நாமக்கல்:

திமுக தலைவர் கருணாநிதி, கடைசி நிமிடத்தில் தேமுதிகவும் மதிமுகவும் மாறினாலும் மாறும் என்று கூறியுள்ளார். எல்லாக் கட்சிகளும் அவரைத் தேடித்தான் செல்ல வேண்டுமா? ஏன்… நீங்களுந்தான் ஒரு தடவை எங்களைத் தேடி வாருங்கள்…. என்று தேமுதிக தலைவர் விஜயகாந்த் கூறினார்.

நாமக்கல் மாவட்டத்தில் ‘மக்களுக்காக மக்கள் பணி’ என்ற பெயரில் மதுவால் சீரழிந்த குடும்பங்கள் மற்றும் கணவரை இழந்த தாய்மார்களுக்கு நல உதவிகள் வழங்கும் விழா மற்றும் பொதுக்கூட்டம், தேமுதிக சார்பில் பரமத்திவேலூர் அருகே நடந்தது. இதில் தேமுதிக தலைவர் விஜயகாந்த் கலந்துகொண்டு, ரூ.25 லட்சம் மதிப்பிலான நல உதவிகளை வழங்கி பேசினார்.

அப்போது அவர், திமுக தலைவர் கருணாநிதி, கடைசி நிமிடத்தில் தேமுதிகவும் மதிமுகவும் மாறினாலும் மாறும் என்று கூறி உள்ளார். நீங்கள் ஒரு தடவை எங்களைத் தேடி வாருங்கள். எல்லா கட்சிகளும் அவரைத் தேடித்தான் செல்ல வேண்டுமா? நீங்கள் வாங்களேன்” என்று பேசினார்.

நாமக்கல்:
நாமக்கல்ன்னாலே திமுக., அதிமுக., வுக்கு நாமம் போட்டு அனுப்ப வேண்டும்னு அர்த்தம் என்று தேமுதிக., தலைவர் விஜயகாந்த் கூறியுள்ளார்.
நாமக்கல்லில் நடைபெற்ற தேமுதிக.,வின் மக்களுக்காக மக்கள் பணி என்ற நிகழ்ச்சியின் ஒரு பகுதியாக நலத்திட்ட உதவிகளை வழங்கிப் பேசிய விஜயகாந்த் இவ்வாறு கூறினார்.
அப்போது அவர், இங்குக் கூடியிருக்கும் தொண்டர்களை பார்க்கும் போது உள்ளபடியே மனமகிழ்ச்சி அடைகிறேன். இந்தக் கூட்டத்தை காசு கொடுத்து கூட்டியதாகக் காவல்துறையைச் சேர்ந்த ஒருவர் கூறினார். அதற்கு அவரிடம், ‘அப்படி கூட்டி வந்திருந்தால் ஆட்சியைப் பிடித்து இருப்போம்’ என்றேன்.

நாமக்கல் என்றால் ஆளுங்கட்சி மற்றும் திமுகவுக்கு நாமம் போட்டு வீட்டுக்கு அனுப்ப வேண்டும் என்று அர்த்தம். வருகிற சட்டமன்ற தேர்தலில் இங்குள்ள 6 தொகுதிகளிலும் அவர்களுக்குத் தக்க பாடம் புகட்ட வேண்டும். எப்பாடு பட்டாவது அதிமுக, திமுகவை ஆட்சியில் அமரவிடமாட்டேன்… என்று பேசினார்.

சென்னை:

இப்போதுதான் தமிழக காங்கிரஸ் கட்சி சரியான திசையில் சென்று கொண்டிருக்கிறது. இளங்கோவனை மேலிடம் மாற்றாது என்று கூறியுள்ளார் குஷ்பு.

தமிழக காங்கிரஸ் தலைவர் இளங்கோவனை பதவியில் இருந்து விலக்கக் கோரி மூத்த தலைவர்கள் பலர் போர்க்கொடி தூக்கியுள்ளனர். அவர்கள் அண்மையில் தில்லி சென்று காங்கிரஸ் தலைவர் சோனியா, துணைத் தலைவர் ராகுல்காந்தி ஆகியோரை சந்தித்துப் பேசினார்கள். அப்போது அவர்கள் இளங்கோவன் மீது சரமாரியாக குற்றச்சாட்டுகளை கூறினார்கள்.

