உலகக் கோப்பை கிரிக்கெட் போட்டியில் அதிக ரன்கள் வித்தியாசத்தில் பாகிஸ்தானை வென்ற இந்திய அணிக்கு கிரிக்கெட் பிரபலங்கள் உள்ளிட்ட பலரும் வாழ்த்து தெரிவித்துள்ளனர். குடியரசுத் தலைவர் பிரணாப் முகர்ஜி கூறுகையில்,” உலகக் கோப்பை தொடரின் முதல் லீக் போட்டியில் வெற்றி பெற்ற இந்திய அணிக்கு வாழ்த்துகள். எதிர் வரும் போட்டிகளிலும் இது தொடர வேண்டும்,” என்றார். பிரதமர் மோடி வெளியிட்ட வாழ்த்துச் செய்தியில், இந்திய அணிக்கு எனது வாழ்த்துகள். உங்களை எண்ணி பெருமை அடைகிறோம்,’ என, தெரிவித்துள்ளார். இதே போல், இந்திய அணியின் முன்னாள் கேப்டன் கங்குலி,” பாகிஸ்தானுக்கு எதிரான உலக கோப்பை லீக் போட்டியில் இந்திய வீரர்கள் செயல்பாடு பாராட்டுக்குரியது,” என்றார். இந்திய அணியின் முன்னாள் கேப்டன் கவாஸ்கர்,” இந்திய அணி, பாகிஸ்தானை வீழ்த்தியதன் மூலம், மீண்டும் வெற்றிப்பாதைக்கு திரும்பியுள்ளது. இது நம்பிக்கையை தந்துள்ளது,” என்றார். இதனிடையே, இந்திய அணி இன்று பெற்ற வெற்றியை பாதுகாப்புப் படை வீரர்கள் உள்பட நாடு முழுவதும் ரசிகர்கள் கொண்டாடி மகிழ்ந்தனர். கோலி சாதனை: பாகிஸ்தானுக்கு எதிரான உலகக் கோப்பை போட்டிகளில், சதம் அடித்த முதல் இந்திய வீரர் என்ற பெருமை பெற்றார் கோலி. மேலும், இதற்கு முன் அதிக ரன்கள் எடுத்த சச்சின் (98 ரன், 2003) சாதனையையும் முறியடித்தார். இந்திய பாகிஸ்தான் இரு அணிகளும் மோதிய உலகக் கோப்பை போட்டிகளில் பாகிஸ்தான் அணியின் சயீத் அன்வருக்குப் (101 ரன், 2003) பின்னர், சதம் அடித்த இரண்டாவது வீரர் கோலி.

Congratulations Indian Team on victory in ICC World Cup’s first match; wish you continued success in coming matches #PresidentMukherjee — President of India (@RashtrapatiBhvn) February 15, 2015

Congrats Team India. Well played. We are all very proud of you. — Narendra Modi (@narendramodi) February 15, 2015

