நாகர்கோவில்:

தமிழகத்தில் பல இடங்களில் நமக்கு நாமே என்ற திட்டத்தை வைத்து பயணத்தை மேற்கொண்டுள்ள திமுக பொருளாளர் மு.க. ஸ்டாலின், நாகர்கோவிலில் ஆட்டோவில் நின்றபடி பயணித்து மக்களிடம் பிரசாரம் செய்தார்.

தி.மு.க. தலைவர் கருணாநிதியின் ஆலோசனைப்படி, கட்சியின் பொருளாளர் மு.க.ஸ்டாலின் தொடங்கிய ‘‘நமக்கு நாமே’’ விடியல் மீட்பு முதல் கட்ட பயணம் நேற்று முன்தினம் குமரி மாவட்டத்தில் இருந்து தொடங்கியது. அதைத் தொடர்ந்து ‘‘நமக்கு நாமே’’ விடியல் மீட்பு பயணத்தை தொடங்கும் நிகழ்ச்சி கன்னியாகுமரியில் நேற்று நடந்தது. இதற்காக மு.க.ஸ்டாலின் நேற்று காலை 8.30க்கு கன்னியாகுமரியில் உள்ள கடற்கரைப் பகுதிக்கு வந்தார். அங்கு வந்திருந்த மகளிர் சுய உதவிக் குழு பெண்களுடன் கலந்துரையாடி நடைப் பயணத்தை தொடங்கினார். வரும் வழியில் கன்னியாகுமரியில் உள்ள கடை வியாபாரிகள் சிலரை சந்தித்து பேசினார். அதைத் தொடர்ந்து காந்தி மண்டபத்துக்கு சென்று, காந்தியின் அஸ்தி கட்டத்துக்கு (நினைவிடம்) மாலை அணிவித்து மரியாதை செலுத்தினார். பிறகு காமராஜர் நினைவு மணிமண்டபத்துக்கு வந்து காமராஜரின் சிலைக்கு மாலை அணிவித்து மரியாதை செலுத்தினார்.

பின்னர் கன்னியாகுமரி சந்திப்பு பகுதிக்கு மக்களோடு நடந்து வந்தார். அண்ணா சிலை அமைந்துள்ள இடத்தில் அலங்கரித்து வைக்கப்பட்டிருந்த அண்ணா உருவப்படத்துக்கும், அருகில் உள்ள ராஜீவ்காந்தி சிலைக்கும் மலர் தூவி மரியாதை செலுத்தி, ‘‘நமக்கு நாமே’’ விடியல் மீட்பு பயணத்துக்காக வரவழைக்கப்பட்டு இருந்த வேனில் ஏறி நாகர்கோவிலுக்கு புறப்பட்டார்.

பின்னர் நாகர்கோவிலுக்கு வந்த அவர் கோட்டார் சந்தைப் பகுதியில் வியாபாரிகளை சந்தித்துப் பேசினார். ஆட்சியர் அலுவலகம் அருகில் ஆட்டோ ஓட்டுநர்கள் அளித்த வரவேற்பை ஏற்றுக்கொண்ட மு.க.ஸ்டாலின், அங்கிருந்த ஒரு ஆட்டோவில் ஏறி நின்று ஆட்சியர் அலுவலக பிரதான வாயில் அருகில் மக்களைப் பார்த்து கை அசைத்தவாறு பயணித்தார்.

குமரி மாவட்டத்தில் சில பகுதிகளில் நடைபெற்ற கூட்டங்களில் பேசிய அவர், குமரி மாவட்டம் அய்யா வைகுண்டர், மார்ஷல் நேசமணி, கலைவாணர் என்.எஸ்.கிருஷ்ணன், கவிமணி தேசிகவிநாயகம்பிள்ளை, ஜீவா போன்ற பல சான்றோர்களை உருவாக்கிய மாவட்டம். அப்படி பெருமைக்குரியவர்கள் வாழ்ந்த இந்த மண்ணில் இருந்து இந்த பயணம் தொடங்கப்படுகிறது.

கருணாநிதி முதல்–அமைச்சராக இருந்தபோது வணிகர்களுக்கு பல நன்மைகளும், சாதனை திட்டங்களும் கிடைத்து வந்தன. ஆனால் இன்று எந்த புதிய திட்டமும் கிடையாது. நீங்கள் சுதந்திரமாக தொழில் செய்யும் நிலை வரும். உங்கள் கோரிக்கைகள் நிறைவேற்றப்பட விரைவில் ஆட்சி மாற்றம் ஏற்பட வேண்டும். அனைத்து தரப்பு மக்களும் இந்த ஆட்சியால் பாதிக்கப்பட்டு உள்ளனர். எனவே உடனடியாக ஒரு ஆட்சி மாற்றத்தை விரும்புகிறார்கள். அதற்கு நல்ல வாய்ப்பு வருகிற 2016–ம் ஆண்டு. இன்னும் 237 நாட்கள்தான் உள்ளன. மீண்டும் தி.மு.க. ஆட்சி அமைய நீங்கள் அனைவரும் துணை நிற்க வேண்டும் என்று கேட்டுக்கொள்கிறேன் என்றார்.

நெல்லை:

இலங்கை போர்க்குற்றம் குறித்து பன்னாட்டு நீதி விசாரணை நடத்த மத்திய அரசு வலியுறுத்த வேண்டும்- என்று நெல்லையில் நேற்று நடந்த ஆர்ப்பாட்டத்தில் வைகோ பேசினார்.

