புதுதில்லி:

ஜெயலலிதா மீதான சொத்துக் குவிப்பு மேல்முறையீட்டு வழக்கு விசாரணையை பிப்ரவரி 23-ம் தேதிக்கு ஒத்திவைத்து உச்ச நீதிமன்ற நீதிபதி பி.சி.கோஷ் தலைமையிலான அமர்வு உத்தரவிட்டுள்ளது.

தமிழக முதல்வர் ஜெயலலிதா மீதான சொத்துக் குவிப்பு மேல்முறையீட்டு வழக்கில் வரும் பிப்.2 முதல் இறுதி விசாரணை நடக்கும் என உச்ச நீதிமன்றம் அறிவித்திருந்த நிலையில், இந்த வழக்கு விசாரணையை பிப்.23ஆம் தேதிக்கு ஒத்திவைக்க வேண்டும் என ஜெயலலிதா தரப்பில் கோரப்பட்டது.

அந்த மனுவில், “அருணாச்சலப் பிரதேச முன்னாள் முதல்வர் நபம் துகி மாநிலத்தில் குடியரசுத் தலைவர் ஆட்சி அமல்படுத்தப்பட்டதை எதிர்த்து தாக்கல் செய்துள்ள மனு பிப்ரவரி 1-ல் விசாரணைக்கு வருகிறது. இந்த வழக்கு தொடர்பான உத்தரவின் தாக்கம் அடுத்த சில நாட்கள் நீதிமன்றத்தில் புதிய மனுக்கள் போன்ற வடிவில் எதிரொலிக்கலாம் என்பதால் சொத்துக் குவிப்பு மேல்முறையீட்டு வழக்கு விசாரணையை ஒத்திவைக்க வேண்டும்” என கோரப்பட்டிருந்தது.

இந்த மனுவை வெள்ளிக் கிழமை இன்று விசாரித்த நீதிபதி பி.சி.கோஷ், ஜெயலலிதா தரப்பு கோரிக்கையை ஏற்று, வழக்கு விசாரணையை பிப்ரவரி 23-ம் தேதிக்கு ஒத்திவைத்து உத்தரவிட்டார்.

சென்னை:
இயற்கை மருத்துவக் கல்லூரிக்கு அனுமதி அளித்தது மத்திய அரசல்ல… தி.மு.க அரசுதான் என்று பாமக இளைஞரணித் தலைவர் அன்புமணி விளக்கம் அளித்துள்ளார்.
இது குறித்து அவர் இன்று வெளியிட்ட அறிக்கை:

விழுப்புரம் மாவட்டம் கள்ளக்குறிச்சி அருகே 3 மாணவிகளின் மர்மசாவுக்கு காரணமான எஸ்.வி.எஸ் இயற்கை மருத்துவம் மற்றும் யோகா கல்லூரிக்கு அனுமதி அளித்தது யார்? என்பது தொடர்பாக அடிப்படை ஆதாரம் இல்லாத தகவல்கள் திட்டமிட்டு பரப்பப்பட்டு வருகின்றன. அவை அனைத்துமே இயற்கை மருத்துவக்கல்லூரிக்கு அனுமதி அளிக்கும் நடைமுறைகள் பற்றி எதுவும் அறியாதவர்களால் உள்நோக்கத்துடன் திட்டமிட்டு பரப்பப்படும் அவதூறு புகார்கள் ஆகும். அவை கண்டிக்கத்தக்கவை.

