திருவனந்தபுரம்: திருவனந்தபுரம் பத்மநாபசுவாமி கோவில் தெப்பக்குளத்தில் பைப் வெடிகுண்டுகள் அடங்கிய மூட்டை கண்டுபிடிக்கப்பட்டது பெரும் அதிர்ச்சியை ஏற்படுத்தியுள்ளது. திருவனந்தபுரம் பத்மநாபசுவாமி கோவில் மிகவும் புகழ்பெற்ற ஒன்று. இங்கே அண்மையில், ரகசிய அறைகளில் அரிய வகை தங்க நகைகள், பொற்குவியல்கள் இருப்பது கண்டறியப் பட்டதைத் தொடர்ந்து, இது மேலும் புகழ் பெற்றது. இங்கே அரிய பொக்கிஷங்கள் இருப்பது தெரியவந்ததை அடுத்து, கோவிலுக்குள் துப்பாக்கி ஏந்திய போலீசார் 24 மணி நேரமும் தீவிர பாதுகாப்புப் பணியில் ஈடுபட்டு வருகின்றனர். கோவிலுக்கு வரும் பக்தர்களும் தீவிர சோதனைக்குப் பிறகே உள்ளே அனுமதிக்கப்பட்டு வருகின்றனர். இந்தக் கோவில் கிழக்கு வாசல் பகுதியில் பத்மதீர்த்தக் குளமும், வடக்கு வாசல் பகுதியில் ஸ்ரீபாத குளமும் அமைந்துள்ளன. உச்ச நீதிமன்ற உத்தரவின்கீழ் இந்தக் குளங்கள் தூர் வாரப்பட்டு குளத்தைத் தூய்மைப் படுத்தும் பணிகள் தற்போது நடைபெற்று வருகின்றன. ஸ்ரீபாத குளத்தில் நேற்று வழக்கம் போல் தூய்மைப்படுத்தும் பணிகள் நடைபெற்றபோது, ஒரு மணி அளவில் ஒரு மண்ணில் புதைந்த நிலையில் ஒரு சாக்கு மூட்டை கண்டெடுக்கப்பட்டது. அதனை கோவில் அதிகாரிகள் மற்றும் போலீஸார் பார்த்தபோது, வெடிகுண்டாக இருக்கலாம் என்ற சந்தேகத்தின் அடிப்படையில், வெடிகுண்டு நிபுணர்கள் வரவழைக்கப்பட்டனர். அவர்கள் அந்த சாக்கு மூட்டையைப் பிரித்துப் பார்த்தபோது, அதில் ஐந்து ‘பைப்’ வெடிகுண்டுகள் இருந்தது தெரிந்தது. அவற்றைக் கைப்பற்றிய அதிகாரிகள், ஆய்வுக் கூடத்துக்கு அவற்றை அனுப்பிவைத்தனர். இந்த வெடிகுண்டுகள், நாச வேலை எதற்காகவாவது கொண்டு வரப்பட்டதா? என்று விசாரணை நடத்தினர். இந்நிலையில் அவை 2 ஆண்டுகளுக்கு முன்னர் கோவில் குளத்தில் போடப்பட்டதாகத் தெரியவந்துள்ளது. தற்போது அதன் வீரியத்தன்மை குறைந்திருக்கலாம் என்றும் அதில் ஒரு குண்டு வெடித்த நிலையில் கருகியிருந்தது என்றும், ஆய்வு நடத்தப் பட்டு வருகிறது, விரைவில் முழு உண்மையும் தெரியும் என்றும் காவல் துறையினர் தெரிவித்துள்ளனர். மேலும், இது குறித்து விசாரணை நடத்தவும் உத்தரவிடப்பட்டுள்ளது.

புது தில்லி: ஜெயலலிதா உள்ளிட்ட நால்வரின் சொத்துக் குவிப்பு மேல்முறையீட்டு வழக்கில் பவானி சிங் நியமனத்துக்கு எதிராக திமுக பொதுச்செயலாளர் அன்பழகன் தாக்கல் செய்த மனு மீது உச்ச நீதிமன்றம் இன்று தீர்ப்பு வழங்குகிறது. பவானி சிங் நியமனம் குறித்த இறுதித் தீர்ப்பை உச்ச நீதிமன்ற நீதிபதிகள் தீபக் மிஸ்ரா, ஆர்.கே.அகர்வால், பிரபுல்ல பந்த் அடங்கிய அமர்வு இன்று காலை அளிக்க உள்ளது.

புது தில்லி: அண்டை நாடான நேபாளத்தில் ஏற்பட்ட பயங்கர நிலநடுக்கத்தில் இதுவரை 2,500க்கும் மேற்பட்டவர்கள் உயிரிழந்துள்ளனர். இந்நிலையில், நேபாளத்தில் நடைபெற்றுவரும் மீட்புப் பணிகளில் களத்தில் பணியாற்ற ஆர்.எஸ்.எஸ். இயக்கம் தயாராகியுள்ளது. நேபாள அரசுடன் முறைப்படி கலந்தாலோசித்த பின்னர் மீட்புப் பணியில் இறங்கவுள்ளது ஆர்.எஸ்.எஸ். அமைப்பு. முன்னதாக, நேபாளம் சென்றடைந்த ஆர்.எஸ்.எஸ். இணை பொதுச் செயலர் தத்தாத்ரேய ஹாஸ்போலே அங்குள்ள இந்து ஸ்வயம்சேவக சங்கத்துடன் இணைந்து மீட்புப் பணி திட்டத்தை வடிவமைத்து வருகின்றார். சேத அளவு, மீட்புப் பணி தேவைப்படும் பகுதி என பார்வையிட்டு அதற்கேற்ப இந்தியாவிலிருந்து ஆர்.எஸ்.எஸ். தொண்டர்கள் நேபாளத்துக்கு அனுப்பப்படவுள்ளனர்.

தில்லி: ஐபிஎல் சீஸன் 8 தொடரில், இன்று தில்லி பெரோஷ் ஷா கோட்லா மைதானத்தில் நடைபெற்ற 26வது லீக் போட்டியில், தில்லி அணியை விக்கெட் இழப்பின்றி வென்று சாதித்தது பெங்களூர் அணி. முதலில் பேட்செய்த தில்லி அணி, துவக்கம் முதலே விக்கெட்களை இழந்து வந்தது. 18.2 ஓவரில் அனைத்து விக்கெட்களையும் இழந்து, 95 ரன்களை எடுத்தது. அந்த அணியில் அதிகபட்சமாக கேதார் ஜாதவ் 33 ரன் எடுத்தார். மயன்க் அகர்வால் 27 ரன் எடுத்தார். பின்னர் விளையாடிய பெங்களூர் அணியில் துவக்க ஆட்டக்காரர்கள் கிறிஸ் கெய்லும் விராட் கோலியும் இணைந்து 10.3 ஓவரில் விக்கெட் இழப்பின்றி 99 ரன் சேர்த்து அணிக்கு வெற்றி தேடித் தந்தனர். கெயில் 62 ரன்னும் விராட் கோலி 35 ரன்னும் எடுத்தனர்.