இதைத் தொடர்ந்து இளங்கோவனை தில்லிக்கு அழைத்து சோனியா பேசினார். இதனால் இளங்கோவன் தலைவர் பதவியில் இருந்து நீக்கப்படலாம் என்ற பரபரப்பு ஏற்பட்டது. ஆனால், திருநாவுக்கரசர், குஷ்பு ஆகியோர் இளங்கோவனுக்கு ஆதரவளித்துள்ளனர். அவர்கள் சோனியா மற்றும் ராகுலை சந்தித்து இளங்கோவனை மாற்றக்கூடாது என்று வலியுறுத்தினர். இந்தச் சந்திப்புக்கு பிறகு குஷ்பு செய்தியாளர்களிடம் பேசியபோது,

தமிழக காங்கிரஸ் தலைவர் பதவியில் இருந்து இளங்கோவனை மாற்ற வேண்டும் என்ற எண்ணம் எதுவும் மேலிடத்தில் இல்லை. எனவே இளங்கோவன் தலைவர் பதவியில் நீடிப்பார். நிச்சயமாக அவர் மாற்றப்பட மாட்டார். தமிழக காங்கிரஸ் கட்சி இப்போதுதான் சரியான திசையில் சென்று கொண்டிருக்கிறது. அதற்கு இளங்கோவனின் கடும் உழைப்பும், ஆற்றலுமே காரணமாகும். அவர் வழிகாட்டுதலில் காங்கிரஸ் சிறப்பாக செயல்படுகிறது.

முன்பெல்லாம் தமிழக காங்கிரஸ் கட்சி அலுவலகமான சத்தியமூர்த்தி பவன் வெறிச்சோடி காணப்படும். ஆனால் இப்போது சத்தியமூர்த்தி பவனுக்கு தினமும் 300, 400 பேர் வருகிறார்கள். கட்சியில் ஏற்பட்டுள்ள இந்த மறுமலர்ச்சிக்கு இளங்கோவனே காரணம்.

காங்கிரஸ் கட்சி இந்தியாவில் உள்ள அரசியல் கட்சிகளில் மூத்த கட்சி. மிகப் பழமையான கட்சி. ஜனநாயக ரீதியில் கட்சி செயல்படுகிறது. பாரம்பரியம் மிக்க இந்தக் கட்சி தனிநபரை நம்பி இல்லை. லட்சோப லட்சம் தொண்டர்களையும், மக்களையும் சார்ந்தே காங்கிரஸ் கட்சி உள்ளது. தமிழக காங்கிரஸ் கட்சிக்குள் கருத்து வேறுபாடுகள் இருக்கலாம். ஆனால், காங்கிரஸ்தான் அதிக அளவில் மக்கள் கவனத்தை ஈர்த்துள்ளது… என்று கூறினார்.

கோவை :

குஷ்புவை பற்றி நான் எதுவும் விமர்சிக்கவில்லை. எந்தத் தனிநபரைப் பற்றியும் விமர்சிக்கவும் இல்லை என்று கார்த்தி சிதம்பரம் கூறியுள்ளார்.

அண்மையில் குஷ்பு குறித்து அவர் விமர்சித்ததாகவும், அதற்கு பதிலடியாக குஷ்பு பேட்டி அளித்தும் அண்மைக் காலத்தில் ஊடகங்களில் பரபரப்பு தொற்றிக் கொண்டிருந்தது. இந்நிலையில், கோவையில் செய்தியாளர்களைச் சந்தித்து பேசிய கார்த்தி சிதம்பரம்…

“குஷ்புவை பற்றி நான் எதுவும் விமர்சிக்கவில்லை. எந்தத் தனிநபரை பற்றியும் நான் விமர்சிக்கவில்லை. விமர்சிக்க விரும்பவும் இல்லை. என்னிடம் நடிகைகளை நம்பி காங்கிரஸ் கட்சி இருக்கிறதா என கேட்டார்கள். அதற்கு நடிகைகளை நம்பி காங்கிரஸ் கட்சி இல்லை என்று தான் சொன்னேன். மற்றபடி நான் யாரைப் பற்றியும் நான் விமர்சிக்கவில்லை” என்று கூறினார்.

மேலும் அவர், “மதுவிலக்கை தவிர்த்து கோவன் சொன்ன மற்ற கருத்துகளை ஏற்க முடியாது. ராஜீவ்காந்தி கொலையையும், மன்மோகன்சிங் பற்றி விமர்சித்ததையும் ஏற்க முடியாது. டாஸ்மாக்கை மூட வேண்டும் என்பதைத் தாண்டி கோவனின் எந்தக் கருத்தையும் நாங்கள் ஆதரிக்கவில்லை. தமிழகத்தில் 7 ஆயிரம் டாஸ்மாக் கடைகள் உள்ளன. பள்ளிகளை விட டாஸ்மாக் கடைகள் தான் அதிகம் உள்ளன. கல்வியில் முன்னிலையில் உள்ள தமிழகத்தில் டாஸ்மாக் வருமானத்தை வைத்து அரசு நடக்கிறது என்பது கொச்சைத்தனமான விஷயம். தொழில்துறையை மையப்படுத்தி பொருளாதாரம் இருக்க வேண்டும். டாஸ்மாக்கை வைத்து இருப்பது மோசமானது… என்றார்.