மும்பை: ஐபிஎல் சூதாட்டப் புகார் காரணமாக கடந்த ஆண்டு கிரிக்கெட் வாரிய தலைவராக தாற்காலிக பொறுப்பில் இந்திய கிரிக்கெட் அணியின் முன்னாள் கேப்டன் கவாஸ்கர் உச்ச நீதிமன்றத்தால் நியமிக்கப்பட்டார். அப்போது, கவாஸ்கருக்கு, அவரது பிற பணிகளைக் கணக்கில் கொண்டு சம்பளத்தைக் கணக்கிட்டுக் கொடுக்கும்படி பிசிசிஐக்கு உச்ச நீதிமன்றம் உத்தரவிட்டது. இது குறித்து கவாஸ்கர், பிசிசிஐக்கு எழுதியுள்ள கடிதத்தில், தான் ஐபிஎல் பணிகளைக் கவனித்துக் கொண்டதற்கான ஊதியமாக ரூ.1.90 கோடி அளிக்க வேண்டும் என்று கூறியுள்ளார். தான் பிசிசிஐ தலைவராகப் பணியாற்றிய போது, தனது பிற பணிகளான டிவி வர்ணனை, மீடியாக்களுக்கு பேட்டி, கட்டுரை விமர்சனம் எழுதுவது உள்ளிட்டவற்றை நிறுத்தியதால் ஏற்பட்ட இழப்பீடாக இந்தத் தொகையை அவர் கேட்டுள்ளதாகக் கூறப்படுகிறது.

சென்னை: அமைச்சர் விஜயபாஸ்கர் தொடர்ந்த அவதூறு வழக்கில், தமிழ்நாடு காங்கிரஸ் கமிட்டி தலைவர் ஈவிகேஎஸ் இளங்கோவன் நேரில் ஆஜராக உயர்நீதிமன்றம் உத்தரவிட்டுள்ளது. அமைச்சர் விஜயபாஸ்கர் தொடர்ந்த அவதூறு வழக்கில் ஜூன் 10ல் ஆஜராக நீதிமன்றம் உத்தரவு பிறப்பித்துள்ளது. காசநோய் மருத்துவர் அறிவொளி மரணத்தில் அமைச்சருக்கு தொடர்பு என ஈவிகேஎஸ் பேசியிருந்தார். ஈவிகேஎஸ் பேச்சு தனக்கு அவப்பெயரை ஏற்படுத்தும் நோக்கில் உள்ளது என விஜயபாஸ்கர் வழக்கு தாக்கல் செய்தார்.

ஹைதராபாத்: வளர்ப்பு நாய்களை விட்டுச் சென்றுள்ளார் சந்திரபாபு நாயுடு என்று கூறியுள்ளார் தெலங்கானா முதல்வர் சந்திரசேகர ராவ் சர்ச்சைப் பேச்சு செகந்திராபாத்தில் நடைபெற்ற தெலங்கானா ராஷ்ட்ரிய சமிதி கட்சிப் பொதுக் கூட்டத்தில் பேசிய தெலங்கானா முதல்வர் சந்திரசேகர ராவ், நம் பக்கத்தில் இருக்கும் ஒரு முதல்வர் கிருக்கிடு நாயுடு, மக்களுக்குப் பொய்யான வாக்குறுதிகளைக் கொடுத்து ஆட்சியைப் பிடித்தவர். பெற்ற தாய்க்கே சோறுபோடாதவர்கள், சித்திக்கு தங்க வளையல் வாங்கித் தருவதாகக் கூறுவது போல உள்ளது அவரது வாக்குறுதிகள். தெலங்கானாவில் அவரது வளர்ப்பு நாய்கள் சில உள்ளன. அவை நம்மைப் பார்த்து குரைக்கின்றன என்று பேசியுள்ளார்.

காத்மாண்டு: நிலநடுக்கத்தால் நேபாளத் தலைநகர் காத்மாண்டு நகரம், தனது புவித் தளத்திலிருந்து சுமார் 10 அடி நகர்ந்து இருப்பதாக தகவல் வெளியாகியுள்ளது. பூகம்பம் குறித்து ஆய்வு செய்து வரும் லண்டனின் கேம்பிரிட்ஜ் பல்கலைக்கழக நில ஆய்வியல் மைய நிபுணர்கள் இந்தத் தகவலை வெளியிட்டுள்ளனர். காத்மாண்டு பகுதியில் ஒலி அலைகளை ஆய்வு செய்த போது, தரைத்தளத்தில் தற்போதுள்ள நிலையிலிருந்து காத்மாண்டு தென்பகுதியில் சுமார் 10 அடி நகர்ந்திருப்பதாகத் தெரிவிக்கப்பட்டுள்ளது. இத்தகவலை ஆஸ்திரேலியாவின் அடிலெய்டு பல்கலைக்கழக இயற்பியல் துறைப் பேராசிரியர் ஒருவரும் உறுதிப்படுத்தியுள்ளார். இருப்பினும் உலகின் மிக உயர்ந்த சிகரமான எவரெஸ்ட்டின் பூமி தள அடுக்குகளில் எவ்வித மாற்றமும் ஏற்படவில்லை என நிபுணர்கள் தெரிவித்துள்ளனர்.

செய்தியாளர் கேள்வியையே எதிர் கொள்ள முடியாத விஜயகாந்தை எதிர்க்கட்சி தலைவர் என்று ஏற்க முடியாது என்று நாம் தமிழர் கட்சியின் தலைமை ஒருங்கிணைப்பாளர் சீமான் கூறியுள்ளார். கங்கைகொண்டான் சிப்காட்டில் செயல்பட்டு வரும் தனியார் குளிர்பான நிறுவனத்தை மூட வேண்டும் என்பதை வலியுறுத்தி பாளையங்கோட்டை மார்க்கெட் திடலில் இன்று நாம் தமிழர் கட்சி சார்பில் உண்ணாவிரத போராட்டம் நடைபெற்றது. அதில் கலந்துகொண்ட நாம் தமிழர் கட்சியின் தலைமை ஒருங்கிணைப்பாளர் சீமான் செய்தியாளர்களிடம் பேசுகையில், நெல்லை மாவட்டத்தில் உள்ள வெளிநாட்டு குளிர்பான கம்பெனிகளை மூடும் வரை நாங்கள் போராடுவோம்… சொத்து குவிப்பு வழக்கில் ஜெயலலிதா விடுதலையானால் மகிழ்ச்சி அடைவேன். செய்தியாளர்களின் கேள்வியை எதிர்கொள்ள முடியாதவர் எப்படி எதிர்க்கட்சி தலைவராக முடியும். எனவே விஜயகாந்தை எதிர்க்கட்சி தலைவர் என்று ஏற்க முடியாது. 20 தமிழர்கள் கொலை செய்யப்பட்ட போது அந்த எதிர்க்கட்சித் தலைவர் ஏன் அனைத்து கட்சியினருடன் பிரதமரை சந்திக்கவில்லை என்றார்.