புதிய மருத்துவக் கல்லூரிக்கு அனுமதி அளிக்க வேண்டுமெனில் அந்த கல்லூரியை இந்திய மருத்துவக் குழு ஆய்வு செய்து மத்திய சுகாதார அமைச்சகத்துக்கு அறிக்கை அளிக்கும். அதன் அடிப்படையில் அக்கல்லூரிக்கு அனுமதி அளிப்பது குறித்து சுகாதார அமைச்சகம் முடிவு எடுக்கும். ஆயுர்வேதம், சித்தா, யுனானி போன்ற இந்திய மருத்துவக் கல்லூரிகளைத் தொடங்க வேன்டுமெனில் இந்திய மருத்துவத்துக்கான மத்தியக் குழுவும், ஹோமியோபதி மருத்துவக் கல்லூரியைத் தொடங்க வேண்டும் என்றால் ஹோமியோபதிக்கான மத்தியக் குழுவும் ஆய்வு செய்து ஆயுஷ் அமைச்சகத்திடம் அறிக்கை அளிக்கும். அதனடிப்படையில் அனுமதி அளிப்பது குறித்து அந்த அமைச்சகம் தீர்மானிக்கும். ஆனால், இயற்கை மருத்துவம் மற்றும் யோகா கல்லூரிகள் பெரிய அளவில் தொடங்கப்படவில்லை என்பதால் அவற்றை முறைப்படுத்த மத்திய அரசு இதுவரை எந்த அமைப்பையும் ஏற்படுத்தவில்லை. இந்த கல்லூரிகளுக்கு அனுமதி அளிப்பதில் மத்திய அரசுக்கு எந்த சம்பந்தமும் இல்லை. தமிழக அரசிடம் ஆட்சேபனையின்மை சான்றிதழ் பெற்று கல்லூரியை தொடங்கலாம். அதன்பின் தமிழ்நாடு எம்.ஜி.ஆர். மருத்துவப் பல்கலைக்கழகத்திடம் இணைப்பு நிலை (Affiliation) கோரி விண்ணப்பிக்க வேண்டும். அவ்வாறு விண்ணப்பித்தால் மருத்துவப் பல்கலைக்கழகத்தின் அதிகாரிகள் குழு ஆய்வு செய்து அறிக்கை அளிக்கும். அதனடிப்படையில் இணைப்பு நிலை குறித்து பல்கலை. முடிவெடுக்கும்.

தமிழ்நாட்டில் சென்னையில் ஓர் அரசு இயற்கை மருத்துவம் மற்றும் யோகா கல்லூரியும், சேலம், கோவை, குலசேகரம், கள்ளக்குறிச்சி ஆகிய ஊர்களில் 4 தனியார் இயற்கை மருத்துவம் – யோகா கல்லூரிகளும் செயல்படுகின்றன. இவற்றில் கள்ளக்குறிச்சி எஸ்.வி.எஸ் கல்லூரி தவிர மீதமுள்ள 4 கல்லூரிகளுக்கும் 1996-2001 தி.மு.க. ஆட்சிக்காலத்திலும், கள்ளக்குறிச்சி எஸ்.வி.எஸ் கல்லூரிக்கு 2008 ஆம் ஆண்டு தி.மு.க. ஆட்சியிலும் தான் அனுமதி அளிக்கப்பட்டது. இந்த கல்லூரிகளுக்கு மாணவர் சேர்க்கை இடங்கள் எத்தனை? என்பதை தீர்மானிப்பது, இந்த இடங்களின் எண்ணிக்கையை அதிகரிப்பது உள்ளிட்ட அனைத்து அதிகாரங்களும் மாநில சுகாதார அமைச்சகத்திடம் உள்ளன. இதற்கும் மத்திய சுகாதார அமைச்சகத்துக்கும் இடையே எந்த சம்பந்தமும் இல்லை. அவ்வாறு இருக்கும் போது அப்பாவி மாணவிகள் 3 பேரை பலி கொண்ட கள்ளக்குறிச்சி எஸ்.வி.எஸ் கல்லூரிக்கு நான் அனுமதி அளித்ததாக சிந்திக்கும் திறனற்ற சில தலைவர்கள் கூறுவதையும், அதை சரிபார்க்காமல் கூட சில ஊடகங்கள் செய்தி வெளியிடுவதும் முறையா? என்பதை சம்பந்தப்பட்டவர்கள் சிந்திக்க வேண்டும். ஆறாவது அறிவு உள்ள எவரும் இப்படி ஒரு அவதூறு புகாரை என் மீது சுமத்த மாட்டார்கள். பா.ம.க. மீதும், என் மீதும் பொருளற்ற பகை கொண்டுள்ள சிலரால் மட்டுமே இப்படி அவதூறு பரப்ப முடியும். இதன் பிறகாவது அவதூறு பரப்பியவர்கள் தங்கள் மனசாட்சியிடம் மன்னிப்பு கேட்க வேண்டும்.