சென்னை: லிங்கா திரைப்பட நஷ்ட விவகாரம் தொடர்பாக சென்னையில் இன்று செய்தியாளர்களைச் சந்தித்த திரையரங்க உரிமையாளர்கள், விநியோகஸ்தர்கள், மெகா பிச்சை எடுக்கும் போராட்டத்தை நடத்தப் போவதாக அறிவித்துள்ளனர். இது குறித்து அவர்கள் தெரிவித்தது…. “’லிங்கா’ திரைப்படத்தைப் பொறுத்தவரை எங்களுக்குத் தெரிந்த ஒரே நபர் ரஜினிகாந்த்தான். அவரை நம்பித்தான் ‘லிங்கா’ படத்தை வாங்கினோம். பட புரமோஷனில் பேசிய ரஜினிகாந்த் படத்தைப் பற்றியும், கதையைப் பற்றியும் உயர்வாகப் பேசியதை அடுத்து, இந்தப் படத்தை வாங்க முடிவுசெய்தோம். ஆனால், படம் எதிர்பார்த்த வரவேற்பைப் பெறவில்லை. எனவே, விநியோகஸ்தர்களுக்கும், திரையரங்க உரிமையாளர்களுக்கும் பெரும் நஷ்டம் ஏற்பட்டிருப்பதை சுட்டிக்காட்டி இழப்பை ஈடுசெய்ய வேண்டும் என வேண்டுகோள் விடுத்தும், சரியான பதில் இல்லாததால் கடந்த ஜனவரி 10-ம் தேதி சென்னை வள்ளுவர்கோட்டம் அருகே உண்ணாவிரதம் இருந்தோம். அதன்பிறகு எங்களை அழைத்த திருப்பூர் சுப்ரமணி, இந்தப் பிரச்சினைக்கு முற்றுப்புள்ளி வைக்க ரஜினிகாந்த் விரும்புவதாகவும், கணக்குகளை ஒப்படைக்குமாறு கூறியதையடுத்து வரவு செலவு கணக்குகளை ஒப்படைத்தோம். விரைவில் நஷ்டத்தொகை வழங்கப்படும் என்று கூறியதையடுத்து, அடுத்த கட்ட போராட்டங்களில் ஈடுபடாமல் அமைதி காத்தோம். இந்நிலையில், இரு தினங்களுக்கு முன் எங்களை தொடர்பு கொண்ட ரஜினியின் நண்பர் திருப்பூர் சுப்ரமணி, தயாரிப்பாளர் 10 சதவீத நஷ்ட ஈடு தொகை மட்டுமே வழங்க முடியும் என தெரிவித்ததாக கூறினார். இதில் எங்களுக்கு உடன்பாடு இல்லை. இரண்டு மாத காலமாக எந்தவித முடிவுமின்றி சென்று கொண்டிருக்கும் இந்தப் பிரச்சினையை முடித்து வைக்க ரஜினிகாந்த் முன்வராதது மிகுந்த மனவேதனையை அளிக்கிறது. 45 கோடி ரூபாயில் தயாரிக்கப்பட்ட படத்தை 157 கோடி ரூபாய்க்கு விற்றுவிட்டு, வெறும் 33 கோடி ரூபாய் நஷ்டத்தை ஏற்றுக்கொள்ள மனமில்லாத இதயங்களை நினைத்து அதிர்ச்சியடைந்தோம். மனமில்லாத இவர்களை மல்லுக்கட்ட, பணமில்லாத எங்களுக்கு வேறு வழி கொடுக்காமல் அடுத்த கட்ட போராட்டத்திற்கு எங்களை தள்ளியுள்ளனர். இதற்கு மேலும் ரஜினிகாந்த் தலையிட்டு இந்தப் பிரச்சினையை தீர்த்து வைப்பார் என்ற நம்பிக்கை எங்களுக்கு இல்லாததால் திரையரங்க உரிமையாளர்களுக்கு பணத்தை திருப்பிக் கொடுக்க வகை செய்யும் வகையில் தமிழ்நாடு முழுவதும் மக்களை சந்தித்து உண்மையை விளக்கி ‘மெகா பிச்சை’ என்ற பெயரில் பிச்சை எடுக்கும் போராட்டத்தை முன்னெடுக்க இருக்கிறோம். இந்தப் போராட்டம் போயஸ் கார்டனில் அமைந்துள்ள ரஜினிகாந்த் வீட்டு வாசலில் இருந்து துவக்கப்படும். பிரபல அரசியல் கட்சித் தலைவர் ஒருவர் முதல் பிச்சையை போட்டு போராட்டத்தை துவக்கி வைக்க சம்மதம் தெரிவித்துள்ளார். இனி மேல் ரஜினிகாந்த் நடித்த படத்தை வாங்கி திரையிட்டால் பிச்சை எடுக்கும் நிலைதான் ஏற்படும் என்பதை விநியோகஸ்தர்களுக்கும், திரையரங்க உரிமையாளர்களுக்கும் தெரிவிக்கும் வண்ணமாகவும், ரஜினிகாந்த்தை நம்பினால் நடுத் தெருவில்தான் நிற்கவேண்டும் என்பதை பொதுமக்களுக்கு உணர்த்தும் விதமாகவும் இந்த போராட்டம் இருக்கும். இந்தப் போராட்டத்தில் விநியோகஸ்தர்களும், திரையரங்க உரிமையாளர்களும் கையில் பதாகையும், திருவோடும் ஏந்தி பிச்சை எடுப்பார்கள். போராட்டத்தின் நோக்கம் குறித்து துண்டு பிரசுரங்கள் விநியோகிக்கப்படும். ‘லிங்கா’ படத்தை திரையிட்ட திரையரங்குகளின் வாசலில் பிச்சை எடுக்கும் போராட்டத்தின் நோக்கத்தை விளக்கி பேனர்கள் கட்டி, அதன் அருகில் உண்டியல் வைக்கப்படும். இந்த போராட்டத்தின் தேதி விரைவில் அறிவிக்கப்படும்.

திருச்சி: ஸ்ரீரங்கம் தொகுதி இடைத்தேர்தல் அமைதியாக நடந்து முடிந்தது. இந்த இடைத்தேர்தலில் 82.5 % வாக்குகள் பதிவானது. சில மையங்களில் மட்டும், வாக்காளர்கள் அதிகமாக இருந்ததால், 6 மணிக்கு மேலும் வாக்குப்போட அனுமதிக்கப்பட்டனர். வாக்குகள் பதிவான இயந்திரம் முகவர்கள் முன்னிலையில் சீல் வைக்கப்பட்டு, வாக்கு எண்ணும் மையத்திற்கு அனுப்பி வைக்கப்பட்டுள்ளன. இந்தத் தொகுதியில் பதிவான வாக்குகள் வரும் 16ம் தேதி எண்ணப்படுகின்றன. மொத்தமுள்ள 322 மையங்களில், மொத்தம் 2 லட்சத்து 21 ஆயிரத்து 60 வாக்குகள் பதிவாகியுள்ளன. ஆண்கள், ஒரு லட்சத்து 7 ஆயிரத்து 976 பேர் வாக்கு அளித்துள்ளனர். பெண்கள், ஒரு லட்சத்து 13 ஆயிரத்து 77 பேர் வாக்கு அளித்துள்ளனர். திருநங்கைகள் 7 பேர் வாக்கு அளித்துள்ளனர்.