சென்னை: தமிழக சட்டமன்றத்தின் நடப்பு கூட்டத் தொடரின் பங்கேற்க இயலாதபடி, கூட்டத்தொடர் முழுவதும் தே.மு.தி.க. உறுப்பினர்கள் இன்று சஸ்பெண்ட் செய்யப்பட்டனர். அக்கட்சியின் உறுப்பினர்கள் மோகன்ராஜ், சந்திரகுமார் ஆகியோர் அடுத்த கூட்டத் தொடரில் பங்கேற்கவும் தடை விதிக்கப்பட்டுள்ளது. இதைக் கண்டித்து, தே.மு.தி.க., உறுப்பினர்கள் சட்டசபை வளாகத்தில் தர்ணா போராட்டத்தில் ஈடுபட்டனர். பேரவைத் தலைவர் இருக்கையை முற்றுகையிட்டு ஆவணங்களைத் தூக்கி வீசியதாகவும, அவைக் காவலர்களைத் தாக்கியதாகவும் தே.மு.தி.க., உறுப்பினர்கள் மீது புகார் கூறப்பட்டது. தொடர்புடைய செய்தி: [su_permalink id=”2589″][/su_permalink]

சென்னை: தங்கம் விலை இன்று சவனுக்கு ரூ. 40 உயர்ந்துள்ளது. புதன்கிழமை நேற்று தங்கத்தின் விலை சவரனுக்கு ரூ.296 குறைந்திருந்தது. இந்நிலையில், இன்று சவரனுக்கு ரூ.40 உயர்ந்துள்ளது. தங்கம்-வௌ்ளி சந்தையில், காலைநேர நிலவரப்படி, 22 காரட் ஒரு கிராம் ஆபரணத் தங்கத்தின் விலை ரூ.2,543 என்ற அளவிலும், சவரனுக்கு ரூ.40 உயர்ந்து ரூ.20,344 என்ற அளவிலும் விற்பனையானது. 24 காரட் 10 கிராம் தங்கத்தின் விலை ரூ.60 உயர்ந்து ரூ.27,200-க்கு விற்பனையானது. வௌ்ளியின் விலையும் சற்று உயர்ந்தது. வெள்ளி கிராமுக்கு 20 காசுகள் உயர்ந்து ரூ.39.90 என்ற அளவிலும், பார் வௌ்ளி கிலோவுக்கு ரூ.260 உயர்ந்து ரூ.37,325 என்ற அளவிலும் விற்பனையானது.

கரூர்: கரூரைச் சேர்ந்த ஒருவரிடம் ரூ.1 கோடி பரிசு கிடைத்துள்ளதாக செல்பேசியில் எஸ்.எம்.எஸ்., அனுப்பி, ரூ. 9 லட்சம் மோசடி செய்த மர்ம நபர்கள் குறித்து போலீஸார் விசாரணை நடத்தி வருகின்றனர். கரூர் வெங்கமேடு சின்னகுளத்துப் பாளையத்தைச் சேர்ந்தவர் கண்ணையன் (48). இவரது செல்பேசிக்கு கடந்த அக்.14-ஆம் தேதி ஒரு எஸ்,எம்.எஸ் வந்தது. அதனை தில்லியைச் சேர்ந்த பிராங்க்ளின் என்பவர் அனுப்பியிருந்தார். அந்த எஸ்.எம்.எஸ்ஸில் கண்ணையனுடைய செல்பேசி எண் பரிசுக்குத் தேர்வு செய்யப்பட்டுள்ளதாவும், இதில் அவருக்கு ரூ. 1 கோடி வரை பரிசு கிடைக்கும் எனவும் தெரிவிக்கப்பட்டிருந்தது. மேலும், இதற்காக இந்திய ரிசர்வ் வங்கியின் ஒப்புதல் பெறுவதற்கு முதலில் ரூ.9.26 லட்சம் செலுத்திய பிறகு கூடுதலாக ரூ.5.34 லட்சம் வங்கியில் பணம் செலுத்த வேண்டும் எனக் கூறி அதற்கான வங்கிக் கணக்கு எண்ணும் அனுப்பப்பட்டிருந்தது. இதை நம்பிய கண்ணையன் கடந்தாண்டு ஆக.17-ஆம் தேதி ரூ.9.26 லட்சத்தை வங்கியில் செலுத்தினார். எனினும், சில மாதங்கள் கழிந்த பிறகும் பரிசுப் பணம் அவருக்கு வரவில்லை. இதையடுத்து, கண்ணையன் பிராங்களினிடம் செல்பேசியில் தொடர்பு கொண்டு, பணம் வராதது குறித்து கேட்டுள்ளார். அதற்கு பிராங்க்ளின், மீதமுள்ள ரூ. 5.34 லட்சத்தை அனுப்பினால்தான் முழுப் பணமும் கிடைக்கும் எனக் கூறியுள்ளார். இதனால் அதிர்ச்சியடைந்த கண்ணையன், இது குறித்து கரூர் மாவட்ட குற்றப் பிரிவு போலீஸில் புகார் அளித்தார். அவரது புகாரின் பேரில், போலீஸார் வழக்குப் பதிந்து விசாரித்து வருகின்றனர். ஏற்கெனவே இதுபோல், பலரிடம் பணம் பெற்று ஒரு கும்பல் ஏமாற்றி வருவது குறித்து போலீஸார் அவ்வப்போது தகவல் வெளியிட்டு வருகின்றனர். இருப்பினும், பணம் குறித்த பேராசையில், போலீஸாரின் எச்சரிக்கையையும் மீறி, இதுபோல் பணம் செலுத்து ஏமாந்தவர்களின் பட்டியலும் நீண்டு கொண்டே வருகிறது.

