானாகவே இந்தியாவில் தயாரிக்க தொடங்கிவிடும் எனவும் தனது டுவிட்டர் பக்கத்தில் கெஜ்ரிவால் குறிப்பிட்டிருந்தார்.

இந்நிலையில், பிரதமரின் முயற்சிகளுக்கு மாற்றாக கருத்து வெளியிட்டுள்ள கெஜ்ரிவாலுக்கு பா.ஜ.க. கடும் எதிர்ப்பு தெரிவித்துள்ளது. இதுதொடர்பாக, டெல்லியில் நடைபெற்ற நிகழ்ச்சி ஒன்றில் பங்கேற்ற மத்திய கலாசாரத்துறை அமைச்சர் மகேஷ் ஷர்மா, கெஜ்ரிவாலுக்கு கண்டனம் தெரிவிக்கும் வகையில் பதில் அளித்துள்ளார்.

துடைப்பத்தை வைத்து நாடகம் நடத்திக் கொண்டு, போஸ்டர் மற்றும் புகைப்படங்களுக்குள் அடைபட்டு கிடக்கும் கெஜ்ரிவால் போன்றவர்கள் முதலில் அந்த மனநிலையில் இருந்து வெளியில்வந்து, பிறகு யதார்த்தத்தைப் பற்றி அவர்கள் விமர்சிக்கலாம்.

மோடியின் அரசைப் பற்றி கவலைப்படுவதை விட்டுவிட்டு, டெல்லியைப் பற்றி ஆவர் கவலைப்பட வேண்டும். டெல்லி நகரம் சந்தித்துவரும் பிரச்சனைகளைப் பற்றி அவர் கவலைப்பட வேண்டும் என மகேஷ் ஷர்மா கூறியுள்ளார்.

நாமக்கல் மாவட்டம் திருச்செங்கோட்டில் துணை போலீஸ் சூப்பிரண்டாக பணியாற்றிய விஷ்ணுபிரியா 18-ந்தேதி தற்கொலை செய்து கொண்டார்.

இந்நிலையில் கடலூரில் உள்ள கோண்டூரில் விஷ்ணுபிரியாவின் பெற்றோர் வசித்து வரும் வீட்டுக்கு நேற்று மதியம் கனிமொழி எம்.பி. வந்தார். அங்கு வைக்கப்பட்டிருந்த, விஷ்ணுபிரியா உருவப்படத்துக்கு அஞ்சலி செலுத்தி விட்டு, அவருடைய பெற்றோருக்கு ஆறுதல் கூறினார். அவருடன் முன்னாள் மத்திய அமைச்சர் டி.ஆர்.பாலு மற்றும் தி.மு.க. நிர்வாகிகள் வந்திருந்தனர்.

பின்னர் கனிமொழி எம்.பி. செய்தியாளர்களிடம் கூறுகையில், விஷ்ணுபிரியா மரணம் சி.பி.ஐ. விசாரணையாக இருக்க வேண்டும் என்று தலைவர் கருணாநிதி ஏற்கனவே தெரிவித்து இருக்கிறார். முதலமைச்சரின் கட்டுப்பாட்டில் உள்ள காவல்துறையில் பல பெண் காவலர்கள் இப்படிப்பட்ட நிகழ்வை தேடிக்கொண்டு இருக்கிறார்கள். பெண் காவலர்கள் சந்திக்கிற பிரச்சினைகளை தீர்க்கக்கூடிய அமைப்பு கூட தமிழக காவல்துறையில் இல்லை. தமிழகத்தில் பல அரசு அதிகாரிகள் இது போன்ற துயரமான முடிவை தேடிக்கொள்ளும் சூழல் தான் உள்ளது என கூறினார்.

முன்னதாக மக்கள் பாதுகாப்பு கழக நிறுவனத்தலைவர் டிராபிக் ராமசாமி, விஷ்ணுபிரியா வீட்டுக்கு வந்து அவருடைய உருவப்படத்துக்கு அஞ்சலி செலுத்தி விட்டு, அவருடைய பெற்றோருக்கு ஆறுதல் கூறினார்.

பின்னர் அவர் செய்தியாளர்களிடம் கூறுகையில், விஷ்ணுபிரியா தற்கொலை வழக்கில் சி.பி.ஐ. விசாரணை தேவைப்படுவது குறித்து சி.பி.ஐ. இயக்குனருக்கு கடிதம் எழுதுவேன். வழக்கும் தொடரப்போகிறேன். இனிமேல் காவல்துறை தன்னிச்சையாக செயல்படக்கூடிய நிலையை நீதிமன்றம் மூலம் உருவாக்கிக்காட்டுவேன் என்றார்.

தமிழக பாஜ.க. தலைவர் தமிழிசை சவுந்தரராஜன் நேற்று பிற்பகல் விஷ்ணுபிரியாவின் வீட்டுக்கு வந்து அஞ்சலி செலுத்தி அவருடைய பெற்றோருக்கு ஆறுதல் கூறினார்.