2008-ஆம் ஆண்டில் எஸ்.வி.எஸ். கல்லூரிக்கு அனுமதி வழங்கப்பட்ட போது தமிழகத்தில் கலைஞர் தலைமையிலான தி.மு.க. ஆட்சி தான் நடைபெற்றது. எஸ்.வி.எஸ். கல்லூரிக்கு அனுமதி வழங்குவதற்கு முன்பு சுகாதாரத்துறையும், இணைப்பு நிலை வழங்கப்படுவதற்கு முன் பல்கலைக்கழகமும் சம்பந்தப்பட்ட கல்லூரியில் அடிப்படை வசதிகள் உள்ளனவா? என்பதை ஆய்வு செய்திருந்தால் அங்கு படித்த, படித்துக் கொண்டிருக்கும் மாணவர்களின் எதிர்காலம் கேள்விக்குறியாகியிருக்காது. எஸ்.வி.எஸ். கல்லூரியில் இப்போதே எந்த கட்டமைப்பு வசதியும் இல்லை எனும்போது 8 ஆண்டுகளுக்கு முன்பு நிச்சயமாக கட்டமைப்பு வசதிகள் இருந்திருக்க வாய்ப்பு இல்லை. அப்படியென்றால் அந்த கல்லூரிக்கு எந்த அடிப்படையில் அனுமதி வழங்கப்பட்டது என்பது குறித்து அப்போது தமிழகத்தின் முதலமைச்சராக இருந்த கலைஞரும், நிழல் முதலமைச்சராக செயல்பட்ட மு.க. ஸ்டாலினும் தான் விளக்க வேண்டும்.

எஸ்.வி.எஸ். கல்லூரிக்கு எம்.ஜி.ஆர் மருத்துவப் பல்கலைக்கழகம் அளித்துள்ள தற்காலிக இணைப்பு நிலை ஓராண்டு மட்டுமே செல்லுபடியாகும். அதனால் ஒவ்வொரு ஆண்டும் அதை புதுப்பிக்க வேண்டும். முந்தைய தி.மு.க. ஆட்சியிலும், இப்போதைய அ.தி.மு.க. ஆட்சியிலும் பலமுறை இணைப்பு நிலை புதுப்பிக்கப்பட்டிருக்கிறது. அப்போதெல்லாம் கல்லூரியில் அடிப்படை வசதிகள் உள்ளதா? என ஆய்வு செய்யப்பட்டிருக்க வேண்டும். முறைப்படி ஆய்வு செய்யப்பட்டிருந்தால் நிச்சயமாக கல்லூரிக்கு இணைப்பு நிலை புதுப்பிக்கப்பட்டிருக்க முடியாது. ஆனால், எவ்வாறு இணைப்பு நிலை புதுப்பிக்கப்பட்டு வருகிறது என்பது சுகாதார அமைச்சர்கள் மற்றும் பல்கலைக்கழக துணைவேந்தர்களுக்கே வெளிச்சம்.

அதுமட்டுமின்றி, முந்தைய ஆட்சியிலும், இப்போதைய ஆட்சியிலும் இந்த கல்லூரியின் குறைகள் குறித்து அரசுக்கும், பல்கலைக்கழகத்திற்கும் மாணவர்கள் தரப்பிலும், பெற்றோர் தரப்பிலும் பலமுறை புகார் மனுக்கள் அனுப்பப்பட்டுள்ளன. அவற்றில் ஒன்றின் மீது கூட நடவடிக்கை எடுக்கப்படவில்லை. சில மாதங்களுக்கு முன் கல்லூரி மாணவர்கள் போராட்டம் நடத்திய போது கூட மாவட்ட நிர்வாகம் சார்பில் ஆய்வு நடத்தப்பட்டு கல்லூரியில் அடிப்படை வசதிகள் கூட இல்லை என அரசுக்கு அறிக்கை அனுப்பப்பட்டது. ஆனாலும், அதன்மீது எந்த நடவடிக்கையும் எடுக்கப்படவில்லை. மோசடி கல்லூரி மீது நடவடிக்கை எடுக்கவிடாமல் எந்த சக்தி தடுத்தது என்பதை தமிழக அரசு விளக்க வேண்டும்.

எந்தவித கட்டமைப்பு வசதியும் இல்லாத எஸ்.வி.ஆர் கல்லூரிக்கு அனுமதி அளித்த முந்தைய தி.மு.க. அரசும், அக்கல்லூரிக்கு கடந்த 5 ஆண்டுகளாக பாதுகாப்பு அளித்து வரும் அ.தி.மு.க. அரசும் தான் 3 மாணவிகளின் சாவுக்கு பொறுப்பேற்க வேண்டும். மோசடி கல்லூரிக்கு துணை போன அமைச்சர்கள் மற்றும் அதிகாரிகள் மீதும் உடனடியாக வழக்கு பதிந்து கைது செய்ய வேண்டும்.

