சிவப்ரதோஷம் கவிதை
- கவிஞர் மீ.விசுவநாதன்
எங்கள் ஊரில் சிவன்கோவில் – இறை
சிதம்பரேசர் சிவகாமி
மங்காப் பெயரை உடையவர்கள் – என்
மனத்தினுள்ளே உறைபவர்கள்
கோவில் மதிலின் பக்கத்தில் – நெல்லி
கொத்தாகக் காய்த்திருக்கும்
தாவி அந்தக் காய்களினை – நான்
தட்டிவந்து தின்றிடுவேன்
தின்ற உடனே வாய்க்காலின் – தெளிந்த
நீரெடுத்துக் குடித்திடுவேன்
நன்றாய் இனிக்கும் அச்சுகத்தை – இந்
நாள்கூட மறப்பதில்லை
பொன்னைப் போலக் காக்கின்ற – காவல்
முத்தையாப் பிள்ளையிடம்
அன்று மாட்டிக் கொண்டேன்நான் – எனை
அடிக்காமல் மிரட்டிவிட்டார்
அம்மா என்னை நன்கடித்து – சிவன்
ஆஸ்திகுல நாசமென்றாள்
வம்பை விலைக்கு வாங்காதே – சிவ
ஞானத்தை உணர் என்றாள்
சம்போ சம்போ சிவசம்போ – தாய்
சரியாக வழிசொன்னாள்
அம்போ என்று போகாமல் – எனக்கு
அரனாக அரணானாள்.
(இன்று (26.09.2019) பிரதோஷம்)
