ஒருநாள் கிரிக்கட் உலகக் கோப்பைப் போட்டி
15ஆம் நாள் – வங்கதேசம் vs இந்தியா
புனே – 19.10.2023

முனைவர் கு.வை. பாலசுப்பிரமணியன்

வங்கதேச அணியை (256/8, லிட்டன் தாஸ் 66, தன்சிட் ஹசன் 51, மஹமதுல்லா 46, ரஹீம் 38, பும்ரா 2/41, சிராஜ் 2/60, ஜதேஜா 2/38) இந்திய அணி (41.3 ஓவரில் 261/3, விராட் கோலி 103*, ஷுப்மன் கில் 53, ரோஹித் ஷர்மா 48, கே.எல். ராகுல் 34, மிராஸ் 2/47) 7 விக்கட்டுகள் வித்தியாசத்தில் வென்றது.

பூவாதலையா வென்ற வங்கதேச அணி முதலில் மட்டையாடத் தீர்மானித்தது. அந்த அணியில் இன்று இரண்டு மாற்றங்கள். ஷாகிப் அல் ஹசன் மற்றும் டஸ்கின் அகமது இன்று விளையாடவில்லை. ஷாகிபுக்குப் பதிலாக இன்று ஷண்டோ அணித்தலைவராக இருந்தார்.

வங்கதேச அணியின் தொடக்க வீரர்கள் தன்சிட் ஹசன் மற்றும் லிட்டன் தாஸ் இருவரும் சிறப்பாக ஆடினார்கள். முதல் நான்கு ஓவரில் பும்ராவும் சிராஜும் ரன் குறைவாகக் கொடுத்து பந்து வீசினாலும் முதல் 10 ஓவர்களில் வங்கதேச அணி விக்கட் இழப்பின்றி 63 ரன்கள் எடுத்தது.

அதன் பிறகு வந்த வீரர்கள் ஷண்டோ (8 ரன்), மிராஸ் (3 ரன்), ஹிருதோய் (16 ரன்) சரியாக விளையாடவில்லை. பின்னர் ரஹீம் (38 ரன்) மற்றும் மகமத்துல்லா (46 ரன்) அணியின் ஸ்கோரை உயர்த்தினர். 50 ஓவர் முடிவில் வங்கதேச அணி 8 விக்கட் இழப்பிற்கு 256 ரன் எடுத்தது.

இந்திய அணி பேட்டிங் செய்ய வந்தபோது ரோஹித் ஷர்மா அதிரடி ஆட்டம் ஆடினார். அவருக்கு இணையாக சுப்மன் கில்லும் அதிரடி ஆட்டம் ஆடினார்.

முதலில் ரோஹித் 48 ரன்னுக்கு ஆட்டமிழக்க, விராட் கோலி ஆட வந்தார். அவருக்கு தொடர்ந்து மூன்று நோபால் வீசப்பட்டது அந்த பந்துகளில் 14 ரன்கள் எடுத்தார். 34.3 ஓவரில் 257 ரன் எடுத்திருந்தால் இன்று புள்ளிப்பட்டியலில் நியூசிலாந்து அணிக்கு மேல் இந்திய அணி முதலிடம் வகித்திருக்கும். இருந்தாலும் விக்கட் இழக்கக் கூடாது என்பதற்காக விராட் கோலியும் ஷ்ரேயாஸ் ஐயரும் சற்று நிதானமாக ஆடினர்.

ஷ்ரேயாச் 19 ரன்னுக்கு ஆட்டமிழக்க ராகுல் விளையாட வந்தார். ஏற்கனவே பந்துவீசும்போது ஹார்திக் பாண்ட்யா காயமடைந்து மைதானத்தைவிட்டுச் சென்றிருந்தார். எனவே ராகுலும் கோலியும் இந்த ஆட்டத்தை வென்றாக வேண்டிய கட்டாயத்தில் இருந்தனர்.

இறுதியில் கோலி தனது 48ஆவது ஒருநாள் சதத்தையும் பூர்த்தி செய்து, இந்திய அணிக்கு வெற்றியும் தேடித்தந்தார்.

இந்த வெற்றியுடன் இந்திய அணி 8 புள்ளிகளுடன் புள்ளிப்பட்டியலில் இரண்டாமிடத்தில் இருக்கிறது. விராட் கோலி ஆட்ட நாயகனாக அறிவிக்கப்பட்டார்.

