விஜய் நடிப்பில் பிரம்மாண்டமாக உருவாகியுள்ள பேண்டசி திரைப்படம் ‘புலி’. சிம்புதேவன் இயக்கியுள்ள இப்படத்தில் ஸ்ரீதேவி, ஸ்ருதிஹாசன், ஹன்சிகா மொத்வானி, பிரபு, சுதீப் உள்ளிட்டோர் நடித்துள்ளனர். தேவி ஸ்ரீ பிரசாத் இசையமைத்துள்ள இப்படத்தை எஸ்.கே.டி.ஸ்டுடியோஸ் நிறுவனம் தயாரித்துள்ளது.

ரசிகர்களிடையே பெரும் எதிர்பார்ப்பை ஏற்படுத்தியுள்ள இப்படம் இன்று அக்டோபர் 1-ந் தேதி வெளியாவதாக இருந்தது. இதையொட்டி, விஜய் ரசிகர்கள் நேற்று முதலே திரையரங்குகளில் கட்-அவுட்கள் வைப்பது, தோரணங்கள் கட்டுவது என ‘புலி’ படத்தை வரவேற்க தொடங்கினர்.

அதேபோல், விஜய் படம் என்பதால், திரையரங்கு உரிமையாளர்களும் ‘புலி’ படத்தின் சிறப்பு காட்சிகளுக்கு ஏற்பாடு செய்தனர். இன்று காலை 5 மணிக்கு சிறப்பு காட்சிகள் திரையிடப்படும் என அறிவிக்கப்பட்டு டிக்கெட்டுகளும் விநியோகிக்கப்பட்டன.

ஆனால், நேற்று இரவே ஒரு சில காரணங்களால் நிறைய திரையரங்குகளில் ‘புலி’ படத்தின் காலை 5 மணி சிறப்பு காட்சிகள் ரத்து செய்யப்பட்டு, ரசிகர்களுக்கு டிக்கெட்டுக்கான பணத்தை திருப்பி கொடுத்துள்ளாக கூறப்படுகிறது. இருப்பினும் ஒரு சில திரையரங்குகள் 5 மணி சிறப்பு காட்சிகளை ரத்து செய்யவில்லை.

இந்நிலையில், சென்னை சாலிகிராமத்தில் அமைந்துள்ள எஸ்.எஸ்.ஆர்.பங்கஜம் திரையரங்கில் இன்று காலை 5 மணிக்கு ‘புலி’ படத்தின் சிறப்பு காட்சி திரையிடப்போவதாக அறிந்ததும், ரசிகர்கள் பட்டாளம் அந்த திரையரங்கை நோக்கி படையெடுக்க ஆரம்பித்தனர். ஆனால், அந்த திரையரங்கிலும் ‘புலி’ படத்தின் சிறப்பு காட்சி வெளியிடப்படவில்லை. இதனால், ரசிகர்கள் மிகுந்த ஏமாற்றமடைந்தனர்.

5 மணி சிறப்பு காட்சிகள் ரத்து செய்யப்பட்டதை தொடர்ந்து, காலை 8 மணி சிறப்பு காட்சியும் ரத்து செய்யப்பட்டுள்ளது

எனவே, படம் வெளிவருவதில் ஏற்பட்டுள்ள பிரச்சினைகளுக்கு தீர்வு கண்டு பகல் 12 மணிக்கு மேல் ‘புலி’ படம் வெளியாகும் என திரையரங்கு வட்டாரங்களில் கூறப்படுகிறது .

வெளிநாடுகளில் கருப்பு பணம் பதுக்கிய இந்தியர்கள், கருப்பு பணம் பற்றிய விவரங்களை தாங்களே முன்வந்து தெரிவிப்பதற்கான 90 நாள் கால அவகாசம் நேற்றுடன் முடிவடைந்தது. இந்த அவகாசம் நீட்டிக்கப்படாது என்று மத்திய அரசு தெரிவிததது.

கருப்பு பண விவரத்தை தெரிவிப்பதற்காக, டெல்லி வருமான வரி அலுவலக கட்டிடத்தின் 5-வது தளத்தில் பிரத்யேக மையம் அமைக்கப்பட்டு இருந்தது. நேற்று கடைசி நாள் என்பதால், காலையில் இருந்தே கூட்டம் அலைமோதத் தொடங்கியது.

கருப்பு பணம் பதுக்கியவர்கள் சிலர் நேரில் வந்திருக்க, வேறு சிலர் சார்பில் அவர்களின் ஆடிட்டர்கள் மற்றும் பிரதிநிதிகள் வந்திருந்தனர். ஒவ்வொருவரும் படிவம்-6-ஐ பூர்த்தி செய்து, சமர்ப்பித்தனர். ஒரு நபருக்கு 10 முதல் 15 நிமிடங்கள் வரை ஆனது. ஆவணங்களை சரிப்படுத்தி வைக்க வருமானவரி அலுவலக ஊழியர் ஒருவர் உதவினார்.

முதலில், டெல்லியைச் சேர்ந்த தந்தை-மகன் வந்திருந்தனர். நேரம் செல்லச் செல்ல கூட்டம் அதிகரித்தது. நீண்ட வரிசையில் நின்று விவரங்களை அளித்தனர். ராஜஸ்தான், கர்நாடகாவில் இருந்தும் வந்திருந்தனர். ஆனால், எவ்வளவு தொகைக்கு கணக்கு பெறப்பட்டது என்ற விவரம் வெளியிடப்படவில்லை.

