சென்னையில் கடத்தப்பட்ட எஸ்.ஐ. மகள் மீட்பு: 3 பேர் கைது

சென்னை:
சென்னையில் கடத்தப்பட்ட எஸ்.ஐ.யின் மகளை போலீஸார் மீட்டனர். இதுதொடர்பாக மருந்துக் கடை உரிமையாளர் உள்பட 3 பேர் கைது செய்யப்பட்டனர்.

சென்னை பழைய பெருங்களத்தூரைச் சேர்ந்த ராமலிங்கம், தாம்பரம் காவல் நிலையத்தில் உதவி ஆய்வாளராகப் பணியாற்றி வருகிறார். இவரது மகள் கலையரசி (23). பி.பார்ம் முடித்துள்ள இவர், சேலையூரில் உள்ள மருந்து கடையில் வேலை பார்த்து வந்தார்.

வியாழக்கிழமை பணிக்குச் சென்ற இவர், பின்னர் வீடு திரும்பவில்லை. அவரது செல்பேசியும் அணைத்து வைக்கப்பட்டிருந்தது. மருந்துக் கடையும்க்கூட பூட்டப்பட்டிருப்பதும், கடைக்கு முன் கலையரசியின் இரு சக்கர வாகனம் நிறுத்தி வைக்கப்பட்டிருந்ததும் தெரியவந்தது. இது குறித்த புகாரின் பேரில் சேலையூர் போலீஸார் வழக்குப் பதிந்து விசாரித்து வந்தனர்.
இந்நிலையில் எஸ்.ஐ. ராமலிங்கத்தின் செல்பேசிக்கு வந்த அழைப்பில் பேசிய கலையரசி, தன்னை சிலர் வலுக்கட்டாயமாகக் கடத்தி வந்ததாகவும், மதுராந்தகம் அருகே இருப்பதாகவும் கூறியுள்ளார். அதே எண்ணுக்கு ராமலிங்கம் தொடர்பு கொண்டபோது, அது அணைத்து வைக்கப்பட்டிருந்தது.
இதைத் தொடர்ந்து, செல்போன் எண்ணை வைத்து கலையரசி இருக்கும் இடத்தை போலீஸார் கண்டறிந்தனர். உடனே செயலில் இறங்கி, அவரை மீட்டனர்.
கலையரசியைக் கடத்திச் சென்றதாக மருந்துக் கடை உரிமையாளர் சேகர், அவரது உறவினர்கள் டேவிட், கார்த்திக் ஆகிய 3 பேரை போலீஸார் கைது செய்தனர். கடத்தலுக்கு பயன்படுத்தப்பட்ட காரும் பறிமுதல் செய்யப்பட்டது. கலையரசியின் மருந்தாளுனர் உரிமத்தைப் பயன்படுத்தி மருந்துக் கடை தொடங்கப் பட்டதாகவும், வருவாயைப் பிரித்துக் கொள்வதில் ஏற்பட்ட பிரச்னையால் அவர் கடத்தப்பட்டிருக்கலாம் என்றும் கூறப்படுகிறது.

Donate to Dhinasari News! Independent journalism that speaks truth to power and is free of corporate and political control is possible only when people start contributing towards the same. Please consider donating towards this endeavour to fight fake news and misinformation.