பின்னர் அவர் செய்தியாளர்களிடம் கூறுகையில், விஷ்ணுபிரியா விசாரித்த வழக்கில் குற்றம் சாட்டப்பட்டவர்களும், சந்தேகத்துக்கு உரியவர்களும் உயிருடன் இருக்கும் போது, விசாரணை அதிகாரி தற்கொலை செய்து கொண்டதை பார்க்கும் போது, தமிழகத்தில் சட்டமும், வழக்கும் எதை நோக்கி சென்று கொண்டு இருக்கிறது என்ற கேள்வி எழுகிறது. நேர்மையான அதிகாரிகள் தமிழகத்தில் பணியாற்ற முடியாத சூழ்நிலை உள்ளது. தமிழக காவல்துறையில் உயர் அதிகாரிகளால் பெண் அதிகாரிகள் எப்படி நடத்தப்படுகிறார்கள் என்பதை கண்காணிக்க வேண்டும். இந்த வழக்கில் சி.பி.ஐ. விசாரணை நடத்தி உண்மை வெளிக்கொண்டு வரப்பட வேண்டும் என்று கூறினார்.

நேற்று இரவு பாகிஸ்தானை சேர்ந்த ஹேக்கர்கள் கேரள அரசாங்கத்தின் அதிகாரபூர்வ ‘www.keralagov.in’ என்ற இணையதளத்தை ஹேக் செய்து முடக்கியுள்ளனர்.

இது போன்ற செயல்கள் உலகம் முழுவதும் நடந்துவருகிறது.
அதை சீரமைக்க தீவிர நடவடிக்கை எடுக்கப்பட்டு வருகிறது என கேரள உள்துறை அமைச்சர் ரமேஷ் சென்னிதாலா கூறியுள்ளார். மேலும் வருங்காலத்தில் இது போன்று நடைபெறாமல் இருக்க கேரள அரசு நடவடிக்கை வருகிறது என தெரிவித்தார்

திருவண்ணாமலை மாவட்டம் அருகே, ஆசிரியர் வேலை வாங்கி தருவதாக, ரூ.5.51 லட்சம் மோசடி செய்த, தமிழ்நாடு அரசு போக்குவரத்து பொறியாளர் மீது, போலீசார் வழக்கு பதிவு செய்துள்ளனர்.

திருவண்ணாமலை மாவட்டம், போளூர் வசந்தம் நகரைச் சேர்ந்தவர் விவசாயி பழனியாண்டி, 65. இவரது மகன் ராஜேஷ். ஆசிரியர் பயிற்சி முடித்துள்ளார். மகள் சுபாவின் கணவர் சிவக்குமார், சென்னை தமிழ்நாடு அரசு மாநகர போக்குவரத்து பணிமனையில் இளநிலை பொறியாளராக பணியாற்றி வருகிறார்.
இவருடன் திண்டுக்கல்லை சேர்ந்த மாரியப்பன், 57, என்பவரும், இளநிலை பொறியாளராக பணியாற்றி வருகிறார். இந்நிலையில் ஆசிரியர் பயிற்சி முடித்துள்ள தனது மைத்துனர் ராஜேசுக்கு வேலை வாங்க வேண்டும் என்று சிவக்குமார் கூறியுள்ளார். அதற்கு மாரியப்பன், தான் வேலை வாங்கி தருவதாக கூறியுள்ளார்.

இதை நம்பி சிவக்குமார், தன் மாமனார் பழனியாண்டியிடம், 7 லட்சம் பெற்று, மாரியப்பனிடம் கொடுத்துள்ளார். ஆனால், மாரியப்பன் வேலை வாங்கி தரவில்லை. பணத்தையும் திருப்பி கொடுக்கவில்லை. இதனால் அவர்மீது சென்னை உயர்நீதிமன்றத்தில் வழக்கு தொடர்ந்தனர்.

அதை தொடர்ந்து 1.48 லட்சம் ரூபாயை திருப்பி கொடுத்தார். மீதி பணம் ரூ.5லட்சத்து. 51ஆயிரத்து. 500ஐ விரைவில் தருவதாக தெரிவித்தார். ஆனால், இதுவரை தராததால் மீண்டும் உயர்நீதிமன்றத்தில் பழனியாண்டி வழக்கு தொடர்ந்துள்ளார். இந்த வழக்கை விசாரிக்க கோரி போளூர் போலீசாருக்கு, உயர்நீதிமன்றம் உத்தரவிட்டது. அதன்பேரில் போளூர் போலீசார் தமிழ்நாடு அரசு போக்குவரத்து பொறியாளர் மீது வழக்கு பதிவு செய்து விசாரணை நடத்தி வருகின்றனர்.

ரூ. 13.35 லட்சம் மோசடி செய்து தீபாவளி சீட்டு நடத்தி, தலைமறைவானவர் மீது பூலாம்பட்டி போலீசார் வழக்கு பதிவு செய்துள்ளனர்.