நாளை ஆஸ்திரேலியாவும் பாகிஸ்தானும் பெங்களூரு சின்னசாமி மைதானத்தில் மோதுகின்றன. இந்திய அணியின் அடுத்த ஆட்டம் 22ஆம் தேதி, தர்மசலாவில் நியூசிலாந்து அணியுடன் நடக்கிறது.

ஒருநாள் கிரிக்கெட் உலகக் கோப்பைப் போட்டி
பதிநான்காம் நாள்
ஆப்கானிஸ்தான் vs நியூசிலாந்து
சென்னை – 18.10.2023

முனைவர் கு.வை. பாலசுப்பிரமணியன்

நியூசிலாந்து அணி (288/6, க்ளன் பிலிப்ஸ் 71, டாம் லேதம் 68, வில் யங் 54, நவீன் 2/48, அஸ்மத்துல்லா 2/56) ஆப்கானிஸ்தான் அணியை (34.4 ஓவரில் 139, ரஹ்மத் ஷா 36, அஸ்மத்துல்லா 27, லோக்கி ஃபெர்கூசன் 3/19, போல்ட் 2/18, சாண்ட்னர் 3/39) 149 ரன்கள் வித்தியாசத்தில் வென்றது.

பூவா தலையா வென்ற ஆப்கானிஸ்தான் அணி நியூசிலாந்து அணியை முதலில் மட்டையாடச் சொன்னது. கடந்த முறை கோப்பையை வென்ற இங்கிலாந்து அணியை வென்ற உற்சாகத்தோடு களமிறங்கிய ஆப்கானிஸ்தான் அணி இன்று நியூசிலாந்து அணியையும் வெல்லலாம் என்ற கனவுடன் விளையாடியது.

ஆனால் திறமை வாய்ந்த நியூசிலாந்து அணி அதற்கு இடம் கொடுக்கவில்லை. இன்றைய வெற்றியுடன் சேர்த்து, இதுவரை ஆடிய நான்கு ஆட்டங்களிலும் வெற்றி பெற்று நியூசிலாந்து அணி எட்டு புள்ளிகளைப் பெற்று புள்ளிப்பட்டியலில் மீண்டும் முதலிடத்திற்கு வந்தது.

நியூசிலாந்து அணி ஆடியபோது 21ஆவது ஓவரில் 109/1 என்ற நல்ல நிலையில் இருந்து அடுத்த ஒன்பது பந்துகளில் 110/4 என்ற நிலைக்கு வந்தபோது, ஆப்கானிஸ்தான் கனவு நனவாகுமோ என்ற எண்ணம் அனைவருக்கும் ஏற்பட்டிருக்கலாம். ஆனால் டாம் லேதம், கிளன் பிலிப்ஸ் இருவரும் 144 ரன்னுக்கு ஜோடி போட்டு அணியின் ஸ்கோரை உயர்த்தினர்.

அடுத்து ஆடிய ஆப்கானிஸ்தான் அணியில் ஒரு நல்ல பார்ட்னர்ஷிப் அமையவில்லை. மிட்சல் சாண்ட்னர் மற்றும் லோகி ஃபெர்கூசன் இருவரும் சிறப்பாகப் பந்துவீசினார்கள். 14 ரன்கள் மற்றும் 24 பந்துகள் இடைவெளியில் ஆப்கானிஸ்தான் ஐந்து விக்கட்டுகளை இழந்தது. இதனால் 34.4 ஓவரில் அனைத்து விக்கட்டுகளையும் இழந்து 139 ரன்னுக்கு ஆட்டமிழந்தது. எனவே நியூசிலாந்து அணி 149 ரன்கள் வித்தியாசத்தில், நல்ல நெட் ரன் ரேட் விகிதத்தில் வென்றது.

கிளன் பிலிப்ஸ் ஆட்டநாயகனாக அறிவிக்கப்பட்டார். நாளை புனே நகரத்தில் இந்தியா வங்கதேசம் இடையேயான ஆட்டம் ஹடைபெறவுள்ளது.

ஒருநாள் கிரிக்கட் உலகக் கோப்பைப் போட்டி
பதிமூன்றாம் நாள்
தென் ஆப்பிரிக்கா vs நெதர்லாந்து
தர்மசலா – 17.10.2023

முனைவர் கு.வை. பாலசுப்பிரமணியன்

நெதர்லாந்து அணி (43 ஓவரில் 245, ஸ்காட் எட்வர்ட்ஸ் 78*, வான் டெர் மெர்வ் 29, ஆர்யன் தத் 23, இங்கிடி 2/57, யான்சென் 2/27, ரபாடா 2/56) தென் ஆப்பிரிக்க அணியை (42.5 ஓவரில் 207, டேவிட் மில்லர் 43, கேசவ் மஹராஜ் 40, க்ளாசன் 28, ஜெரால்ட் கோட்ஸி 22, வான் பீக் 3/60, மீகிரன் 2/40, மெர்வீ 2/34, லீட் 2/33) 38 ரன்கள் வித்தியாசத்தில் வென்றது.

