இந்தியா

பெட்ரோல், டீசல் விலை குறைவு நள்ளிரவு முதல் அமலுக்கு வந்தது

16/04/2015 9:12 AM

இந்த மாதத்தில், கடந்த 2 ஆம் தேதி பெட்ரோல், டீசல் விலை குறைக்கப்பட்ட நிலையில், இரண்டாவது முறையாக, நேற்று பெட்ரோல், டீசல் விலையை எண்ணெய் நிறுவனங்கள் குறைத்தன. பெட்ரோல் விலை (உள்ளூர் வரிகளை கணக்கிடாமல்) லிட்டருக்கு 80 காசு குறைக்கப்பட்டது. டீசல் விலை லிட்டருக்கு ஒரு ரூபாய் 30 காசு குறைக்கப்பட்டது. இந்த விலைக் குறைப்பு நேற்று நள்ளிரவு முதல் அமலுக்கு வந்தது. விலைக் குறைப்புக்கு ஏற்ப உள்ளூர் வரிகளும் குறைந்ததால், நகரங்களுக்கு ஏற்ப விலை வேறுபட்டது. சென்னையில், பெட்ரோல் லிட்டர் ரூ.62.75 ல் இருந்து, 85 காசு குறைந்து ரூ.61.90 க்கு விற்கப்படுகிறது. தில்லியில் 80 காசு குறைந்து, ரூ.59.20 க்கும், கொல்கத்தாவில், 67 காசு குறைந்து, ரூ.66.81 க்கும், மும்பையில் 84 காசு குறைந்து, ரூ.61.69 க்கும் விற்பனை ஆனது. சென்னையில் ரூ.51.61 ஆக இருந்த ஒரு லிட்டர் டீசல் விலை ரூ.1.40 விலை குறைந்து, ரூ.50.21க்கும், தில்லியில், ரூ.1.30 குறைந்து ரூ.47.20 க்கும். கொல்கத்தாவில் ரூ.1.15 குறைந்து, ரூ.52.08க்கும், மும்பையில் ரூ.1.43 குறைந்து ரூ.54.26க்கும் விற்பனை ஆனது. “கடந்த முறை விலை குறைக்கப்பட்ட பின்னர், சர்வதேச சந்தையில் பெட்ரோல், டீசல் விலை குறைந்தது. ரூபாயின் மதிப்பு உயர்ந்தது. இதனால் ஏற்பட்ட பலனை நுகர்வோருக்கு அளிக்க, இந்த விலை குறைப்பு அமல்படுத்தப்படுகிறது” என்று இந்திய எண்ணெய்க் கழகம் வெளியிட்டுள்ள செய்திக் குறிப்பில் தெரிவிக்கப்பட்டிருந்தது.