திட்டக்குடி:

திட்டக்குடி அருகே நகைக்கடை வியாபாரியை வழிமறித்து 123 பவுன் நகை மற்றும் ரூ.25 லட்சத்து ஆயிரத்து 50 ரொக்கத்தை முகமூடி கொள்ளையர்கள் கொள்ளையடித்தனர். இவ்வழக்கில் பிடிபட்டவர்களிடம் போலீசார் விசாரணை நடத்தி வருகின்றனர்.
போலீஸார் இதுகுறித்து தெரிவித்ததாவது:

விழுப்புரம் காமராஜர் தெருவை சேர்ந்தவர் ஜெயராமன் (வயது 59). மொத்த நகை வியாபாரம் செய்து வரும் இவர் விழுப்புரம், கடலூர், பெரம்பலூர் மாவட்டங்களில் உள்ள நகை வியாபாரிகளுக்கு நகைகளை விற்பனை செய்வது வழக்கம். அதன்படி, நேற்று முன்தினம் ஜெயராமன் தனது காரில் விருத்தாசலம், பெண்ணாடம், திட்டக்குடி பகுதிகளில் உள்ள நகைக்கடைகளுக்கு சென்று நகைகளை வழங்கினார். பின்னர், மீதமுள்ள 123 பவுன் நகைகள் மற்றும் கடைகளில் வசூலித்த ரூ.25 லட்சத்து ஆயிரத்து 50 ரொக்கத்துடன் விழுப்புரம் நோக்கி காரில் புறப்பட்டார். காரை திருக்கோவிலூர் அருகே உள்ள டி.எடையார் பகுதியை தயாளன் மகன் ஜெய்ஹிந்த் (22) என்பவர் காரை ஓட்டிச் சென்றார்.

ராமநத்தத்தை அடுத்துள்ள அரங்கூர் நெடுஞ்சாலையில் சென்று கொண்டிருந்த போது, பின்னால் இருந்து வேகமாக வந்த மற்றொரு கார் ஜெயராமன் சென்ற காரை முந்தி சென்று வழிமறித்து சாலையில் நின்றது. இதில் ஜெய்ஹிந்த் காரை உடனடியாக நிறுத்தினார்.

இந்நிலையில், முகமூடி அணிந்து 6 பேர் மற்றொரு காரில் இருந்து இறங்கினர். மேலும் அவர்கள் கையில் இரும்பு கம்பி, கத்தி போன்ற ஆயுதங்கள் வைத்திருந்தனர். இதில் நிலைகுலைந்து நின்ற ஜெயராமன் சற்றும் எதிர்பாராத நேரத்தில், அவர்கள் காரின் முன்பகுதியை சேதப்படுத்தி காரில் இருந்த நகை, பணத்தை கொள்ளையடிக்க முயன்றனர். அப்போது ஜெயராமன், சதீஷ் ஆகிய 2 பேரும் அவர்களை தடுத்தனர். ஆனால் அந்த கும்பல் அவர்களை தாக்கிவிட்டு காரில் இருந்த 123 பவுன் நகை, ரூ.25 லட்சத்து ஆயிரத்து 50 ரொக்கத்தை கொள்ளையடித்துக் கொண்டு காரில் தப்பினர்.

இது குறித்து ஜெயராமன் ராமநத்தம் போலீசாருக்கு தகவல் கொடுத்தார். அதன்பேரில், போலீசார் உயர் அதிகாரிகளுக்கு தகவல் தெரிவித்தனர். அதன் பேரில், மாவட்ட போலீஸ் சூப்பிரண்டு விஜயகுமார் விழுப்புரம், கடலூர், பெரம்பலூர் மாவட்ட போலீஸ் நிலையங்களுக்கும், சென்னை– திருச்சி தேசிய நெடுஞ்சாலை போக்குவரத்து ரோந்து போலீசாருக்கு தகவல் கொடுத்தார்.

