புது தில்லி: கடந்த மாதம் நடைபெற்ற ரஞ்சி போட்டியின் போது தன்னை ஸ்பாட் பிக்சிங்கில் ஈடுபடுமாறு ஒருவர் தெரிவித்ததாக ராஜஸ்தான் ராயல்ஸ் வீரர் ஒருவர் தகவல் வெளியிட்டார். இது பெரும் அதிர்ச்சியை ஏற்படுத்தியுள்ளது. இந்தத் தகவலை உறுதிப்படுத்திய பிசிசிஐ செயலர் அனுராக் தாகூர், தனது டிவிட்டர் பதிவில், ஸ்பாட் பிக்ஸ்சிங் தொடர்பாக வீரரிடம் கேட்கப்பட்டுள்ளது. அவர் பிசிசிஐயின் ஊழல் தடுப்புப் பிரிவில் இது குறித்து தகவல் அளித்துவிட்டார். பிசிசிஐயின் கொள்கைகள் சாதகமான விளைவுகளைக் கொடுத்துள்ளது மகிழ்ச்சி அளிக்கிறது” என்று அவர் தெரிவித்துள்ளார். எனினும் இந்தத் தகவலைத் தெரிவித்த மும்பையைச் சேர்ந்த அந்த வீரரின் பெயரை தாகூர் வெளியிடவில்லை. நடப்பு ஐபிஎல் தொடரில் மும்பையைச் சேர்ந்த அஜிங்யா ரஹானே, பிரவீண் தாம்பே, தினேஷ் சாலுங்கே, தவால் குல்கர்னி , அபிஷேக் நாயர் ஆகியோர் ராஜஸ்தான் ராயல்ஸ் அணியில் விளையாடி வருகின்றனர்.

ஆக்ரா: தாஜ்மஹாலை சிவன் கோவிலாக அறிவிக்கக் கோரி தொடரப்பட்ட வழக்கில் மத்திய அரசு, கலாசார அமைச்சகம், உள்துறைச் செயலர், தொல்பொருள் துறை ஆகியவற்றுக்கு நோட்டீஸ் அனுப்ப நீதிமன்றம் உத்தரவிட்டது. ஆக்ராவில் அமைந்துள்ள உலக அதிசயங்களில் ஒன்றான தாஜ்மகாலை தேஜோ மகாலயா என்ற சிவன் கோவிலாக அறிவிக்க வேண்டும் எனக் கூறி ஹரிசங்கர் ஜெயின் என்பவர் தலைமையில் 6 வழக்குரைஞர்கள் ஆக்ரா மாவட்ட நீதிமன்றத்தில் வழக்கு தொடர்ந்தனர். அந்த மனுவில்… 1212-ம் ஆண்டு ராஜா பரமர்தி தேவ் என்பவர்தான் தேஜோ மஹாலயாவைக் கட்டினார். பின்னர் ஜெய்ப்பூர் மன்னர் ராஜா மான் சிங் இதை கைப்பற்றினார். அவருக்குப் பின் அதை ராஜா ஜெய் சிங் நிர்வகித்தார். 1632-ம் ஆண்டு ஷாஜகான் இதைக் கைப்பற்றினார். அதன் பிறகு அங்கு மும்தாஜின் நினைவுச் சின்னம் ஆக்கப்பட்டு, முகலாய பாணிக்கு கட்டடங்களில் மாற்றம் செய்யப்பட்டது. எனவே இதனை தேஜோ மஹாலயா என்று அறிவிக்க வேண்டும் எனக் கூறியுள்ளனர். இந்த மனுவை விசாரணைக்கு எடுத்துக் கொண்ட நீதிபதி, இது குறித்து வரும் மே 5-ஆம் தேதிக்குள் பதிலளிக்குமாறு மத்திய அரசு, கலாசார அமைச்சகம், உள்துறைச் செயலாளர் மற்றும் இந்திய தொல்பொருள் ஆய்வுத் துறைக்கு நோட்டீஸ் அனுப்ப உத்தரவிட்டார். இந்த வழக்கின் அடுத்த விசாரணை மே 13-ந் தேதிக்கு ஒத்திவைக்கப்பட்டது.

மேற்கு வங்க மாநிலம் பர்த்வானில் பஸ் ஒன்று கவிழ்ந்து விபத்துக்கு உள்ளானதில் 13 பேர் உயிரிழந்தனர். 30க்கும் மேற்பட்டோர் காயமடைந்தனர். குத்குரி கிராம மக்கள் மூன்று பஸ்களில் நாடியா மாவட்டத்தில் உள்ள மாயாபூர் கிராமத்திற்குச் சென்றனர். அப்போது, அவர்கள் சென்ற பஸ்கள் ஒன்றை ஒன்று வேகமாக முந்திச் சென்றுள்ளது. அப்போது, பார்த்வான் – காத்வா சாலையில் தேவாந்திகி கிராமத்தின் அருகே வேகமாகச் சென்ற பஸ் ஒன்று கவிழ்ந்து விபத்துக்குள்ளானது. இதில் 13 பேர் சம்பவ இடத்திலேயே உயிரிழந்தனர். 30க்கும் மேற்பட்டோர் காயமடைந்தனர். தகவல் அறிந்த அப்பகுதி கிராம மக்கள் விரைந்து வந்து மீட்புப் பணியில் ஈடுபட்டனர். காயம் அடைந்தவர்கள் உடனடியாக அருகில் உள்ள மருத்துவமனையில் சிகிச்சைக்காக சேர்க்கப்பட்டனர். இந்த விபத்து குறித்து அங்கு வந்த போலீஸார் மீட்பு பணியில் ஈடுபட்டனர். இது குறித்து வழக்குப் பதிந்து விசாரணை மேற்கொண்டனர். விபத்து நடந்த பஸ்சில் சுமார் 70 பேர் இருந்ததாக போலீஸார் தெரிவித்துள்ளனர்.