தர்மசலாவில் பெய்த மழையால் ஆட்டம் இன்று தாமதமாகத் தொடங்கியது. இதனால் ஆட்டம் 43 ஓவர் ஆட்டமாகக் குறைக்கப்பட்டது. பூவா தலையா வென்ற தென் ஆப்பிரிக்க அணி முதலில் பந்துவீசத் தீர்மானித்தது.

முதலில் மட்டையாட வந்த நெதர்லாந்து அணிக்கு அதன் வீரர்கள் நிலைத்து நின்று ஆடவில்லை. 27ஆவது ஓவர் முடிவில் அந்த அணி ஏழு விக்கட் இழப்பிற்கு 140 ரன் எடுத்திருந்தது. ஆனால் அணித்தலைவர் ஸ்காட் எட்வர்ட்ஸ் கடைசி இரண்டு ஆட்டக்காரர்களான வான் டெர் மெர்வ் மற்றும் ஆர்யன் தத் இருவருடனும் இணைந்து அணியின் ஸ்கோரை 43 ஓவர் முடிவில் எட்டு விக்கட் இழப்பிற்கு 245 ரன்னுக்கு உயர்த்தினார்.

246 என்ற இலக்கை தென் ஆப்பிரிக்க அணி எளிதில் அடைந்துவிடும் என அனைவரும் எதிர்பார்த்த நிலையில் க்விண்டன் டி காக் (20 ரன்), பவுமா (16 ரன்) இருவரும் பவர்ப்ளே ஓவர்களுக்குள் ஆட்டமிழந்ஸ்தனர். அதன் பின்னர் மர்க்ரம் (1 ரன்), டுஸ்ஸன் (4 ரன்) இருவரும் அடுத்தடுத்து ஆட்டமிழந்தனர். கிளாசனும் டேவிட் மில்லரும் தென் ஆப்பிரிக்க அணிக்கு நம்பிக்கை அளிக்கும் வகையில் ஆடிக்கொண்டிருந்தனர்.

ஆனால் நெதர்லாந்தின் வான் பீக் அவர்கள இருவரையும் ஆட்டமிழக்கச் செய்தார். அதுவரை ரன்ரேட் நெதர்லாந்து அணியின் ரன்ரேட்டை ஒட்டியே இருந்தது; அதற்கு பின்னர் நெதர்லாந்து அணி பந்துவீச்சாளர்களின் துல்லியமான பந்துவீச்சால் தென் ஆப்பிரிக்கா அணியின் ரன்ரேட் மிகக் குறைந்து கடைசி ஓவரில் 49 ரன்கள் அடிக்க வேண்டிய நிலை வந்தது. அந்த ஓவரில் கேசவ் மகராஜ் ஒரு ஃபோர் மற்றும் ஒரு சிக்சர் அடித்தார்; இருப்பினும் ஐந்தாவது பந்தில் ஆட்டமிழந்தார். இதன் மூலம் நெதர்லாந்து அணி இந்த ஆட்டத்தில் வெற்றிபெற்றது.

நெதர்லாந்து இதற்கு முன்னர் 2003 உலகக்கோப்பை ஆட்டமொன்றில் நமீபிய அணியை 64 ரன் வித்தியாசத்தில் வென்றிருக்கிறது. 2007இல் ஸ்காட்லாந்து அணியை 8 விக்கட்டுகள் வித்தியாசத்தில் வென்றிருக்கிறது.

உலகக் கோப்பை ஆட்டமின்றில் தென் ஆப்பிரிக்க அணியை வெல்வது இதுவே முதல் முறை. சென்ற வருடம் டி20 உலகக் கோப்பை ஆட்டத்தில் தென் ஆப்பிரிக்க அணியை நெதர்லாந்து அணி வென்றது நினைவிருக்கலாம்.   

ஸ்காட் எட்வர்ட்ஸ் ஆட்டநாயகனாக அறிவிக்கப்பட்டார். நாளை நியூசிலாந்து ஆப்கானிஸ்தான் அணிகளுக்கிடையே சென்னையில் ஆட்டம் நடைபெறும்.