சேலம் மாவட்டம் இடைப்பாடி அருகே, மொரசப்பட்டியை சேர்ந்தவர் மாது மகன் விஜயகுமார், 39. இவர் சீட்டு நடத்தி வந்துள்ளார். தீபாவளி பண்டிகைக்காக ஆண்டுதோறும் சீட்டு நடத்தி, பணமாகவும், பொருளாகவும் தந்துள்ளார். அதேபோல் இந்த ஆண்டின் தீபாவளிக்காக சீட்டு சேர்த்துள்ளார். வாரந்தோறும் பணம் செலுத்தி, தீபாவளி பண்டிகை சமயத்தில் பணமாக பெற்று குடும்பத்தினருக்காக செலவு செய்து அப்பகுதியில் உள்ள பெரும்பாலான மக்களின் வழக்கமாக உள்ளது.

இதை நம்பி ஏராளமான மக்கள் சீட்டு போட்டுள்ளனர். கடந்த 10 மாதங்களாக பணத்தை வசூல் செய்த விஜயகுமார், தீபாவளி பண்டிகை வர இன்னும் ஒருமாதம் மட்டுமே உள்ள நிலையில் கடந்த 4 நாட்களாக காணாமல் போய் உள்ளார். அதனால் சீட்டு போட்டவர்கள் விஜயகுமாரை தேடியுள்ளனர். அவர் இருக்கும் இடம் தெரியாத நிலையில், சீட்டு போட்ட ஐந்து பேர் பூலாம்பட்டி போலீசில் புகார் கொடுத்தனர். புகாரில், 13 லட்சத்து 35 ஆயிரம் ரூபாய் தர வேண்டும் என, கூறியுள்ளனர். பூலாம்பட்டி போலீசார் விஜயகுமாரை வலை வீசி தேடி வருகின்றனர்.

சவுதி அரேபியாவின் மெக்காவில் ஏற்பட்ட கூட்ட நெரிசலில் நேற்று(26ம் தேதி) நிலவரப்படி இந்தியர்கள் சிக்கி 35 ஹஜ் பயணிகள் உயிரிழந்துள்ளனர். இந்தியர் பலி எண்ணிக்கை 35 ஆக அதிகரித்து. மேலும், 4 இந்தியர்களின் உடல்கள் இன்னும் அடையாளம் காணப்படவில்லை.இதில், ஐந்து பேர் கேரளாவைச் சேர்ந்தவர்கள்; இருவர், ஜார்க்கண்ட் மற்றும் உ.பி.,யைச் சேர்ந்தவர்கள். எஞ்சியோரை, அடையாளம் காணும் பணி நடைபெற்று வருகிறது என இந்திய வெளியுறவு அமைச்சர் சுஷ்மா சுவராஜ், ‘டுவிட்டரில்’ தெரிவித்து உள்ளார்.
இத்தகவலை, ஜெட்டாவில் உள்ள ஹஜ் தூதரகமும் உறுதி செய்துள்ளது.

இஸ்லாமியர்களின் புனித தலமான மெக்காவிற்கு உலகம் முழுவதிலும் இருந்து கோடிக்கணக்கானவர்கள் ஹஜ் புனித யாத்திரை மேற்கொண்டு வருகின்றனர். இன்று (செப்.,24) பக்ரீத் என்பதால் அதிகமானவர்கள் வழிபாடு நடத்த மெக்கா நகரில் குவிந்தனர். அதிகமானவர்கள் ஒரே நேரத்தில் மினாவில் சாத்தான் மீது கல் எறியும் நிகழ்வில் பங்கேற்றனர். இந்நேரத்தில் கூட்ட நெரிசல் ஏற்பட்டது. இதில் சிக்கி சுமார் 760 பேர் உயிரிழந்துள்ளனர். 930 க்கும் மேற்பட்டோர் படுகாயமுற்றனர். தொடர்ந்து அங்கு மீட்புப் பணிகள் நடைபெற்று வருகிறது.

படுகாயம் அடைந்தவர்களின் எண்ணிக்கை அதிக அளவில் உள்ளதால் சவுதி அரேபியாவில் உள்ள அனைத்து மருத்துவமனைகளில் அவசர நிலை சிகிச்சைகள் அளிக்க தயார் நிலையில் வைக்கப்பட்டுள்ளன.இந்தியாவில் இருந்து இந்த ஆண்டு மட்டும் இதுவரை 1,50,000 பேர் ஹஜ் யாத்திரை சென்றுள்ளனர்.மெக்கா நகரில் இம்மாதத்தில் நடைபெறும் இரண்டாவது பயங்கர விபத்து இது. கடந்த சில நாட்களுக்கு முன் மெக்கா மசூதியில் கிரேன் விழுந்த சம்பவத்தில் 105 பேர் பலியாகியது குறிப்பிடத்தக்கது.