இதனிடையே திட்டக்குடி துணை போலீஸ் சூப்பிரண்டு பாண்டியன் தலைமையிலான போலீசார் சிறுபாக்கம்–சேலம் சாலையில் தீவிர ரோந்து பணி மேற்கொண்டனர். அப்போது, போலீசாரின் வாகனத்தை பார்த்தவுடன் ஒரு கார் வேகமாக சென்றது. இதில் சந்தேகமடைந்த போலீசார் அந்த காரை பின்தொடர்ந்தனர். சினிமா பாணியில் அந்த காரை போலீசார் துரத்தி சென்று மடக்கினர்.

அப்போது, காரில் இருந்து தப்பி ஓட முயன்ற 6 பேரையும் போலீசார் கையும், களவுமாக பிடித்தனர். தொடர்ந்து போலீசார் காரை சோதனை செய்த போது, காரில் ஜெயராமனிடம் இருந்து கொள்ளையடிக்கப்பட்ட நகை, பணம் இருந்தது தெரியவந்தது. இதையடுத்து, போலீசார் நகை, பணத்தையும், கொள்ளையர்கள் வந்த காரையும் கைப்பற்றினர். தொடர்ந்து, பிடிபட்ட 6 பேரையும் போலீசார் திட்டக்குடி போலீஸ் நிலையத்திற்கு அழைத்து வந்து விசாரணை நடத்தினர். விசாரணையில், அவர்கள் விழுப்புரம் கோலியனூர் காலனியை சேர்ந்தவர்கள் கந்தன் (27), அன்பழகன் (23), ஆனந்த் (25), ஜெயராமன் (25), கடலூர் பழைய நகரை சேர்ந்த திலிபன் (27), தேவனாம்பட்டினத்தை சேர்ந்தவர் ஆனந்த் (24) என்பது தெரியவந்தது.

போலீஸாரின் விசாரணையில் மேலும் சில தகவல்கள் தெரியவந்தன.

விழுப்புரம் நகை வியாபாரி ஜெயராமனிடம் பல ஆண்டுகளாக அன்பழகன் டிரைவராக வேலை செய்து வந்துள்ளார். சமீபத்தில் வேலை செய்யும் இடத்தில் ஏற்பட்ட கருத்து வேறுபாடு காரணமாக வேலையை விட்டு நின்று விட்டார். இந்த நிலையில், அன்பழகன் பணம், நகையை கொள்ளையடிக்க திட்டமிட்டு, அவருக்கு உதவியாக நண்பர்கள் 5 பேரையும் ஒன்று சேர்த்துள்ளார்.

இந்த நிலையில், ஜெயராமன் நேற்று முன்தினம் விழுப்புரத்தில் இருந்து புறப்பட்டார். இதைநோட்டமிட்ட அன்பழகன் தனது நண்பர்கள் 5 பேருடன் சேர்ந்து ஒரு வாடகை காரில் ஜெயராமனை பின்தொடர்ந்து வந்தனர். இரவு 11.30 மணி அளவில் நகை கடைகளில் வசூலை முடித்துவிட்டு ராமநத்தம் அருகே சென்ற ஜெயராமன் காரை அவர்கள் வழிமறித்து தாக்கி பணம், நகையை கொள்ளையடித்து சென்றதும் தெரியவந்தது.

இது குறித்து போலீசார் வழக்குப்பதிவு செய்து பிடிப்பட்ட 6 பேரிடம் தொடர்ந்து விசாரணை நடத்தி வருகின்றனர். சம்பவம் நடந்த 2 மணி நேரத்தில் கொள்ளையர்களை பிடித்த போலீசாரை போலீஸ் சூப்பிரண்டு விஜயகுமார் பாராட்டினார்.

சென்னை:

மாணவர்கள் தற்கொலை எண்ணத்தை கைவிட வேண்டும். உங்கள் கோரிக்கைகளை என்னிடம் கூறிவிட்டு, படிப்பை தொடருங்கள் என்று கருணாநிதி அறிவுரை கூறியுள்ளார்.

இதுகுறித்து தி.மு.க. தலைவர் கருணாநிதி நேற்று வெளியிட்ட அறிக்கையில் கூறியிருப்பதாவது:-

அ.தி.மு.க. ஆட்சியில் குற்றங்கள் குறைந்துவிட்டதாகவும், தமிழகம் அமைதிப் பூங்காவாக நடைபோடுகிறது என்றும் முதல்-அமைச்சர் ஜெயலலிதா கூறிய போதிலும், கொலை நடக்காத, கொள்ளைகள் நடக்காத நாளே தமிழகத்தில் கிடையாது. குறிப்பாக இந்த ஆட்சியில் தற்கொலைச் செய்திகள் என்பது வந்து கொண்டே இருக்கிறது.