சில ஆடிட்டர்கள், படிவத்தில் பூர்த்தி செய்த விவரங்களை படம் எடுத்து, யார் சார்பாக வந்திருந்தார்களோ, அவர்களுக்கு ‘வாட்ஸ்அப்’பில் அனுப்பி வைத்த வினோதமும் நடந்தது. கூட்டம் அதிகமாக இருந்ததால், நள்ளிரவு வரை மையம் செயல்படும் என்று ஓர் அதிகாரி தெரிவித்தார். நேற்று வரை கருப்பு பண விவரங்களை தெரிவித்தவர்களுக்கு ‘பெமா’ உள்ளிட்ட 5 சட்டங்களில் இருந்து விலக்கு அளிக்கப்படும் என்று மத்திய அரசு ஏற்கனவே அறிவித்துள்ளது குறிப்பிடதக்கது .

மதுரை:

மதுரையில் நிறுத்தப்பட்டிருந்த 2 அரசுப் பேருந்துகளில் நாட்டு குண்டு வெடித்துள்ளது பரபரப்பை ஏற்படுத்தியுள்ளது.

மதுரை ஆரப்பாளையம் பேருந்து நிலையம் அருகே இரண்டு அரசுப் பேருந்துகள் நிறுத்தி வைக்கப்பட்டிருந்தன. ஒரு பேருந்து சேலத்துக்கும், இன்னொரு பேருந்து ஓசூருக்கும் செல்வதற்காக நின்றிருந்தது. பேருந்தில் அப்போது பயணிகள் யாரும் ஏறியிருக்கவில்லை. இரு பேருந்துகளுமே காலியாக இருந்த நேரத்தில் அதிகாலையில் அடுத்தடுத்து வெடிச் சத்தம் கேட்டது. இதையடுத்து போலீஸாருக்குத் தகவல் கொடுக்கப்பட்டது.

போலீஸார் விரைந்து வந்து விசாரணை நடத்தினர். பேருந்துகளில் யாரும் இல்லாததால் எவருக்கும் காயம் ஏற்படவில்லை. பேருந்துகளிலும் லேசான சேதமே ஏற்பட்டிருந்தது.

இதுகுறித்து விசாரணை நடத்தி வருவதாகக் கூறிய போலீஸ் கமிஷனர் சைலேஷ் குமார் யாதவ், வெடித்தது மிகவும் குறைந்த சக்தி கொண்ட நாட்டு வெடிகுண்டு வகையாக இருக்கலாம் என்று சந்தேகிக்கிறோம். இருப்பினும் விசாரணை முடிவில்தான் இதுகுறித்து தெரிய வரும் என்றார்.

இதனிடையே குண்டு வெடித்த இடத்தில் இருந்த சிலர் இது குறித்துக் கூறுகையில், மர்ம நபர்கள் சிலர் வந்து பஸ்களில் நாட்டு வெடிகுண்டுகளை வீசிச் சென்றனர் என்று தெரிவித்துள்ளனர்.

மதுரையில் அண்மைக் காலங்களில் ரவுடி கும்பல்களுக்கிடையே மோதல்கள் நடைபெறுவது வழக்கமாகி வருகிறது. சில மாதங்களுக்கு முன்பு கூட வரிச்சியூர் செல்வம் கும்பல் இன்னொரு பிரபல ரவுடி மீது தாக்குதல் நடத்த நாட்டு வெடிகுண்டுகளை டிபன் பாக்ஸில் போட்டு பதுக்கி வைத்திருந்தது கண்டுபிடிக்கப்பட்டு மீட்கப்பட்டது. மதுரையில்  ஓடும் பேருந்தில் இது போன்று டிபன் பாக்ஸ் குண்டுகள் எடுக்கப்பட்டுள்ளன. இந்த நிலையில் நிறுத்தி வைக்கப்பட்டிருந்த பேருந்துகளில் வெடிச்சத்தம் கேட்டிருப்பது மதுரையில் பரபரப்பை ஏற்படுத்தியுள்ளது.

தபால் குண்டுகள் வெடித்தில் உடல் சிதறி ஆறு பேர் சீனாவில் உயிரிழந்தனர். ஏராளமானோர் காயமடைந்தனர்.

ஷாப்பிங் மால், சிறைச்சாலை, அரசு அலுவலகம், சூப்பர் மார்க்கெட், மருத்துவமனை, போக்குவரத்து நிலையம், காய்கறிச் சந்தை, நோய் கட்டுப்பாட்டு மையம் உள்ளிட்ட இடங்களில், இக்குண்டுகள் வெடித்தன.

சீனாவில், 15 இடங்களுக்கு, அனுப்பப்பட்ட தபால்களில் வைக்கப்பட்டிருந்த குண்டுகள் வெடித்து சிதறியதால், பதற்றம் நிலவியது.இதில், ஆறு பேர் சம்பவ இடங்களில், உடல் சிதறி பலியாயினர்.

மேலும், ஏராளமானோர் காயங்களுடன் மருத்துமனைகளில் அனுமதிக்கப்பட்டு உள்ளனர்.தபால் குண்டுகள் வெடித்ததால், ஏற்பட்ட சேதங்கள் தொடர்பான புகைப்படங்கள், இணையதளங்களில் வெளியாகின.
குண்டுகள் வெடித்த இடங்களில், மீட்புப்பணிகள் தீவிரமாக நடந்து வருகின்றன. சம்பவம் குறித்து, போலீசார் விசாரணை நடத்தி வருகின்றனர்.