இலங்கைத் தமிழர்களுக்கு நீதி கிடைக்க பிற நாடுகளை வலியுறுத்த வேண்டும்; இலங்கை அரசு நடத்திய போர்க்குற்றம் குறித்து பன்னாட்டு நீதி விசாரணைக்கான தீர்மானத்தை ஐ.நா. மனித உரிமை கவுன்சிலில் இந்தியா முன்வைக்க வேண்டும் உள்ளிட்ட கோரிக்கைகளை வலியுறுத்தி ம.தி.மு.க. சார்பில் நேற்று தமிழகம் முழுவதும் ஆர்ப்பாட்டம் நடைபெற்றது.

நெல்லை புறநகர், மாநகர் மாவட்ட ம.தி.மு.க. சார்பில் நெல்லை சந்திப்பு ரயில் நிலையத்தின் முன்பு நடைபெற்ற ஆர்ப்பாட்டத்தில் ம.தி.மு.க. பொதுச் செயலாளர் வைகோ தலைமை தாங்கிப் பேசினார். அப்போது,

இலங்கையில் நடந்த தமிழ் இனப்படுகொலை குறித்து பன்னாட்டு விசாரணை அவசியம் வேண்டும். சுதந்திர தமிழ் ஈழம் அமைய வேண்டும். அதற்கு இலங்கையில் வாழும் தமிழர்கள் மற்றும் உலகம் எங்கும் புலம்பெயர்ந்த தமிழர்களிடமும், தமிழ்நாட்டில் அகதிகளாக உள்ள 65 ஆயிரம் ஈழத் தமிழர்களிடமும் பொதுவாக்கெடுப்பு நடத்த வேண்டும். ஐ.நா.வில் அமெரிக்கா கொண்டு வரும் தீர்மானத்தை மத்திய அரசு ஆதரிக்கக்கூடாது.

ஈழத்தமிழர் விடுதலைக்காக முத்துக்குமார் தீக்குளித்து உயிர்நீத்தபோது நடந்த கூட்டத்தில், மத்திய அரசை விமர்ச்சித்தும், பிரபாகரனை பற்றியும் பேசக்கூடாது என்று டாக்டர் ராமதாஸ் கூறினார். தனது மகன் மத்திய அமைச்சரவையில் இருந்ததால் அவர் அப்படி கூறினார். மத்திய அமைச்சரவையில் இடம் பெற்றிருந்த தி.மு.க.வும் இது பற்றி பேசவில்லை.

இலங்கையில் நடந்த போர்குற்றங்கள் குறித்த மனித உரிமை கமிஷனின் 268 பக்க அறிக்கையை படித்து பார்த்தேன். அப்போதைய ராணுவ மந்திரி மைத்ரிய ஸ்ரீபாலசேனா, ராணுவ தளபதி சரத் பொன்சேகா மற்றும் பிரதமர் ரணில் விக்ரமசிங்கே ஆகியவர்களும், தமிழர்களுக்கு துரோகம் செய்தவர்கள்தான். அவர்கள் கண்முன்பே ஈழத்தமிழர்கள் சுட்டுக் கொல்லப்பட்டுள்ளனர்.

தமிழர்களுக்கு ஒரு ஆபத்து என்றால், அவர்களுக்காக போராடும் இயக்கம் ம.தி.மு.க. மட்டுமே. ம.தி.மு.க.வில் இருந்து சிலரை தி.மு.க.வுக்கு கருணாநிதியும், ஸ்டாலினும் இழுத்துச் சென்றுள்ளனர். அவர்கள் அங்கு சென்ற பின்புதான், ம.தி.மு.க. மீண்டும் எழுச்சி பெற்று உள்ளது. இதற்காக அவர்களுக்கு நன்றி தெரிவித்துக் கொள்கிறேன்.

இலங்கையில் நடந்த போர்க்குற்றம் குறித்து சர்வதேச விசாரணை நடத்த வேண்டும் என்று தமிழக சட்டசபையில் ஜெயலலிதா தீர்மானம் நிறைவேற்றி உள்ளார். இது ஏழரை கோடி தமிழர்களின் உணர்வை பிரதிபலிக்கும் தீர்மானம். அந்த தீர்மானத்தை மத்திய அரசு மதிக்க வேண்டும். அதுபற்றி ஐ.நா. மனித உரிமை கவுன்சிலுக்கு எடுத்துச் சென்று, பன்னாட்டு நீதி விசாரணைக்கு வலியுறுத்த வேண்டும்.

ஈழ தமிழர்களின் பிரச்சினைக்கு உலக நாடுகள் தீர்வு தராது. நாம் உலக நாடுகளிடம் நீதி கேட்கவேண்டாம். நாமே நீதியை பெறவேண்டும். இதற்கு தமிழகத்தில் உள்ள 10 லட்சம் இளைஞர்கள் கட்சியை மறந்து தமிழர் என்ற உணர்வுடன் களத்தில் இறங்கி போராடினால் நிச்சயம் வெற்றி கிடைக்கும். உடனே பொது வாக்கெடுப்பு நடத்தப்பட்டு தீர்வு காணப்படும். ஈழ தமிழர்களின் உரிமைக்காக நான் தொடர்ந்து போராடுவேன்.

– என்று வைகோ கூறினார்.