திருவாரூரைச் சேர்ந்த பிரியங்கா என்ற மாணவி விழுப்புரம் கல்லூரியில் தற்கொலை செய்து கொண்டு மறைந்த அந்தப் பெண்ணின் குடும்பத்திற்கு, அந்த மாவட்ட தி.மு.க. சார்பில் ரூ.1 லட்சம் நிதியினை நான் அந்த பெண்ணின் தாயாரிடம் வழங்கிய போது, அந்தப் பெண்மணி என் கையைப் பிடித்துக்கொண்டு, ‘‘அய்யா எனக்கு என் பெண் வேண்டும், எனக்கு நீதி வேண்டும்’’ என்று கூறி கதறிய அந்தக் காட்சி தான் இன்னமும் என் நினைவில் ஓடுகிறது. அந்தப் பெண்மணிக்கு என்னால் அங்கே பதில் கூற முடியவில்லை.

மாணவிகள் தற்கொலை தான் செய்து கொண்டார்களா? அல்லது கொலை செய்யப்பட்டு கிணற்றிலே வீசப்பட்டார்களா? அதைக் கண்டுபிடிக்க முறையான சட்டப்படியான ஒரு நீதி விசாரணையை நடத்த இந்த அரசு முன் வராததற்கு என்ன காரணம்?

கடந்த ஆண்டு எத்தனை தற்கொலைகள்? மாணவிகள் மட்டுமல்ல. அரசில் பணியாற்றிய முத்துக்குமாரசாமி என்ற மூத்த அதிகாரி, ரெயில் முன் விழுந்து மாண்டு போனாரே? கண்துடைப்புக்காக அ.தி.மு.க. அரசு ஒரு அமைச்சரைக் கைது செய்து வழக்குப் போட்டதே தவிர, அந்த வழக்கு எந்தக் குப்பைக் கூடையிலே கிடக்கிறது?. விஷ்ணுப்பிரியா என்ற காவல்துறை அதிகாரி, தற்கொலை செய்து கொண்டு மாண்டு போனாரே, என்னவாயிற்று அந்த வழக்கு? எங்கே துங்குகிறது?.

2014-ம் ஆண்டு மொத்த தற்கொலை என்ற கணக்கைப் பார்த்தால், இந்தியாவிலேயே தமிழகம் முதல் இடத்திலும், மகாராஷ்டிரம் 2-வது இடத்திலும், மேற்கு வங்கம் 3-வது இடத்திலும் இருந்திருக்கிறது.

மாணவச் செல்வங்களே உங்களை நம்பி இந்த நாடு மட்டுமல்ல. உங்கள் பெற்றோர், உங்கள் குடும்பத்தினர், உங்கள் சகோதர-சகோதரிகள் இருக்கிறார்கள்.

நீங்கள் படித்து முடித்து, அவர்களையெல்லாம் வாழ வைப்பீர்கள் என்று நம்பிக் கொண்டிருக்கிறார்கள். அவர்களின் நம்பிக்கையை தயவு செய்து நீங்கள் தகர்த்து விடாதீர்கள்.

தமிழகத்திலே உள்ள மாணவச் செல்வங்களையெல்லாம் மன்றாடிக் கேட்டுக் கொள்கிறேன். உங்கள் கோரிக்கைகளை எல்லாம் என்னிடம் கூறிவிட்டு, நீங்கள் உங்களது படிப்பைத் தொடருங்கள். தமிழகத்திலே இனிமேல் மாணவர்கள் தற்கொலை செய்து கொண்டார்கள் என்ற செய்தி வராமல் பார்த்துக் கொள்ளுங்கள்.

மாணவர்களைப் போலவே தற்கொலை செய்து கொள்ளும் விவசாயிகள் உள்ளிட்ட அனைவரும் தங்கள் குடும்பத்தினரின் வருங்காலத்தை எண்ணிப் பார்த்து தற்கொலை செய்து கொள்ளும் எண்ணத்தை கை விட வேண்டும்.

இவ்வாறு அவர் கூறியுள்ளார்.