உலகக் கோப்பை கிரிக்கெட் போட்டியின் லீக் சுற்று (8வது) ஆட்டத்தில் இன்று ஜிம்பாப்வே அணி, ஐக்கிய அரபு எமிரேட்ஸ் யுஏஇ அணியை 4 விக்கெட் வித்தியாசத்தில் வீழ்த்தியது. இந்த இரு அணிகளும் மோதிய போட்டி இன்று நெல்சனில் நடைபெற்றது. இந்தப் போட்டியில் டாஸ் வென்ற ஜிம்பாப்வே அணி முதலில் பந்து வீச்சைத் தேர்வு செய்தது. இதையடுத்து பேட்டிங் செய்ய களமிறங்கிய யுஏஇ அணி நிர்ணயிக்கப்பட்ட 50 ஓவரில் 7 விக்கெட் இழப்புக்கு 285 ரன்கள் எடுத்தது. அந்த அணியில் அன்வர் அதிக பட்சமாக 67 ரன்கள் குவித்தார். அவருக்கு அடுத்தபடியாக குர்ரம் 45 ரன்கள் எடுத்தார். கிருஷ்ண சந்திரன் 34 ரன்களும், ஸ்வனில் படேல் 32 ரன்களும் எடுத்தனர். வெற்றிக்கு 286 ரன்கள் தேவை என்ற இலக்குடன் ஜிம்பாப்வே அணி களமிறங்கி ஆடியது. தொடக்க ஆட்டக்காரர்களாக சிக்கந்தர் ரசாவும், சகப்வாவும் களமிறங்கினர். ரசா அதிரடியாக விளையாடினார். சகப்வா நிதானமான ஆட்டத்தை வெளிப்படுத்தினார். இதனால் 57 பந்துகளில் 50 ரன்களை எடுத்தது ஜிம்பாப்வே. இந்நிலையில் 13வது ஓவரின் கடைசி பந்தில் ரசா 46 ரன்னில் ஆட்டம் இழந்தார். அடுத்து வந்த அதிரடி ஆட்டக்காரர் மசகட்சா வந்த வேகத்தில் 1 ரன்னில் அவுட்டாகி வெளியேறினார். 4வது விக்கெட்டுக்கு களமிறங்கிய டெய்லர் அதிரடியாக விளையாடினார். 3வது விக்கெட்டுக்கு டெய்லர் – சகப்வா ஜோடி 47 ரன்கள் சேர்த்தது. சகப்வா 35 ரன்னில் ஆட்டமிழக்க, வில்லியம்ஸ் களமிறங்கினார். அவரின் அதிரடியில் ஜிம்பாப்வே அணியின் ஸ்கோர் வேகமாக உயர்ந்தது. 28வது ஓவரில் 47 ரன்னில் டெய்லர் ஆட்டமிழக்க, பின்னர் களமிறங்கிய மையர் 22 பந்துகளைச் சந்தித்து 9 ரன் மட்டுமே எடுத்து ஆட்டம் இழந்தார். பின்னர் எர்வைன் களமிறங்கினர். இருவரின் அதிரடி ஆட்டத்தில் 38வது ஓவரின் போது 200 ரன்களை கடந்தது ஜிம்பாப்வே. 42 பந்தில் 50 ரன்களை குவித்தார் வில்லியம்சன். 6வது விக்கெட்டுக்கு இந்த ஜோடி 83 ரன்களை குவித்த நிலையில், எர்வைன் 42 ரன்னில் ஆட்டம் இழந்தார். பின்னர் சிகும்புரா(14 ரன்கள்-அவுட் இல்லை) உடன் இணைந்து, தொடர்ந்து அதிரடியாக விளையாடிய வில்லியம்சன் கடைசி வரை ஆட்டமிழக்காமல் 76 ரன்கள் குவித்து அணியை வெற்றி பெறச் செய்தார். இதனால் 48 ஓவர் முடிவில் 6 விக்கெட்களை இழந்த நிலையில், 286 ரன்கள் குவித்த ஜிம்பாப்வே 4 விக்கெட் வித்தியாசத்தில் வெற்றி பெற்றது.

சென்னை: தமிழக சட்டப் பேரவையில் இருந்து தே.மு.தி.க., உறுப்பினர்கள் அனைவரும் அவைத்தலைவர்  உத்தரவின் பேரில் இன்று வெளியேற்றப்பட்டனர். சட்டப் பேரவையில் இன்று அ.தி.மு.க., எம்.எல்.ஏ., கடம்பூர் ராஜ் சிட்டிசன் என்ற வார்த்தையை ‘குடிமகன்’ என்று மொழிபெயர்த்துக் கூறியது தொடர்பாக தே.மு.தி.க., உறுப்பினர்கள் எதிர்ப்பு தெரிவி்த்து வாக்குவாதம் செய்தனர். பின்னர் அவையில் கோஷமிட்டனர். இதையடுத்து அவர்களை வெளியேற்றுமாறு அவைத் தலைவர் உத்தரவிட்டார். அதை அடுத்து தேமுதிக உறுப்பினர்கள் அனைவரும் அவையில் இருந்து வெளியேற்றப்பட்டனர். மேலும், நடப்புக் கூட்டத்தொடர் முழுவதும் தேமுதிக உறுப்பினர்கள் அனைவரையும் சஸ்பெண்ட் செய்து அவைத் தலைவர் உத்தரவிட்டார். பேரவைத் தலைவர் இருக்கையை முற்றுகையிட்டு ஆவணங்களைத் தூக்கி வீசியதாகவும, அவைக் காவலர்களைத் தாக்கியதாகவும் தே.மு.தி.க., உறுப்பினர்கள் மீது புகார் கூறப்பட்டது.